1-2. Moolumo a Yehova ari Yesaya 65:16, 17, annikhaliherya sai ohihiya ovilela?

“MUHIKHULUMUWE!”. Ola waari muru wa konkresu a 2017. Konkresu ole, naahiixutta moota nikhanle ahu oovilela hata nirina ene mixankiho sinceene. Okhuma okathi nimpanke ahu konkresu ole, soovira iyaakha 4. Masi hiyo nlelo naakumi ni khaninhiya ovilela mixankiho sinkhumelela olumwenku ola wootakhala.

² Nkahaya muupuwele mixankiho nvilenle anyu okathi vakhaani ovinre. Woonasa wene mookhweliwa mmusi wala mpatthani anyu mwamphenta anyu vanceene. Nave pooti wira mookhalana oretta ohinivoniwa. Ohiya-vo, pooti wira nyuwo munnixanka mwaha woowi muhuuluvala. Niireke ehookhumelelani ehasara ya ephattu, otakhala wala olupatthiwa? Niireke munnihaawa mwaha wa iretta sinikhumelela ntoko koronaviiru wala COVID-19? Tthiri ninnilipelela nihiku mixankiho iyo sotheene sinrowa aya ovira, ninrowa ahu oliyala ni ohitthikela oweha mixankiho iyo siiraneyaka!—Mmusome Yesaya 65:16, 17.

3. Etthu xeeni ninreerela ahu opaka niinaano-va ni mwaha wa xeeni?

³ Olumwenku ola wootakhala onnixankiha okhala. Nave muhoolo nnookhalana mixankiho sinceene ni suulupale. (Math. 24:21) Tthiri vannooneya wira nihaana ohihiya olipiha ovilela wahu. Mwaha wa xeeni? Mwaha woowi Yesu aahimmye wira: “Vakhala wira munoovilela mpakha wookiseryani, munimoopola ikumi sanyu”. (Luka 21:19) Wuupuwela moota atthu akina avilenle aya mixankiho ntoko sawihu onoonikhaliherya ovilela.

4. Etthu xeeni enniiriha ohimya wira Yehova ntakiheryo nooloka na ovilela?

⁴ Tani ori ntakiheryo noolokexa na ovilela? Ti Yehova Muluku. Niireke eyo ennootikinihani? Olumwenku ola onilamuleliwa ni Diabo ni woosareya mixankiho. Yehova ookhalana owerya woomaliha mixankiho sotheene. Masi hata vari siiso, owo onnilipelela ophiya nihiku nooreerela wira omalihe mixankiho. (aRom. 9:22) Nto olipelelaka ophiya nihiku nno, Muluku khonihiya ovilela. Nrowe niwehe itthu 9 Yehova onivilela awe.

5. Okhuma khalai, mwa enamuna xeeni nsina na Muluku ninveehiwa aya? Nyuwo munoonela sai?

⁵ Oveehiwa nsina nawe. Yehova onniphenta vanceene nsina nawe ni oniphavela wira atthu otheene attittimiheke. (Yes. 42:8) Masi mwa iyaakha 6.000 sivinre, nsina nawe nooloka ninniveehiwa vanceene. (Esal. 74:10, 18, 23) Oveehiwa wa nsina na Yehova waapacenrye exardim ya wEdeni vaavo Diabo (nuulumo nintaphulela “Nawoothe”) aamoothenrye awe Muluku wira khaavaha Adamu ni Eva itthu saarowa waaphwanyiha ohakalala wekeekhai. (Maph. 3:1-5) Okhuma okathi ole, Yehova onnootheriwa wira khonaavaha apinaatamu itthu aniphavelexa aya. Nto Yesu aanixanka vanceene vaavo aaweha awe nsina nooloka na Tiithi awe niveehiwaka. Eyo ti etthu yaamwiirinhe owiixuttiha atthareli awe ovekela ariki: “Tiithi ihu muri wiirimu, nsina nanyu nitteelihiwe”.—Math. 6:9.

6. Xeeni Yehova onihiya awe oviraka okathi munceene ohiphunke mwaha ole wa ovaanyihiwa okhulupale awe?

⁶ Ovaanyihiwa wa okhulupale awe. Yehova ookhalana ehakhi ya olamulela wiirimu ni valaponi nave onnisuwela enamuna yoolokexa ya olamulela. (Wiis. 4:11) Masi Diabo, ohaawoka apinaatamu ni malaikha makina owiirihaka wuupuwela wira Muluku khorina ehakhi ya olamulela. Wanvira okathi munceene wira ophukiwe mwaha ole wa ehakhi ya Muluku ya olamulela ni wooniherya wira Yehova tori namalamulela oolokexa. Tthiri waahaana ovira okathi munceene, wira apinaatamu yoone wira khanikhala-khala akhumelaka saana vaavo aniilamulela aya ahikhaliheriwaka ni Mpattuxa. (Yer. 10:23) Muluku ohooniherya wira ookhalana ankhili mwaha wa ohiya okathi owo oviraka. Nto mwaha wa ovilela wa Muluku, owo onoophuka muxankiho owo moomalela. Okathi owo, khuuvo mutthu onrowa waanyiheryaka wira Muluku ookhalana ehakhi ya olamulela wiirimu ni valaponi. Nave atthu otheene anoosuwela wira olamulela wa Yehova tori woolokexa ni Omwene awe tonrowa oruuha murettele ni ovareleleya wekeekhai.

7. Tani ahimwiiwelenle Yehova ni onrowa owiiriha exeeni?

⁷ Ohiiweleliwa ni anaawe akina. Yehova aahipattuxa malaikha ni apinaatamu oomalela. Nuumala-vo, mwanawe mmosa oomunepani Satana (nuulumo nintaphulela “Nwanani”) aahiwiiriha apinaatamu oopacerya Adamu ni Eva ohimwiiwelela Yehova. Nave malaikha makina ni apinaatamu yaahitakaahana ni Satana ahimwiiwelelaka Yehova. (Yuda 6) Muhoolo mwaya, atthu akina a nloko na Isarayeli yaawo yaari atthu oothanliwa ni Muluku yaahimukhootta Yehova ni yaahipacerya waakokhorela amuluku eethiru. (Yes. 63:8, 10) Tthiri atthu ale yaahimunyoonyiha vanceene Yehova. Masi hata vari siiso, Yehova onnivilela muxankiho owo mpakha olelo-va olipelelaka nihiku onrowa awe waapwetexa atthu otheene ahinimwiiwelela. Nto eyo enimwaahakalaliha vanceene atthu otheene anithanla ororomeleya wa Yehova yaawo anivilela itthu sootakhala sinikumiheriwa ni olumwenku ola!

8-9. Itthu xeeni Yehova onootheriwa awe? Nto nihaana opaka exeeni?

⁸ Wootha wa Satana Diabo. Satana aahimootherya Yobi ni apinaatamu akina oororomeleya wira animukokhorela Muluku mwaha wa itthu sooloka onaavaha awe. (Yobi 1:8-11; 2:3-5) Mpakha olelo-va, Satana khohiiye owootherya apinaatamu. (Wiis. 12:10) Nto nihaana opaka mpantta ahu wira nooniherye wira Satana nawoothe. Nnoopaka eyo, nivilelaka mixankiho sotheene sinniphwanya, niroromeleyaka wa Yehova ni nooniheryaka wira ninnimukokhorela mwaha wa omphenta. Yehova aahimureeliha vanceene Yobi mwaha wa ovilela wawe. Nto akhala wira nnootthara ntakiheryo na ovilela wa Yobi, Yehova onoonireeliha.—Yak. 5:11.

⁹ Satana onnaarumeela ahooleli a etiini yoowootha wira amootheryeke Yehova wira tonikumiherya ohaawa wotheene wa apinaatamu. Mwa  ntakiheryo, vaavo mwaana onikhwa awe, ahooleli akina a itiini anihimya wira Yehova tomukunxe wira akhale nlaikha wiirimu. Tthiri awo anninveeha Muluku! Hiyo ninnisuwela oratteene wira Yehova, Muluku oophenta. Vaavo ninwereiwa ahu wala onikhwa awe mutthu namphenta ahu, hiyo khanninvaha nthowa Muluku. Ohiya-vo, hiyo ninnikupali ni murima wotheene wira nnoophiya nihiku onrowa awe omaliha iretta ni okhwa. Nto nihaana waaleela atthu otheene aniphavela oniwiriyana wira Yehova Muluku oophenta. Niira siiso, nnoomukhaliherya Yehova omwaakhula ole oninveeha.—Mir.  27:11.

10. Esalimo 22:24, 25, enniixuttiha exeeni voohimya sa Yehova?

¹⁰ Mixankiho sinaaphwanya arumeyi awe. Yehova onniwoonela othunku arumeyi awe. Nto onninyokha ni onniriipiwa murima vaavo onaaweha awe arumeyi awe ahaawaka, alupatthiwaka awereiwaka ni awananaka mixankiho sinikumeheriwa mwaha wa ohimalela. (Musome Esalimo 22:24, 25.) Yehova onnoona mixankiho sahu ni onniphavela omaliha. Tthiri owo onrowa omaliha mixankiho iyo. (Mulikanyihe ni Okhuma 3:7, 8; Yesaya 63:9.) Nnoophiya nihiku Muluku onrowa awe ‘opuputtha maithori ahu otheene, khunrowa-tho okhala okhwa, nnakhala oriipiwa murima, wala wunla, hata woona owereya’.—Wiis. 21:4.

11. Yehova oniwoona sai arumeyi awe akhwiiye?

¹¹ Okhweliwa apatthani awe. Yehova onoonela sai vaavo anikhwa aya apatthani awe alopwana ni athiyana? Owo onniphavela otthikela waaweha ari ene akumi! (Yobi 14:15) Niireke munniwerya wuupuwela moota Yehova oninkheliwa awe mpatthani awe Abrahamu? (Yak. 2:23) Wala Moise yoowo aalavulana awe “ekhove n’ikhove”? (Okhum. 33:11) Nave Yehova ohinkheliwa omwiiwa Davidi ni anasaalimo akina yiipaka isipo sa onvuwiha ni omuttottopela. (Esal. 104:33) Nnaamwi apatthani awe awo akhwiiye ene, Yehova khaaliyanle. (Yes. 49:15) Owo onnuupuwela  mikhalelo saya sotheene ni omutthu aya. Tthiri Yehova “onniwoona otheene okhala akumi”. (Luka 20:38) Nnoophiya nihiku onrowa awe waahihimuxa ni owiiwa anvekelaka ni murima wotheene ni weemererya okokhorela waya. Akhala wira mookhweliwa mutthu mwamphenta anyu, wuupuwela itthu iyo sotheene pooti woomaalihani ni wookurunuxani murima.

12. Mahiku ala ookiserya, etthu xeeni enimuriipiha murima Yehova?

¹² Apinaatamu ootakhala murima annaahasula atthu akina. Nuumala ohiiweleliwa oxardim ya wEdeni, Yehova aanisuwela oratteene wira itthu saarowa otepaka oxankiha. Yehova onninyokha oweha olumwenku olelo-va osareyale ene otakhala ni ohixariya. Okathi wotheene, Yehova onnaathokorerya ale ahinimoona mutthu oowaakhaliherya ntoko atthu ale ampuheriwa, ikwaasuni ni anaamukhweli. (Zak. 7:9, 10) Olelo-va, Yehova onniriipiwa murima vaavo onaaweha awe arumeyi awe oororomeleya ahaaxiwaka ni atthukweliwaka mukhatteya. Mukupaliki ni murima wotheene wira Yehova onnoophentani ootheene anyu munivilela mmutakihaka Yehova.

13. Mukhalelo xeeni woowuuliha muru apinaatamu anooniherya aya? Muluku onrowa opaka exeeni?

¹³ Mweettelo woohiloka wa apinaatamu. Satana onnisuwela oratteene wira apinaatamu apattuxiwe alikanyihiwaka ni Muluku. Nto onnimusivela vaavo onaaweha awe arina ene mweettelo woohiloka. Vaavo Muluku oonale awe wira “vathí-va atthu yanvira etepaka otakhala murima” mahiku a Nowe, Yehova ‘aahittharuwa vapattuxalya awe atthu vathí-va’ ni aahiriipiwa murima vanceene. (Maph. 6:5, 6, 11) Niireke makhalelo valaponi aaloka? Nnakhala vakhaani! Satana onnihakalala vanceene vaavo onaaweha awe apinaatamu arina ene mweettelo woohiloka. Olelo-va, ohuulaana orupihana woohiloka ohela muhina orupihana alopwanaru wala athiyanaru! (aEef. 4:18, 19) Nave Satana onnitthapa vaavo onimwiiriha awe murumeyi a Yehova opaka etampi yuulupale. Masi opixa murima wa Yehova onoomala. Moohipisa owo onimooniherya wira onninyokha orupihana woohiloka vaavo onrowa awe waapwetexa atthu otheene anrupihana moohiloka ni anikhootta ottharuwa.

14. Apinaatamu aniiriha exeeni itthu Muluku opattunxe awe?

¹⁴ Ohononiwa itthu Muluku opattunxe awe. Muluku ohaavaha apinaatamu muritti wookhapelela itthu opattunxe awe. Masi ale arina owerya ‘annaapuherya’ akhwaaya ni annihonona elapo ni inama. (Mus. 8:9; Maph. 1:28) Masientista anihimya wira mwaha wa itthu apinaatamu anipaka aya, inamuna * emilyau emosa sa itthu sipattuxiwe sinoomala-mala valaponi iyaakha vakhaani sinirwa. Nto vannikhweya oweha etthu eniwiiriha atthu anceene oxanka mwaha wa makhalelo a elapo! Ninnihakalala osuwela wira Yehova ooleiherya ‘waapwetexa ale anihonona elapo’ ni onrowa wiiriha elapo yotheene okhala eparayiisu.—Wiis. 11:18; Yes. 35:1.

15-16. Etthu xeeni enniiriha ovilela ni Yehova? Nvahe nlikanyiho.

¹⁵ Nkahaya muupuwele mixankiho sotheene Tiithi ahu a wiirimu onivilela awe mwa iyaakha sinceene. (Nwehe ekaaxa eni: “ Itthu Yehova Onivilela Awe”.) Yehova anwerya opwetexa olumwenku ola wootakhala okathi oniphavela awe. Masi owo onnivilela. Nto ovilela wawe onniniphwanyiha mireerelo sinceene! Nkahaya muupuwele nlikanyiho nna: ‘Muupuwele wira anamathelana annilipelela omuyara mwanaya. Masi meetiku onnaaleela wira mwanaya onrowa oyariwa orina ene mixankiho sinceene sa okumi awe. Nave onnaaleela wira mwaana owo khonrowa okhala okathi munceene, onimookhwa. Masi okathi mwaana owo oniyariwa awe, anamuyari  awe annihakalala vanceene nnaamwi asuwelaka wira vanimwaaxankiha omukhapelela mwaana owo. Tthiri etthu enrowa owiiriha opaka eyo, okhala wira annimphenta mwanaya ni aniphavela opaka sotheene aniwerya aya wira mwanaya okhalane okumi woolokexa’.

¹⁶ Mwa enamuna emosaru, osuulu wotheene wa Adamu ni Eva oniyariwa ni etampi. Masi hata vari siiso, Yehova onninikhapelela moophenta. (1 Yoh. 4:19) Masi wookhala ovirikana wuulupale eriyari ya anamuyari a apinaatamu naalavunle ahu ni Yehova. Maana Yehova onoomaliha mixankiho sotheene ni oothanla nihiku onrowa awe omaliha mixankiho sotheene sinaahaaxa apinaatamu. (Math. 24:36) Tthiri ophenta wa Yehova tonniiriha ovilela okathi wotheene.

17. Ntakiheryo na Yesu niri aHeeberi 12: 2, 3, ninnikhaliherya sai ohihiya ovilela?

¹⁷ Yehova ntakiheryo noolokexa na ovilela. Nave Yesu aahitakiha moomalela ovilela wa Tiithi awe. Mwaha wooniphenta, okathi ari awe valaponi Yesu aahivilela oveehiwa, wuuliwa muru ni okhwa vamwirini va nihaaxeryo. (Mmusome aHeeberi 12:2, 3.) Tthiri ntakiheryo na ovilela wa Yehova naahinvaha ikuru Yesu wira ovilele. Nave ntakiheryo na Yehova pooti onivaha ikuru wira nivilele.

18. Moovarihana ni 2 Pedru 3:9, mireerelo xeeni sikhumelenle mwaha wa ovilela wa Yehova?

¹⁸ Mmusome 2 Pedru 3:9. Yehova onnisuwela okathi wooreerela onrowa awe opwetexa olumwenku ola wootakhala. Mwaha wa opixa murima wa Yehova, atthu anceene aakhalana eparakha ya omusuwela, omukokhorela ni onvuwiha. Awo annihakalala vanceene osuwela wira Yehova oovilela mwa okathi munceene mpakha awo oyariwa, wiixutta omphenta ni wiivahererya wa yena wira amurumeeleke. Muhoolo, Yehova onimooniherya oratteene wira ovilela wawe ohaakhaliherya atthu anceene vaavo onrowa awe waareeliha atthu imilyau sinceene yaawo anrowa ovilela mpakha wanikisa!

19. Otheene ahu nihaana ohihiya opaka exeeni ni ninrowa ophwanya exeeni?

¹⁹ Yehova ooniixuttiha moota woovilela moohakalala. Hata Satana okumihenrye ene mixankiho sinceene, Yehova khonihiya okhala “Muluku oohakalala”. (1 Tim. 1:11) Hiyo nave, ninnilipelela nihiku Yehova onrowa awe otteeliha nsina nawe, waakiherya ehakhi awe ya olamulela, omaliha otakhala ni mixankiho sotheene sinikhumelela valaponi. Nto nilipelelaka ophiya nihiku nno, nihihiye ohakalala. Nave nihihiye ovilela nimutakihaka Tiithi ahu a wiirimu yoowo onivilela. Akhala wira nnoopaka eyo, otheene ahu, nnimoona wira moolumo ari Yakobo 1:12 teekeekhai, yaawo anihimya wira: “Mutthu onivilela eehereriwaka, onnihakalala, mwaha woowi awerya ovilela yoweeha eyo, onimwaakhela etthuvo ya okumi, Yehova aaleihenrye awe ale ahinihiya omphenta”.