Soovaha sikina sinnikhalana efaita yuulupale vakhala wira nivahiwe ni mukhulupale oosuwelexiwa wala mutthu onimphenta ahu vanceenexa. Sookhala sikina, nnaamwi sihithummwaka musurukhu munceene sinivahiwa efaita yuulupale, okhala wira sivahiwe ni mmusi oophentiwa wala mpatthani oororomeleya. Eyo ti yaakhumelenle ni yowiiraneya ya Russell yoowo anvahe etthu Jordan, oniromoliwa muru ovinre. Eyo enivarihana sai ni yoovaha ya yowoopola?

Yoopacerya: Biibiliya onnihimya wira Muluku “òmuruma Mwan’awe mmosene orwa vathí-va, wira hiyo nikhalane ekumi mwa yowo”. (1 Yohani 4:9) Eyo enniiriha yoovaha eyo okhala ya efaita. Khuuvo-tho mukina orina okhulupale onvikana Muluku. Olavulaka sa owo, nasalimo muHeeberi aalempe so: “Nsina nanyu ti Yehova, nyuwo paahi ti mukhanle a Vasuluxa a elapo yotheene”. (Esalimo 83:18, Tradução do Novo Mundo) Tthiri mulipa onivanhe yowoopola muulupalexa!

Yanenli: Muluku “Tith’ihu.” (Yesaya 63:16) Moota xeeni? Owo tonivanhe ekumi. Ohiya-vo, owo onninikhapelela khula okathi ntoko siniira awe tiithi oophenta ni anaawe. Olavulaka ni atthu awe a khalai yiireliwa aIsarayeli, Muluku aakonhe so: “Atthu a Isarayeli khahiyó an’aka òphenteya? . . . Kinnìniwa murima n’uphenta mwaha wa nyuwo, kinniwonelani othunku”. (Yeremiya 31:20) Muluku oniwoonela siiso arumeyi awe olelo-va. Owo khahiyo mPattuxa ahu oowerya paahi, masi owo Tiithi ahu oororomeleya ni Mpatthani ahu. Khamunoona wira eyo enniiriha khula etthu ennivaha awe okhalana efaita yuulupalexa?

Sihaavo soovaha sirina efaita yuulupale okhala wira ole ovanhe khokhanyereriwe, masi ovanhe mwaha wa niphento na ekeekhai. Namavaha ooreera murima khonivaha owehereryaka oliviwa.

Muluku oonivaha Mwanawe mwaha wa oniphenta wawe. Biibiliya onihimya so: “Mota Muluku ònihenryawe oniphenta wawe t’ula: Owo òmuruma Mwan’awe mmosene orwa vathí-va”. Nthowa exeeni? “Wira hiyo nikhalane ekumi mwa yowo”. (1 Yohani 4:9) Niireke Muluku aarookhanyereriwa opaka eyo? Nnaari! ‘Yowoopola ya Yesu Kristu’ yowooniherya ya ‘orera murima’ wa Muluku.—aRoma 3:24.

Moota xeeni yoovaha ya Muluku enooniherya aya oreera wawe murima? Biibiliya onitthokiherya so: “Vano Muluku ònithonyerya khuluwi oniphenta wawe; tthiri Kristu ònikhwela hiyo, varyahu nlelo anatampi”. (aRoma 5:8) Oreera murima ni ophenta wa Muluku waahimwiiriha waakhaliherya apinaatamu oohilipa, yahaarina nlipelelo ni oottheka. Hiyo khinaareerela niphento nlo, hata khanniwerya omuliva Muluku. Yoovaha eyo ti niphento nuulupalexa nitonko wooniheriwa valaponi.

Soovaha sikina sinnikhalana efaita yuulupale okhala wira ole ovanhe ooleva itthu sinceene. Okathi yoole mutthu onileva awe etthu yaavaha awe efaita yuulupale onanivaha hiyo, nto ninnitepa oxukhurela yoovaha eyo mwaha wa wiimananiha opanke awe.

Muluku oonivaha “Mwan’awe mmosene”. (Yohani 3:16) Owo khonivanhe mutthu pure amphenta awe. Okathi wotheene Muluku waapattuxa awe olumwenku, Yesu aavara muteko ni yoowo nto khukhala ole ‘amusiveliha’. (Miruku 8:30) Mwaana Muluku “onimphentexawe” ti Yesu, ni owo “eruku ya Muluku ohinòneya”. (aKolosi 1:13-15) Khanakhale-tho atthu oowiiraana waavikana awo anli.

Tthiri, Muluku “khanronyihenrye Mwan’awe”. (aRoma 8:32) Yehova oonivaha ele yaarina awe yoolokexa. Khiivo-tho ekina enivanhe awe enivikana eyo.

Soovaha sikina sinnikhalana efaita okhala wira sinnimphwanyiha ole onivahiwa etthu yahaarina awe wala yaamuthowa. Mwa ntakiheryo, mwaarowa woonela sai vaakhanle wira ookhala mutthu othumme murette, openunxe eretta yaarowa owiivani, ahaawerya anyu othuma? Tthiri yoovaha eyo yaarowa okhala yuulupalexa, ehiniphimeya!

“Ntoko atthu othene sinkhwaya mw’Adamu, siso-tho othene anokhalihiwa-tho akumi mwa Kristu”. (1 aKorinto 15:22) Okhala wira hiyo na osuulu wa Adamu, otheene ahu “ninnookhwa”, khanniwerya wiixoopola iretta ni okhwa wala khanniwerya otthikela wataana ni Muluku ni ohikhalana mulattu ohoolo wawe. Ntoko apinaatamu oohimalela, khanniwerya wiikhaliha akumi wala onvaha “ekumi” mutthu mukina. Biibiliya onihimya so: “Nto khavo onwerya wisòpola n’isisapo”, khaavo oniwerya omuliva Muluku wira iixoopole. “Tthirí ekumi khinliveliwa ni musurukhu”. (Esalimo 49:8, 9) Tthiri hiyo naatthuneya okhaliheriwa okhala wira khinaawerya wiixoopola. Nahaakhaliheriwe, naahimala-mala.

Mwaha wa ophenta wawe wuulupale, Yehova aahiivahererya oliva “murette” ole waatthuneya wira nipenuwe, nto omurumaka Yesu ‘nookhalihiwa akumi’. Moota xeeni yowoopola eniiriha aya eyo oweryaneya? “Vano ephome ya Yesu, Mwan’awe Muluku, enninreriha, ettipihaka sottheka sahu sothene”. Tthiri waamini ephome ya Yesu emwarexiwe, onnitthukula  ephiro wira nileveleliwe itampi wira niphwanye ekumi ehinimala. (1 Yohani 1:7; 5:13) Vano yowoopola eyo enrowa waakhaliherya sai ale anaaphenta ahu akhwiiye? “Ntoko okhwa sirwiyaya mwaha wa mutthu mmosá; siso-tho ohihimuwa w’alipaòkhwa orwiye mwaha wa mutthu mmosá [Yesu]”.—1 aKorinto 15:21. *

Tthiri, khiivo yoovaha etonko ovahiwa ni namavaha muulupalexa, oneettihiwa ni niphento, ovikana yowoopola ya Yesu. Khuuvo mutthu otonko onivaha etthu yuulupalexa ovikana ele Yehova Muluku enivanhe awe. Khiivo-tho yoovaha enniphwanyiha mireerelo suulupale ovikana ele ennoopola etampi ni okhwa. Aayo, khiivo tthiri yoovaha enivikana yowoopola.