1-2. Ntoko Lothi, etthu xeeni enaaxankiha arumeyi a Muluku olelo-va?

 OLELO-VA, okathi nnoona ahu mweettelo woohiloka wa atthu, ninnixanka ntoko Lothi. Biibiliya onihimya so: ‘Lothi aanixanka vanceene mwaha wa mweettelo woohiloka onooniherya ohuuliwa muru wa atthu ale ootakhala’. Owo aanisuwela wiira Tiithi ahu a wiirimu onninyokha mweettelo owo. (2 Ped. 2:7, 8) Omuttittimiha ni omphenta Muluku waahimukhaliherya Lothi, okhootta mweettelo woohiloka wa atthu a okathi ole. Ntoko Lothi, hiyo ninkhala eriyari ya atthu ahinttittimiha malamulo a Yehova aahiiso anttittimiha vakhaani. Hata vari siiso, nnoowerya okhalana mweettelo wooloka. Exeeni enrowa onikhaliherya? Nihaana omphenta Muluku ni omuttittimiha. — Mir. 14:2.

² Yehova onnirumeela eliivuru ya Miruku wiira onikhaliherye ni onitumererye opaka itthu sooloka. Nto atthu ootheene, eyo piiyo, alopwana, athiyana, amiravo ni atthu oowuuluvala, anoowerya wiixutta itthu sooreera akhala wiira anoosoma eliivuru ya Miruku.

3. Moovarihana ni Miruku 17:3, etthu xeeni yuulupale enniiriha okhapelelaka murima ahu? (Nwehe elatarato.)

³ Etthu yuulupale enniiriha okhapelelaka murima, mwaha woowi Yehova onnitokosa murima ahu. Yehova toovirikana ni apinaatamu maana awo anwerya oweha makhalelo anooneya a mutthu. Masi Yehova onniwerya oweha murima ahu ni osuwela itthu sinuupuwela ahu. (Musome Miruku 17:3.) Akhala wiira nnoosarihaka mmuupuweloni mwahu miruku sa Yehova, owo onoonikhaliherya aka ni onoonivaha okumi woohimala. (Yoh. 4:14) Niira siiso, mweettelo woohiloka ni wootha wa Satana, khonrowa onihaaxa. Mwaha wa xeeni? Mwaha woowi khaninrowa wuupuwelaka itthu soohiloka. (1 Yoh. 5:18, 19) Nihiliyaleke wiira nihiku na Yehova ninnitepa waattamela. Nto, nihaana otepaka omphenta ni omuttittimiha. Ohiya-vo, omphenta wahu vanceene Yehova, onniniiriha  okhootta muupuwelo waarowa oniiriha opaka etampi. Okathi nneehereriwa ahu wiira nipake etampi, nihaana wiikohaka so: ‘Kinrowa owerya sai omutthekela Muluku aka yoowo oonihenrye ikwaha sinceene wiira onnikiphenta?’ — 1 Yoh. 4:9, 10.

4. Omuttittimiha Yehova waamukhalihenrye sai murokora mmosa?

⁴ Murokora mmosa a elapo ya oCroácia oniihaniwa Marta, aaheehereriwa wiira orupihane moohiloka. Owo olempe so: “Vaanikixankiha wuupuwela saana ni wiimananiha wiira kihipake etthu yoohiloka. Muupuwelo aka waakitumererya opaka etthu yoohiloka, mwaha woophavela wiihakalaliha okathi vakhaani paahi. Masi omuttittimiha vanceene Yehova tokikhalihenrye”. b Moota xeeni? Marta onihimya wiira aanuupuwelela mixankiho saarowa omphwanya akhala wiira ampaka etthu yoohiloka. Hiyo nave nihaana opakaka etthu emosa-ru. Nihaana wuupuwelaka wiira etthu yootepa otakhala, omuriipiha murima Yehova ni ohitthikela-tho okhalana eparakha ya omulompa. — Maph. 6:5, 6.

5. Nniixutta exeeni ni itthu saamukhumelenle Léo?

⁵ Omuttittimiha Yehova, onooniiriha osyaka woothererya itthu mwaha wa etthu yoohiloka nipanke ahu. Mmiravo mmosa onikhala oCongo, yoowo oniihaniwa Léo ohiixutta etthu. Nuuvira iyaakha 4 opatisiwe ene, aahipacerya weetta ni apatthani oohiloka. Owo uupuwela wiira akhala wiira aamweetta ni apatthani awe ale oohiloka masi ohinapaka itthu soohiloka yaapaka aya, khaarowa omutthekela Yehova. Masi voohipisa, apatthani oohiloka a Léo yaahimwiiriha opacerya orupihana moohiloka ni ohapaliwa. Muhoolo mwaya, aahipacerya wuupuwela itthu aixuttihiwe awe ni anamuyari awe. Nave aahuupuwela moota aahakalala awe okathi aamurumeela awe Yehova. Nto exeeni aapanke awe munna ole? Aahihiya mweettelo ole woohiloka. Nave axitokweene yaahimukhaliherya wiira olipihe ompatthani awe ni Yehova. Nto munna ole aahimutthikela Yehova. Olelo-va, Léo onirumeela ntoko mutokweene ni  pioneero a vameekhaaya. Owo onnihakalala vanceene!

6. Axithiyana xeeni aniromoliwa ekapiitulu 9 ya Miruku?

⁶ Vano ninrowa osoma eliivuru ya Miruku ekapiitulu 9. Eyo enaalavula axithiyana anli: Mmosa onithoonyerya ololo, mukina onithoonyerya ankhili. (Mulikanyihe ni aRoma 5:14; aGalasia 4:24.) Okathi ninrowa ahu osomaka ekapiitulu eyo, nuupuweleke wiira olumwenku wa Satana onisiveliwa orupihana woohiloka ni epornokrafia. (aEef. 4:19) Tivonto, nihihiye omuttittimiha ni omphenta Muluku ni okhala ottaiwene wa itthu sootakhala. (Mir. 16:6) Moohaanyiherya, ootheene ahu, alopwana ni athiyana, nnoowerya wiixutta etthu ni ekapiitulu eyo. Axithiyana aniromoliwa ekapiitulu eyo, annaalattula alolo, niire so, atthu ahirina ankhili. Vanikhala ntoko wiira axithiyana awo anihimyasa so: ‘Murwé mulye yoolya ahu’. (Mir. 9:1, 5, 6, 13, 16, 17) Ole oneemererya nlattulo na axithiyana awo, pooti ophwanya maxakha wala itthu sooreera.

7. Moovarihana ni Miruku 9:13-18, exeeni enaakhumelela ale aneemya nlattulo na muthiyana mulolo? (Nwehe eteseenyo.)

⁷ Woopaceryani, nrowe niwehe nlattulo na muthiyana ‘mulolo’. (Musome Miruku 9:13-18.) Owo khonuuliwa muru waalattula atthu ahinuupuwela saana, oriki: ‘Muhapuwele’ nno, murwe nlye. Masi exeeni enikhumelela? Atthu awo ‘annikumana ni okhwa’. Woonasa wene nyuwo munnuupuwela malikanyiho makina anromoliwa ni eliivuru ya Miruku. Mwa ntakiheryo, ninnilopoliwa wiira nimutthyawe muthiyana “namuttompe” ni “muthiyana namararuwa”. Nave ninnilopoliwa wiira: “Okela emp’awe onnivelèla [aahiiso onniroiha] wopweteyani”. (Mir. 2:11-19) Miruku 5:3-10, onninlopola sa muthiyana mukina “namuttompe”. Yoolepa ela enihimya wiira: “Inawu sawe sinetta sikelaka mokhwani”.

8. Etthu xeeni emosa ninreerela ahu othanla?

⁸ Ale aninwiriyana muthiyana ‘mulolo’, ahaana othanla etthu emosa: Weemya wala okhootta nlattulo nawe. Nave hiyo nihaana opaka etthu emosa-ru. Mwa ntakiheryo, ninrowa opaka exeeni akhala wiira mutthu mukina onnitumererya orupihana woohiloka? Ankhi vakhala wiira yookhumelela epornokrafia mutelefonini aahiiso mukomputatoreni mwahu, okathi ninrumeela ahu interneeti?

9-10. Mathowa xeeni ooloka anniiriha otthyawa orupihana woohiloka?

⁹ Nookhalana mathowa ooloka anniiriha otthyawa orupihana woohiloka. Muthiyana ‘mulolo’ onihimya so: “Màsi òwiyiwa t’òtepa orera”. Exeeni ekhanle “màsi [awo] òwiyiwa”? Biibiliya onnilikanyiha orupihana wa mulopwana ni mwaarawe ntoko maasi ooriirya. (Mir. 5:15-18) Mulopwana ni muthiyana athelanne attharihelaka  nlamulo na kuvernu, anoowerya opaka eyo moohakalala. Masi, “màsi òwiyiwa” toovirikana vanceene. “Màsi òwiyiwa” pooti otaphulelaka orupihana woohiloka aahiiso oraruwa. Ale anrupihana woohiloka, ikwaha sinceene anipaka eyo moowiipitheya, ntoko siisaale latarau oniiya awe ohooniwaka. Nto okathi yoole atthu awo anuupuwela aya wiira khuuvo mutthu onrowa osuwela etthu epanke aya, “màsi [awo] òwiyiwa” pooti okhalaka ntoko “màsi òrera”. Masi mutthu onuupuwela siiso, onimwiiwoka! Yehova onniweha itthu sootheene. Orupihana woohiloka khahiyo “màsi òrera”. Ohiya-vo, opweteiwa ompatthani ahu ni Yehova, etthu yootepexa owereya. (1 aKor. 6:9, 10) Masi khahiyo yeeyo paahi.

¹⁰ Orupihana woohiloka pooti omwiiriha mutthu woonaka ehaaya, aahiiso woonaka wiira khorina efaita. Nave-tho, pooti omwiiriha mutthu orupala ohiphavenle ni omwalana. Tthiri, etthu yooloka opaka, ori oheemererya nlattulo na muthiyana ‘mulolo’. Ntoko noonale ahu ettima 9, orupihana woohiloka, onnimwiiriha mutthu opweteiwa ompatthani awe ni Yehova. Nave-tho mutthu owo pooti ophwanya iretta sinceene aahiiso okhwa. (Mir. 7:23, 26) Miruku ekapiitulu 9 eversiikulu 18, enimala eriki: “Ale anlattuliwa [ni muthiyana owo] anrowa opweteya”. Nto akhala wiira nlattulo na muthiyana ‘mulolo’ ninnikumiherya maxakha, xeeni atthu anceene aneemya aya? — Mir. 9:13-18.

11. Xeeni oweha epornokrafia ori aya wootepa woopiha?

¹¹ Olelo-va, oweha epornokrafia etthu ehireere wuulaana. Atthu akina anuupuwela wiira oweha epornokrafia khahiyo etthu yoonanara. Masi, epornokrafia ennikumiherya mixankiho sinceene. Onnimwiiriha mutthu ohiixoona okhala a faita ni onnimwiiriha ohaavaha efaita atthu akina. Nave oweha epornokrafia pooti okhalaka etthu yoovila ohiya. Nuumala mutthu oweha, vanikhala vooxankiha ottipiha mmuupuweleloni itthu iyo soohiloka oonale awe. Ohiya-vo, epornokrafia khemmaliha soophavela soohiloka, masi enimwiiriha mutthu otepa ophavela itthu iyo. (aKol. 3:5; Yak. 1:14, 15) Tivonto, atthu anceene anweha epornokrafia, annimorela muraakho wa orupihana woohiloka.

12. Exeeni enrowa onikhaliherya ohiweha ilatarato sinitumererya orupihana woohiloka?

¹² Exeeni ninreerela ahu opaka, akhala wiira muselulaarini mwahu, aahiiso mukomputatoreni mwahu, yookhumelela epornokrafia? Khivanreerela othipelela oweha. Exeeni enrowa onikhaliherya opaka eyo? Ori wuupuwela wiira etthu yootepa okhalana efaita, ori ompatthani ahu ni Yehova. Masi, itthu sikina pooti wiira khahiyo epornokrafia. Hata vari siiso, oweha itthu iyo soohiloka, pooti oniiriha ophavela orupihana woohiloka. Nto nihaana osyaka itthu iyo, maana khanimphavela opaka nnakhala etthu emosa yaakela oniiriha wuupuwela wala orupihana woohiloka. (Math. 5:28, 29) Mutokweene mmosa a oTailândia oniihaniwa David, ohimmye so: “Miyo kiniikoha so: ‘Hata elatarato ela ehivarihanaka ni epornokrafia, kiireke Yehova vammusivela okiweha kithipelelaka oweha?’ Wuupuwela siiso, onnikikhaliherya opaka etthu yooloka”.

13. Exeeni ennikhaliherya opaka soothanla sooloka?

¹³ Omuttittimiha wahu Yehova ni osyaka opaka etthu yaarowa omuriipiha murima, onoonikhaliherya opaka soothanla sooloka. “Wattittimiha Apwiya [ti] maphattuwelo òsuwela”. (Mir. 9:10) Ninnoona eyo okathi ninsoma ahu iversiikulu soopacerya sa ekapiitulu 9 ya eliivuru ya Miruku. Iversiikulu iyo ninnaaphwanya “ankhili” eekeekhai, yaawo anithoonyerya muthiyana mukina.

14. Nlattulo xeeni nimphwanya ahu eliivuru ya Miruku 9:1-6?

¹⁴ Musome Miruku 9:1-6. Iversiikulu iya, ninniphwanya nlattulo na Yehova, Mpattuxa ahu, yoowo onaavaha ankhili eekeekhai. (Mir. 2:6; aRom. 16:27) Nave, iversiikulu iyo, sinniromola empa yuulupale erina maripu aahiiso  ipilaari 7. Mwaha wookhala empa yuulupale, eyo enooniherya wiira Yehova ti Muluku oovaha. Ohiya-vo, onniwaakhela saana atthu ootheene aniphavela omusuwela ni okhala a miruku.

15. Yehova oniphavela wiira nipakeke exeeni?

¹⁵ Ekapiitulu 9 ya Miruku, ennimuromola muthiyana oovaha. Muthiyana owo onnipaka efesta, onniruuha eviinyu ni onnipweha vameesa. Muthiyana owo, onithoonyerya “akhili” eekeekhai. Ntakiheryo nawe, ninninuupuxerya wiira Yehova toovaha vanceene. (Mir. 9:2) Ohiya-vo, moovarihana ni iversiikulu 4 ni 5, muthiyana owo ‘onniwiirela alolo wira: “Murwé, mukhure ephau aka”’. Xeeni ninreerela ahu weemererya nlattulo nlo? Yehova oniphavela wiira arumeyi awe ekhaleke atthu a miruku. Owo khomphavela wiira nisuwele wiira mooro onnipaha nipwehaka ikatha vaikho. Niire so, yena ompheela onikhapelela. Namwiiwelela Yehova, nnoosyaka oriipiwa murima, othanana mwaha wa itthu soohiloka nipanke ahu ni omakela wuupuwela soottheka sahu. Tivonto owo ‘onnaakhaliherya atthu èkekhai’. (Mir. 2:7) Tthiri, omuttittimiha vanceene Yehova, onooniiriha opaka itthu wiira nimusivelihe ni owiriyana miruku sawe. Nto akhala wiira nnimweettelaka miruku iyo, nnoohakalalaka. — Yak. 1:25.

16. Omuttittimiha Yehova omukhalihenrye sai Alain opaka etthu yooloka? Nave exeeni ekhumelenle mwaha wa mweettelo awe?

¹⁶ Nkahaya nwehe moota omuttittimiha Muluku omukhalihenrye awe mmiravo Alain opaka etthu yooloka. Alain, yoowo ori mutokweene a mmulokoni ni prusoore, ohimmye so: “Atthu anceene kaavarana aka muteko, yuupuwela wiira ifilme sa epornokrafia, saaniixuttiha itthu sooreera voohimya sa orupihana”. Masi Alain aanisuwela wiira eyo khahiyo yaari ekeekhai. Owo onihimya-tho so: “Okhala wiira kinnimuttittimiha ni omphenta Yehova, miyo kaahikhootta waasistiri ifilme iye. Nave-tho kaahaaleela atthu ale yaavarana aka muteko mathowa yaakiiriha ohiweha ifilme iye”. Alain eettela malakiheryo a “ankhili” eekeekhai, ni ‘etta iphiro sowokololowa s’ankhili’. (Mir. 9:6) Mapurosoore makina aasiveliwa vanceene ni mweettelo wa Alain. Nto akina a yaawo aapacerya omusoma Biibiliya ni orowa omuthukumanoni.

17-18. Itthu xeeni sooreera siniwiiraneela atthu aneemya nlattulo na “ankhili” eekeekhai? Nave etthu xeeni anlipelela aya waakhela muhoolo? (Nwehe eteseenyo.)

¹⁷ Yehova onnirumeela ntakiheryo na axithiyana ala anli a nthoonyeryo, ophavelaka oniixuttiha moota woophwanya ohakalala weekeekhai. Ale aneemererya nlattulo na muthiyana ‘mulolo’ aniphavelasa opuha paahi, niire so, anipaka itthu sa wiiphiini, ntoko orupihana woohiloka. Atthu awo aniphavela itthu sa okumi yoola paahi, ahuupuwelaka mixankiho sa muhoolo. Masi atthu anipaka itthu iyo, “anrowa opweteya”. — Mir. 9:13, 17, 18.

 ¹⁸ Atthu ale aneemya nlattulo na muthiyana a miruku, niire so, ale anaaphwanya “ankhili” eekeekhai, anniphwanya itthu sooreera. Muthiyana owo, oopaka efesta wiira aletto awe, alye. Efesta eyo enithoonyerya itthu sootheene atthu aniprisari aya wiira ahihiye waataana ni Yehova. (Yes. 65:13) Omurumeelaka profeta Yesaya, Yehova onihimya so: “Mukìwe, mukiwiriyane: munophwanya yolya yorera; munimolya itthu sosiva, munovona”. (Yes. 55:1, 2) Okathi nimpaka ahu eyo, ninniixutta ophenta itthu Yehova oniphenta awe, ni onyokha itthu oninyokha awe. (Esal. 97:10) Nave-tho, vanninsivela vanceene waalattula atthu akina wiira yaaphwanye “ankhili” eekeekhai. Vanikhala ntoko wiira nri ‘mapuro ottukhuwa a mmuttettheni khiyaalaleerya atthu, niiraka: “Ahinòneliwa vatthu ekirweleke miyo”’. Atthu aneemya nlattulo nno, anniphwanya itthu sinceene sooreera niinaano-va ni mahiku ootheene. Itthu iyo sooreera, sinninikhaliherya ‘okhalana ekumi ya mahiku ootheene, neettaka iphiro soowookololowa s’ankhili’. — Mir. 9:3, 4, 6.

19. Moovarihana ni Musuweli 12:13, 14, exeeni elakenle ahu opaka? (Nwehe ekaaxa eni: “ Omuttittimiha Muluku Onnikhaliherya Sai?”.)

¹⁹ Mmusome Musuweli 12:13, 14. Omuttittimiha vanceene Yehova onookhapelela murima ahu. Nave, onoonikhaliherya ohihiya okhalana mweettelo wooloka ni waataana saana ni Yehova mahiku ala ookiserya ni ootakhala. Tivonto, nihihiye waalattula atthu anceene wiira akhalane “ankhili” eekeekhai. Ninnipaka eyo, okhala wiira ninnimphenta ni omuttittimiha Yehova ni murima ahu wootheene.