1-2. Moovarihana ni Otumererya 10:20, exeeni ninreerela ahu opaka wiira nikhalane ompatthani woolipa ni Yehova?

 OKATHI munipatthana anyu ni mutthu mukina mikhalelo xeeni munoona anyu okhala sa faita? Woonasa wene nyuwo munoona wiira apatthani ooloka ahaana ophentanaka ni okhaliheryana. Vanvila nyuwo ohimya wiira woova mukhalelo wa faita okathi muniphavela anyu opatthana ni mutthu. Ntoko enooniherya aya yoolepa ya mwaha ola, ale aniphavela okhalana opatthani woolipa ni Yehova ahaana ‘omuttittimihaka ni omoova’. — Mmusome Otumererya 10:20.

² Hata nipacenrye ene omurumeela Yehova khalai aahiiso niinano, ootheene ahu nihaana omuttittimihaka vanceene Muluku. Masi omuttittimiha Muluku ontaphulela exeeni? Ninrowa wiixutta sai omuttittimiha vanceene Yehova? Ntakiheryo na murumeyi Obadiya, muulupale aanamukuttho Yehoyada ni mwene Yowasi ninniixuttiha exeeni?

3. Woova onrowa onikhaliherya sai? Mutthokiherye.

³ Omuttittimiha Muluku vanceene, ontaphulela woova opaka etthu enrowa omuriipiha murima yena. Ikwaha sikina, woova pooti okhalaka ntoko wiira khahiyo ti wooloka, masi onninikhaliherya opaka itthu mwa miruku. Mwa ntakiheryo, woova omora onninikhaliherya okhalana ephoole okathi nneetta ahu waattamela vari nlitti nuulupale. Nave woova ovulala onniniiriha osyaka itthu sikhanle oonivulaliha. Nave-tho, woova ohonona opatthani nrina ahu ni mutthu nnimphenta ahu, onniniiriha osyaka olavula aahiiso opaka etthu yaarowa oomunyoonyiha mutthu owo.

4. Satana oniphavela wiira nimuttittimiheke aahiiso nimooveke sai Yehova?

 ⁴ Satana oniphavela wiira nimuttittimiheke aahiiso nimooveke Yehova mootepana. Nave owo oniphavela wiira nuupuweleke ntoko siisaale Elifazi uupuwela awe. Elifazi uupuwela wiira Yehova khonaaroromela arumeyi awe ni khivaniweryaneya omuhakalaliha. (Yob. 4:18, 19) Yoolakela ya Satana oniphavela wiira nimuttittimiheke aahiiso nimooveke Yehova mwa enamuna yoohiloka, ekhanle ooniiriha ohiya omurumeela. Nto wiira nisyake muraakho owo wa Satana, nihaana omuttittimihaka Yehova mwa enamuna yooloka, eyo piiyo, ohitepa omoova Yehova.

5. Omuttittimiha Muluku vanceene ontaphulela exeeni?

⁵ Omuttittimiha Yehova ontaphulela omphenta vanceene ni wiimananiha ohipaka etthu yaarowa ohonona ompatthani ahu ni yena. Mwa ntakiheryo, Yesu aahooniherya enamuna eyo ya omuttittimiha ni ‘omoova Muluku’. (aHeeb. 5:7) Yesu khaamoova Yehova mootepana. (Yes. 11:2, 3) Tthiri owo aanimphenta vanceene Yehova ni aniphavela omwiiwelela. (Yoh. 14:21, 31) Nimutakihaka Yesu, hiyo ninnimuttittimiha vanceene Yehova okhala wiira ninnisuwela wiira owo toophenta, toosuwela, ta xariya ni toowerya. Nave ninnisuwela wiira Yehova onniniphenta vanceene. Nto itthu nimpaka ahu pooti omuriipiha murima aahiiso omuhakalaliha. — Esal. 78:41; Mir. 27:11.

6. Enamuna xeeni enrowa oniixuttiha omuttittimiha wala omoova Yehova? (Esalimo 34:12.)

⁶ Hiyo khaniyariwe nsuwelaka omuttittimiha wala omoova Yehova, nto nihaana wiixutta moota woopaka eyo. (Musome Esalimo 34:12.) Enamuna emosa nikhanle ahu oowiixutta omuttittimiha Yehova ori owehaka soopattuxiwa. Nto okathi ninweha ahu “itthu opanke awe”, eyo piiyo, soopattuxiwa, ninniwerya waasuwela ankhili awe, owerya wawe ni ophenta wuulupale Yehova onnooniherya awe. Nto eyo ennincererya omphenta wahu ni omuttittimiha wahu yena. (aRom. 1:20) Murokora mmosa oniitthaniwa Adrienne ohimmye so: “Okathi kinweha aka itthu sootheene Yehova opanke awe ni osuwela wuulupale orina awe, eyo ennikikupaliha wiira Yehova onnisuwela itthu sinkiphwanyiha mureerelo. Nto okhala wiira yena mpattuxa aka, exeeni yaarowa okiiriha opaka etthu yaarowa ohonona ompatthani aka ni yena? Tthiri koolakela ohipaka etthu yaarowa ohonona ompatthani aka ni Yehova”. Munoonela sai wiivaha okathi esumana ela wiira muupuwelele soopattuxiwa sa Yehova? Opaka eyo enimookhaliheryani wuncererya omuttittimiha ni omphenta wanyu Yehova. — Esal. 111:2, 3.

7. Mavekelo anrowa oniixuttiha sai omuttittimiha aahiiso omoova Yehova?

⁷ Enamuna ekina enrowa oniixuttiha omuttittimiha aahiiso omoova Yehova, ori onvekela khula okathi. Khula okathi ninvekela ahu, ninniwerya omusuwela saana Yehova. Nave okathi nninvekela ahu Yehova ikuru wiira niwerye ovilela, eyo enninikhaliherya wuupuwela wiira yena okhalana owerya wuulupale. Nave-tho, okathi nimmuxukhurela ahu Yehova mwaha wa mukuttho wowoopola wa Mwanawe, eyo enninuupuxerya wiira yena onniniphenta vanceene. Okathi sinniphwanya aya mixankiho nnamuxonttela Yehova wiira onikhaliherye oxintta, eyo enninuupuxerya wiira yena ta ankhili. Mavekelo siisa annincererya omuttittimiha wahu Yehova ni annilipiha yoolakela ahu ya ohipaka etthu enrowa ohonona ompatthani ahu ni yena.

8. Nihaana opaka exeeni wiira nihihiye omuttittimiha Yehova?

⁸ Wiira nihihiye omuttittimiha Yehova nihaana omusomaka Biibiliya niphavelaka wiixutta etthu ni matakiheryo ooloka ni oohiloka. Vano ninrowa othokorerya matakiheryo a arumeyi a  Yehova anli. Oopacerya, Obadiya aaweherya empa ya mwene Akhabi ni a nenli, namukuttho muulupale Yehoyada. Nuumala-vo, nnoothokorerya ntakiheryo na mwene Yowasi a oYuda, yoowo aapaka itthu sooloka nuumala okhalihiwa mwene masi muhoolo mwaya khuhiya omurumeela Yehova.

9. Moota xeeni omuttittimiha Yehova waamukhalihenrye awe Obadiya? (1 Mamwene 18:3, 12.)

⁹ Ekwaha yoopacerya Biibiliya onimulavula awe Obadiya, b owo onihimya so: “Obadiya aanimoova vanceene Yehova”. (Mmusome 1 Mamwene 18:3, 12, Biibiliya a Elapo Esya.) Moota xeeni omoova Yehova waamukhalihenrya aya Obadiya? Waahimukhaliherya maana Obadiya aari mutthu ororomeleya. Nto ti nthowa naya mwene Akhabi amuthanlale awe wiira oweheryeke empa awe. (Neh. 7:2) Nave omuttittimiha Muluku waahimwiiriha Obadiya okhala oolipa murima. Moohaanyiherya, Obadiya anireerela okhala oolipa murima. Mwaha wa xeeni? Mwaha woowi, mwene aalamulela okathi ole aari Akhabi. Biibiliya onihimya wiira Akhabi “aari ootepa otakhala vamaithoni va Yehova waavikana mamwene ootheene aaranttenle awe”. (1 Mam. 16:30, NWT.) Ohiya-vo, mwaarawe Akhabi iitthaniwa Yezabeli aamukokhorela Bayali. Yezabeli aanimunyokha vanceene Yehova, nto mwaha waivaavo owo aahimananiha vanceene oomala-maliha okokhorela weekeekhai wa mahimo muloko a wisarayeli. Nave owo aahiwiiva maprofeta manceene a Yehova. (1 Mam. 18:4) Moohaanyiherya, okathi ole Obadiya aamukokhorela awe Yehova waari wooxankiha.

10. Olipa murima waamwiirinhe Obadiya opaka exeeni?

¹⁰ Olipa murima waamwiirinhe Obadiya opaka exeeni? Okathi Yezabeli awiivakasa awe maprofeta a Muluku, moolipa murima Obadiya aahiwiipithiha maprofeta 100 a Yehova, ‘ekrupu ya 50 khula nikhuku, aavahaka ephaawu ni maasi’. (1 Mam. 18:13, 14, NWT.) Masi vaakhanle wiira Yezabeli aahisuwela eyo, moohaanyiherya Obadiya aamwiiviwa. Nto Obadiya anoova okhala wiira owo khaaphavela okhwa. Masi omphenta wawe Yehova ni ale yaamurumeela, waahimwiiriha oleva okumi awe wiira aakhaliherye.

11. Olelo-va, arumeyi a Yehova ammutakiha sai Obadiya? (Nwehe efootu.)

 ¹¹ Olelo-va, arumeyi anceene a Yehova anikhala ilapo muteko ahu onikhoottihiwa aya ni kuvernu. Nto amutakihaka Obadiya, anna ni arokora awo khanihiya waattittimiha makhulupale. Nave khanihiya onvaha Yehova ele eniphwanela awe, eyo piiyo, omukokhorela yena paahi! (Math. 22:21) Awo annooniherya wiira annimuttittimiha wala annimoova Muluku, amwiiwelelaka yena ohiya apinaatamu. (Mit 5:29) Nave awo khanihiya olaleerya ni annipaka mithukumano moohisuweliwa. (Math. 10:16, 28) Ohiya-vo, anniimananiha wiira yaakhaliherye anna ni arokora okhalana iliivuru sinaakhaliherya olipiha ompatthani aya ni Yehova. Nrowe niwehe ntakiheryo na munna mmosa oniitthaniwa Henri, yoowo onikhala elapo ya wÁfrica, muteko ahu onikhoottihiwa aya. Owo aahiivahererya wiira aavaheke iliivuru anna ni arokora anikhala elapo eyo. Owo ohimmye so: “Okhala wene miyo ka mutthu oowoova, masi mwaha woomuttittimiha Yehova vanceene wookikhaliherya okhala mutthu oolipa murima”. Ntoko Henri, niireke nyuwo munoowerya okhala oolipa murima? Moohaanyiherya, akhala wiira munoomuttittimiha aka Yehova mwa enamuna yooloka nyuwo munoowerya.

12. Yehoyada ni mwaarawe yoonihenrye sai wiira yaanimuroromela Yehova?

¹² Muulupale aanamukuttho Yehoyada, aanimoova vanceene Yehova. Nto mwaha waivaavo eyo yaahimukhaliherya okhala ororomeleya ni waakiherya okokhorela weekeekhai. Eyo yaahooneya okathi mwaana a Yezabeli, iitthaniwa Ataliya aapacenrye awe olamulela oYuda ohirina ediretu. Atthu anceene yaanimoova Ataliya maana owo aari mutthu ootakhala murima ni oohiphiyeriwa. Nave okathi aari awe pwiyamwene, aahiphavela owiiva axisulu awe wiira ohaakhiwe opwiyamwene! (2 Wah. 22:10, 11) Masi musulu awe mmosa, yoowo iitthaniwa Yowasi aahiwerya woopowa maana mwaara awe Yehoyada, Yehoxabathi aahimwiipithiha. Yehoyada vamosa ni mwaarawe yaahimwiipithiha mmiravo ole ni yaahimukhapelela. Mwaha waivaavo, Yehoyada ni Yehoxabathi yaahikhaliherya ni okhapelela nloko na Davidi nenlo naakhuma aya mamwene. Tthiri, Yehoyada aahooniherya ororomeleya wa Yehova ni khoovale opaka etthu yooloka. — Mir. 29:25.

13. Yehoyada oonihenrye-tho sai ororomeleya wa Yehova okathi Yowasi aarina awe iyaakha 7?

¹³ Ekwaha ekina Yehoyada oonihenrye awe olipa murima wa Yehova, okathi yoole Yowasi aarina awe iyaakha 7. Owo aahimwiiriha Yowasi yoowo aakhuma nloko na Davidi okhala mwene. Vaakhanle wiira Yehoyada khaamukhalinhe mwene, owo aamwiiviwa. Masi okhaliheriwaka ni Yehova itthu sootheene aaphavela awe saahikhumela saana. Okhaliheriwaka ni alevi ni ahooleli akina, Yehoyada aahiwerya omukhaliha mwene Yowasi ni aahiruma wiiviwa pwiyamwene Ataliya. (2 Wah. 23:1-5, 11, 12, 15; 24:1) Nto Yehoyada “aahimwiiriha mwene ni atthu opaka nivarihano ni Yehova, wiira atthu awo yaarowa okhalaka atthu a Yehova”. (2 Mam. 11:17, NWT.) “Nave-tho aahapweha makwarta vamukhora va empa ya Yehova, wiira ahimuhiye okelaka nnakhala mutthu mmosa aarina mwiikho”. — 2 Wah. 23:19, NWT.

14. Yehoyada aatthuveliwe sai mwaha woomuttittimiha Yehova?

¹⁴ Yehova aahimmye so: “Kinrowa waattittimihaka ale ankittittimiha”. Eyo ti enamuna aamuthokorenrye awe Yehoyada. (1 Sam. 2:30) Mwa ntakiheryo, owo aahiruma olempwa yoowiiraneya ya Yehoyada mbiibiliyani wiira niweryeke wiixutta etthu ni ntakiheryo nawe. (aRom. 15:4) Nave okathi Yehoyada aakhwiiya awe owo aahivithiwa “epooma ya Davidi  vamosa ni mamwene, okhala wiira aahipaka itthu sooreera wIsarayeli omuttittimihaka Muluku eekeekhai ni empa ya Muluku”. — 2 Wah. 24:15, 16.

15. Exeeni nikhanle ahu oowiixutta ni yoowiiraneya ya Yehoyada? (Nwehe efootu.)

¹⁵ Yoowiiraneya ya Yehoyada pooti onikhaliherya wuncererya omuttittimiha wahu Yehova. Nave axitokweene anoowerya omutakiha Yehoyada aphavelasaka inamuna sa moota wookhapelela muloko. (Mit. 20:28) Anna oowuuluvala anoowerya omutakiha Yehoyada, vakhala wiira anoomuttittimihaka Yehova ni ahihiyaka okhala ororomeleya wa yena. Nave Yehova pooti waarumeela wiira omalelihe itthu siniphavela awe. Owo khonikhala-khala oninyanyalaka. Nave amiravo anoowerya omutakiha Yehova yaattittimihaka anna oowuuluvala, ntoko Yehova aamuttittiminhe awe Yehoyada. Otepexa wene anna oowuuluvala apacenrye omurumeela Yehova okhuma khalai. (Mir. 16:31) Nto ootheene ahu nnoowerya wiixutta etthu ni ntakiheryo na alevi ni ahooleli akina yaamukhalihenrye Yehoyada. Nihaana waakhaliherya moororomeleya ‘ale annihoolela’ niwiiwelelaka. — aHeeb. 13:17.

16. Exeeni enooniherya wiira Yowasi khaamuttittimiha Yehova ni murima awe wootheene?

¹⁶ Yehoyada aahimukhaliherya mwene Yowasi okhala mutthu ooreera murima. (2 Mam. 12:2) Ti maana aya okathi Yowasi aari awe mmiravo, aaniphavela omusiveliha Yehova. Masi nuumala Yehoyada okhwa, Yowasi aahihapuxiwa ni makhulupale yahaamwiiwelela Yehova. Mwaha waivaavo, owo aahipacerya “orumeela miri saakokhoreliwa  ni ilatarato”. (2 Wah. 24:4, 17, 18) Nto Yehova aahiriipiwa murima vanceene. Masi “anaaruma maprofeta eriyari aya wiira aattikiherye wa Yehova . . . masi awo yaanikhootta waawiriyana”. Nave awo khiyaaphavenle onwiriyana Zakariya yoowo aari mwaana a Yehoyada, mmusi awe Yowasi nave aari profeta ni namukuttho a Yehova. Nave vaakhanle wiira Yowasi khaakhapeleliwe ni anamuyari awe Zakariya aamwiiviwa. Masi Yowasi khuupuwenle eyo owo ahooniherya ohixukhuru ni aahiruma wiiviwa Zakariya. — 2 Wah. 22:11; 24:19-22.

17. Exeeni yaamwiiranenle Yowasi mwaha woohimuttittimiha Yehova?

¹⁷ Yowasi khaamuttittimiha Yehova mwa enamuna yooloka, nto mwaha waivaavo saahimukhumelela itthu sinceene soohiloka. Yehova aahimmye wiira: “Ale ahinkittittimiha khanrowa ottittimihiwaka”. (1 Sam. 2:30) Nnaamwi Yowasi aarina “anakhotto anceene” owo aahixinttiwa ni anakhotto vakhaani a wAsiria ni ‘aahivulalihiwa vanceene’. Masi asiria khiyaamwiivale, nto arumeyi awe ti yaamwiivale muhoolo mwaya mwaha woomwiiva Zakariya. Owo aahithokoreriwa okhala ootakhala ni khaavithiwe “mahiye yaavithiwa aya mamwene”. — 2 Wah. 24:23-25.

18. Moovarihana ni Yeremiya 17:7, 8, exeeni nikhanle ahu oopaka wiira nihimutakihe Yowasi?

¹⁸ Ntakiheryo na Yowasi ninniixuttiha exeeni? Mwiri ohirina mitathaari soolipa ohaana weemexeriwa etthu wiira ohimore. Vakhala wiira owo khoneemexeriwa etthu, mwiri owo onoomora okathi wa epheyo. Eyo ti etthu yaamwiiranenle Yowasi. Wanipacerya, Yowasi aahikhaliheriwa ni Yehoyada, nuumala Yehoyada okhwa owo aahihapuxiwa ni anamavirikanya. Nto mwaha waivaavo, owo aahihiya okhala ororomeleya ni waataana wawe ni Yehova waahimala-mala. Yoowiiraneya ela, ennooniherya wiira nihimwiiweleleke Yehova mwaha woowi amusi ahu aahiiso anna akina mmulokoni, annooniherya mikhalelo sooloka ni annintumererya opaka eyo. Nto naaphavelaka wiira waataana wahu ni Yehova okhale woolipa, nihaana wuncererya omphenta wahu ni omuttittimiha wahu Yehova, nimusomaka Biibiliya, wuupuwelela ni ovekela. — Mmusome Yeremiya 17:7, 8; aKol. 2:6, 7.

19. Exeeni Yehova onnivekela awe opaka?

¹⁹ Vekeekhai etthu Yehova ennivekela awe opaka khahiyo yoovila. Etthu xeeni Yehova ennivekela awe? Musuweli 12:13, onihimya so: “Mmuttittimihe Muluku n’umova mwìweleleke soruma sawe. Mutthu òpattuxeriwe weiwo”. Vakhala wiira nnoomuttittimihaka Yehova, nnooweryaka oxintta sooweha ni mixankiho sinrowa onikhumelela muhoolo, ntoko iirale awe Obadiya ni Yehoyada. Niira siiso khiivo etthu nnakhala mutthu onrowa owerya ohonona waataana wahu ni Yehova.