MWAHA WA VAKAAPANI | NIIREKE MUNNEEMYA YOOVAHA YUULUPALEXA YA MULUKU?
Munrowa Wooniherya Sai Wira Munnixukhurela Yoovaha Yuulupalexa ya Muluku?
“Ophenta wa Kristu t’onkikhanyereriha . . . Kristu ohakhwela atthu othene, wira ale ari akumi ehìkhalele mmansaya, nto emukhaleleke ole àkhwenle ni àhihimuwenle yawo”.
YOOVAHA ELA yuulupalexa ehaana onikhanyererya wooniherya oxukhurela wahu. Yesu aahiiwanyeiha eyo nuumala waapenuxa alopwana muloko yaarina eretta yoohiirya yahaasuweliwa murette aya okathi ole. Mmosa a yaawo, “ahihokolowela ottuli, àninvuwiha Muluku ni nsu nulupale”. Yesu aakonhe so: “Miyo nkavoninhe atthu mulukó? Akina athanu n’axexe ahanle vai?” (Luka 17:12-17) Eyo enniixuttiha exeeni? Hiyo waakuva oliyala itthu sooloka siniireliwa ahu ni atthu akina!
Khiivo yoovaha enilikana ni yowoopola. Yowoopola ti yoovaha yuulupalexa ekhanle. Vano munrowa wooniherya sai wira munnixukhurela ele Muluku epanke awe?
-
Mmusuwele Namavaha. Yowoopola eyo khenaaphwanyiha ekumi yoohimala atthu mahala ene. Yesu aahimmye so okathi aavekela awe wa Muluku: “Vano, ekumi yohimala t’ila: wosuwelani nyuwo, mukhanle Muluku mmosáru èkekhai, n’omusuwela Yesu Kristu, yowo omurummyanyu”. (Yohani 17:3) Vaakhanle wira moohimeeriwa wira ookhala mutthu ooponle ekumi anyu muryeene mwaana, niireke nyuwo khimwaarowa ophavela omusuwela mutthu owo owooponleni? Yehova Muluku, yoowo ovanhe yowoopola, khoniphavela wira mmusuwele paahi, masi oniphavela-tho wira mwaataane ni yena. Biibiliya onnitumererya so: “Mmwattameleke Muluku; Muluku onowattamelani”.
—Yakobo 4:8. -
Mooniherye waamini yowoopola. “Ole onimwamini Mwana, òkhalana ekumi yohimala”. (Yohani 3:36) Anitaphulela exeeni masu oowi waamini? Eyo enitaphulela miteko sinooniherya wira mutthu owo onnaamini mukuttho wa Yesu. (Yakobo 2:17) Miteko xeeni? Yoovaha ennikhala yawinyu nuumala nyuwo wookola ntata ni waakhelela. Nto nyuwo munitthuneya wookola ntata wira mwaakhelele yowoopola. Moota xeeni? Mwiixutte mweettelo onimusivela Muluku, nto mutthareke yoowo. * Munvekeleke Muluku wira olevelele itampi sanyu ni woovahani yowuupuxerya ya murima yooloka. Mmwaattameleke Muluku muroromelaka wira yowoopola enookumiherya murettele, ovareleleya ni mmaaleleyo wa atthu otheene anaamini yoovaha eyo!
—aHéberi 11:1. -
Murowe mwawiriyane muthukumano wa Wuupuwelela Okhwa wa Yesu. Yesu aahikumiherya muthukumano wa khula mwaakha onnuupuxerya yowoopola. Olavulaka sa enamuna ya opaka muthukumano owo, aalavunle so: “Mwireke iya, mukupuwelaka miyo”. (Luka 22:19) Anamoona a Yehova anrowa wuupuwelela okhwa wa Yesu Namanli, 11 a Abril 2017, nuumala nsuwa okela. Eprograma eyo erina ewoora emosa, onrowa olavuliwa mwaha onitthokiherya yootaphulela ya okhwa wa Yesu ni mireerelo sinikumiherya aya nenna-va ni muhoolo. Mwaisana, atthu oowiiraka imilyau 20 olumwenku wotheene yaahithukumana wira awiriyane muthukumano owo. Moohakalala hiyo ninnoolattulani nyuwo wira mwarwe mooniherye oxukhurela wanyu yoovaha yuulupalexa ya Muluku.
^ etti. 7 Enamuna yuulupale ya omusuwela Muluku ni omwaattamela ti osoma Nuulumo nawe, Biibiliya. Mwaavekele Anamoona a Yehova wira yookhaliheryeni osuwela enamuna yoopaka eyo, mukele esaiti eni www.pr418.com/vmw.
You May Also Like
ONISUWELA
Wuupuwelela Okhwa wa Yesu
Anamoona a Yehova annoolattulani orowa Wuupuwelela Okhwa wa Yesu onrowa okhala 12 a Abril a 2025.
MEMORIAL
Wuupuwelela Okhwa wa Yesu
Moohakalala ninnoolattulani wiira mwakhale ni hiyo nihiku nno na vaamekhaya. Nyuwo munimwiixutta moota okumi ni okhwa wa Yesu onrowa aya woophwanyihani mureerelo.
