1. Etthu xeeni Yehova oopankenlyaaweni?

NWENRYE sai okhala Namoona a Yehova? Wanipacerya nyuwo mwaahiiwa “ihapari sooreera”. Woonasa wene, mwaaleeliwe ni anamuyari anyu, ole mwaasomana anyu oxikola wala mwaavarana anyu muteko aahiiso mwaaroolaleeriwa okathi Anamoona a Yehova yaalaleerya aya empa ni empa. (Mar. 13:10) Nuumala-vo, aahikhala mutthu iimananinhe ni aavirinhe okathi munceene oosomihakani Biibiliya. Nto yoosoma eyo ehookhaliheryani omphenta Yehova ni muhiixutta wira Yehova onnoophentani vanceene. Tthiri Yehova ohoosuwelihani ekeekhai. Vano mwa mutthareli eekeekhai a Yesu Kristu ni mookhalana nlipelelo na okhala mahiku otheene. (Yoh. 6:44) Yehova aahimuruma mutthu owiixuttihani ekeekhai ni ooweemereryani okhala murumeyi awe. Tthiri nyuwo munnixukhurela vanceene mwaha wa ele Yehova opanke awe.

2. Mwaha ola, ninrowa othokorerya exeeni?

² Vano niixuntte ahu ekeekhai, nookhalana eparakha ya waakhaliherya atthu akina weetta ni hiyo ephiro eniphwanyiha okumi woohimala. Pooti wira vanninikhweela olaleerya empa ni empa. Masi pooti onixankiha opaceriha ni wiiriha soosoma sa Biibiliya. Niireke eyo enniwiiraneelani? Akhala wira ti siiso, malakiheryo a yoosoma ela animookhaliheryani vanceene. Yoosoma ela, nnooweha etthu enniiriha olaleerya. Nave nnooweha moota wooxintta mixankiho saarowa onikhoottiherya wiiriha soosoma sa Biibiliya. Masi wanipacerya, nrowe niwehe xeeni vari aya vooloka ohiya paahi olaleerya, masi-tho owiixuttiha atthu ihapari sooreera.

3. Etthu xeeni enniiriha olaleerya?

³ Okathi Yesu aari awe valaponi, aahaavaha atthareli awe miteko miili. Woopacerya, Yesu aahaaleela atthareli awe wira yaahaana  olaleya ihapari sooreera sa Omwene ni aahiwooniherya moota woovara muteko owo. (Math. 10:7; Luka 8:1) Nave, Yesu aahaaleela etthu yoopaka akhala wira atthu awo anneemererya wala khaneemererya muhupi wa Omwene yaarowa aya olaleyaka. (Luka 9:2-5) Yesu aahihimya vahinatthi wira awiixutti awe yaamwaalaleerya atthu anceene ni yaamulaleerya mapuro manceene vaavo aahimmye awe wira: “Ihapari iya sooreera sa Omwene sinoolaleiwa elapo yotheene”. (Math. 24:14; Mit. 1:8) Moohicikha akhala wira atthu yaamweemererya wala nnaari, awiixutti a Yesu yaahaana waalaleerya atthu awo Omwene wa Muluku mpakha muteko woolaleerya omala.

4. Moovarihana ni Matheyo 28:18-20, etthu xeeni ninreerela ahu opaka ohiya paahi olaleya Omwene?

⁴ Muteko xeeni wa nenli Yesu aarumme awe atthareli awe ovara? Yesu aahaaleela atthareli awe wira yaahaana owiixuttiha atthu weettela itthu sotheene onrumme awe. Niireke muteko ola woolaleerya ni owiixuttiha atthu waarowa ovariwaka paahi ni maKristau a eseekulu yoopacerya ntoko atthu akina anihimya aya? Nnaari. Ntoko Yesu oonihenrye awe, muteko owo wanvariwaka mpakha olelo-va, niire so, “mpakha olumwenku ola omala”. (Mmusome Matheyo 28:18-20.) Woonasa wene, Yesu aavanhe yooruma ela, okathi aakhumelenle awe awiixutti awe 500. (1 aKor. 15:6) Yowoonihiwa aamonihenrye awe Yohani, Yesu aahooniherya oratteene wira atthareli awe ahaana waakhaliherya atthu akina wiixutta itthu voohimya sa Yehova.—Wiis. 22:17.

5. Nlikanyiho na Paulo nri 1 aKorinto 3:6-9, nnooniherya sai wira muteko woolaleerya ni wiixuttiha onnivarihana?

⁵ Murummwa Paulo, aahilikanyiha muteko wowaapaka awiixutti ni waala. Owo aahittittimiherya wira nihaana opaka itthu sikina ohiya paahi waala ipyo. Nave aahiwuupuxerya anna a muloko wa oKorinto wira: “Miyo kaahaala, vano Apolo aahikhuwari . . . Nyuwo mwa ematta ya Muluku, yeeyo onilima awe”. (Mmusome 1 aKorinto 3:6-9.) Hiyo na anamuteko a “ematta ya Muluku”. Nto ninnaala ipyo vaavo ninlaleerya ahu. Vaavo ninwiixuttiha ahu atthu, ninnikhuwari ipyo iyo naalale ahu. (Yoh. 4:35) Masi nihaana osuwela wira Muluku toniiriha wunnuwa ipyo naalale ahu.

6. Vaavo ninwiixuttiha ahu atthu nihaana waakhaliherya opaka exeeni?

⁶ Vaavo ninlaleerya ahu, hiyo nnaaphavela ‘ale aarina murima wooloka wira yaakhele okumi woohimala’. (Mit. 13:48) Nto wira akhale awiixutti a Yesu, nihaana waakhaliherya (1) wiiwexexa, (2) weemererya ni (3) weettela ele aniixutta aya mBiibiliyani. (Yoh. 17:3; aKol. 2:6, 7; 1 aTes. 2:13) Atthu otheene mmulokoni anoowerya waakhaliherya anaxikola a Biibiliya. Anoopaka eyo, yaaphentaka ni owaakhela saana vaavo anrowela aya mithukumano. (Yoh. 13:35) Ale animusomiha mutthu Biibiliya, ahaana orumeela okathi ni ikuru saya wira amukhaliherye naxikola aya a Biibiliya ‘opwexakasa’ soolema ni sookupali soohiloka sihinivarihana ni Biibiliya. (2 aKor. 10:4, 5) Pooti ovira myeeri sinceene wira nimukhaliherye mutthu opaka marukunuxo mookumini mwawe mpakha opatisiwa. Masi wiimananiha iwo, onnikumiherya mireerelo sinceene.

7. Etthu xeeni enniiriha wiirela mpantta muteko woolaleerya ni waapaka awiixutti?

⁷ Etthu xeeni enniiriha okhaliherya muteko woolaleerya ni waapaka awiixutti? Yoopacerya, mwaha woowi ninnimphenta Yehova. Vaavo nyuwo muniimananiha anyu wiiwelela yooruma ya olaleerya ni waapaka awiixutti, munnooniherya wira munnimphenta Muluku. (1 Yoh. 5:3) Nkahaya muupuwele ela: Omphenta wanyu Yehova, ohookhaliheryani olaleerya empa ni empa. Niireke vahookhweelani opaka eyo? Woonasa wene nnaari. Niireke munnuupuwela ekwaha yoopacerya mwaaronwe anyu olaleerya empa ni empa? Woonasa wene, nyuwo mwaahixanka wala mwaanoova! Nyuwo muhiixutta wira Yesu tonirumme orowa olaleerya, nto nyuwo munniiwelela  yooruma eyo. Woonasa wene, vaavo okathi waavira aya wanookhweelani olaleerya. Masi ankhi voohimya sa wiiriha soosoma sa Biibiliya? Niireke munnixanka vaavo munuupuwela anyu wiiriha soosoma sa Biibiliya? Akhala wira ti siiso, munvekeleke Yehova wira ookhaliheryeni oxintta oxanka wanyu. Mwiira siiso, Yehova onimoovahani olipa murima ni onimookhaliheryani ophavela waapaka awiixutti.

8. Moovarihana ni Marko 6:34, etthu xeeni ekina enniiriha owiixuttiha atthu ekeekhai?

⁸ Etthu ya nenli enniiriha olaleerya ni wiixuttiha ekeekhai, okhala wira ninnaaphenta atthu. Okathi omosa, Yesu ni awiixutti awe yaahikhulumuwa mwaha woowi yaahiviriha nihiku notheene alaleeryaka. Nto yaaniphavelasa opuro wira aphumurye. Masi muttitthi muulupale wa atthu waahaaphwanya. Yesu aahiwoonela othunku, nto aahipacerya owiixuttiha “itthu sinceene” atthu ale. (Mmusome Marko 6:34.) Tthiri okathi ole, Yesu aahaana wiimananiha vanceene, maana aahikhulumuwa. Masi xeeni Yesu iimananinhe awe vanceene? Mwaha woowi aaniihela nipuro na atthu ale. Nave Yesu aahoona wira atthu ale yaanihaawa ni yaaniphavela okhalana nlipelelo. Nto wuupuwela itthu iyo saahimwiiriha Yesu ophavela waakhaliherya. Etthu emosaru, enniiraneya ni atthu anceene olelo-va. Okathi mukina, pooti okhalaka ntoko wira atthu awo annihakalala ni aakhalana okumi wooloka, masi itthu iyo sihikhala-khale soowokakani. Maana atthu awo ari ntoko ipwittipwitthi sirimenle, sihirina nlipelelo ni sihirina makampusi. Murummwa Paulo aahimmye wira atthu ntoko awo khanimusuwela Muluku ni kharina nlipelelo. (aEef. 2:12) Nave aneetta ‘estaraata yuulupale eniroiha wookhwaani’! (Math. 7:13) Vaavo nnuupuwela ahu mukhalelo woohiloka wa omunepani wa atthu anikhala muttetthe ahu, ophenta ni othunku onniniiriha waakhaliherya. Enamuna yuulupalexa nikhanle ahu oowaakhaliherya, ori waavaha yoosoma ya Biibiliya.

9. Moovarihana ni aFilipi 2:13, Yehova onrowa wookhaliheryani sai?

⁹ Nyuwo munnisuwela wira wiiriha soosoma sa Biibiliya, onitthuneya okathi ni wiimananiha vanceene. Woonasa wene vaavo munuupuwela anyu eyo, nyuwo munnixanka. Akhala wira ti siiso, mmuleele Yehova moonelo anyu. Munvekele wira ookhaliheryeni omphwanya ni owerya omusomiha mutthu Biibiliya. (Mmusome aFilipi 2:13.) Murummwa Yohani oonilipiherya wira Muluku onimwaakhula mavekelo ahu anivarihana ni ele oniphavela awe. (1 Yoh. 5:14, 15) Nto mukupaliki ni murima wotheene wira Yehova onimookhaliheryani oovahakani ophavela wiirela mpantta muteko woolaleerya ni waapaka awiixutti.

10-11. Etthu xeeni woonasa wene, ekhanle oowookhottiheryani wiiriha soosoma sa Biibiliya?

¹⁰ Hiyo ninniluttuweliwa ovara muteko wowaapaka awiixutti Yesu onivanhe awe. Masi okathi mukina, hiyo ninnikumana mixankiho seiyo sinnikhoottiherya ovara muteko wowaapaka awiixutti ntoko naaphavela ahu. Nrowe niwehe mixankiho iyo ni ele nikhanle ahu oopaka wira nixintte.

¹¹ Makhalelo ahu pooti onikhoottiherya ovara ntoko naaphavela ahu. Mwa ntakiheryo, anamalaleerya akina toowuuluvala ni anniwereyasiwa. Niireke nyuwo mookhalana mixankiho iyo? Akhala wira ti siiso, muupuweleke itthu niixuntte ahu okathi wa eretta ya koronaviiru, COVID-19. Nihoona wira vanniweryaneya wiiriha yoosoma ya Biibiliya nimurumeelaka telefoni wala ikaruma sikina eletroniko! Nto nyuwo pooti opaceriha ni wiiriha soosoma sa Biibiliya muri ene owaani. Nave sookhala mireerelo sikina sinikhumelela. Mwaha woowi, atthu akina anniphavela omusoma Biibiliya ni hiyo, masi awo khanikhala owaani okathi anna ni arokora anilaleerya aya empa ni empa. Niireke mwaamwiivahererya wira mwaasomihe atthu awo? Nyuwo pooti waasomiha atthu vaavo anikhalana aya okathi  voosiisu wala ohiyu. Niireke nyuwo munnuupuwela yowiiraneya ya Nikodemo? Owo aahirowa olavula ni Yesu ohiyu, nto Yesu aahimwiixuttiha okathi ene yoole Nikodemo aaphavela awe.—Yoh. 3:1, 2.

12. Itthu xeeni sinrowa wookupalihani wira munoowerya waasomiha atthu Biibiliya?

¹² Wuupuwelaka wira khaninrowa owerya wiiriha yoosoma ya Biibiliya. Woonasa wene, nyuwo munuupuwela wira muhaana wuncererya osuwela wanyu muhinatthi opacerya omusomiha mutthu Biibiliya. Nrowe niwehe itthu tthaaru sinrowa wookhaliheryani okupali wira nyuwo munoowerya omusomiha mutthu Biibiliya. Yoopacerya, Yehova ohoona wira munoowerya waasomiha atthu akina. (2 aKor. 3:5) Ya nenli, Yesu yoowo ‘ovahiwe okhulupale wotheene wiirimu ni vathi-va’, toorummeni owiixuttiha atthu. (Math. 28:18) Ya neeraru, muroromeleke okhaliheriwa ni atthu akina. Yehova aahimwiixuttiha Yesu itthu sinceene aarowa awe olavula. Nto Yesu aaniroromela itthu iyo iixuttihiwe awe ni Yehova. Nyuwo nave muhaana opaka etthu emosaru. (Yoh. 8:28; 12:49) Nave nyuwo pooti onvekela muhooleli a ekrupu anyu yoolaleerya, pioneero wala namalaleerya orina sookumanana sinceene wira ookhaliheryeni moota woopaceriha ni wiiriha soosoma sa Biibiliya. Etthu ekina enrowa wookhaliheryani ori waahoola anna awo arina sookumanana sinceene okathi anrowa aya wiiriha soosoma saya sa Biibiliya wira nweheke moota aniiriha aya.

13. Xeeni vari aya vooloka olimalela inamuna isya?

¹³ Pooti woona ovila olimalela inamuna ni ikaruma isya. Mahiku ala, enamuna nniiriha ahu soosoma sa Biibiliya yooturukeya. Vano ekaruma ninrumeela ahu wira naasomihe atthu Biibiliya, eliivuru Okumi Woohimala!. Nave enamuna ya wiilokiherya ni wiiriha yoosoma ya Biibiliya yoovirikana vanceene ni enamuna naarumeela ahu khalai. Vano ninsoma ittima vakhaani paahi, ni ninnihalana okathi munceene wira nivaanele ni naxikola ahu a Biibiliya. Vaavo ninwiixuttiha ahu atthu, ninnirumeela iviidiyu sinceene ni ikaruma eletroniko ntoko JW Library^®. Akhala wira khamunsuwela orumeela oratteene ikaruma iyo, munvekele munna wira owiixuttiheni. Hiyo apinaatamu onisivela opaka itthu ntoko nilimalenle ahu. Nto khivanikhweya opaka itthu mwa enamuna ekina wala ya niinaano. Masi nikhaliheriwaka ni Yehova ni atthu akina, vanoonikhweela olimalela marukunuxo awo ni onisivela waasomiha atthu Biibiliya. Ntoko ohimmye awe pioneero mmosa, enamuna ela esya ya wiiriha soosoma sa Biibiliya, “ennimuhakalaliha naxikola ni ole onimusomiha Biibiliya”.

14. Akhala wira ninlaleerya muttetthe wooxankiha, nihaana ohiliyala exeeni? 1 aKorinto 3:6, 7, onnilipiha sai?

¹⁴ Akhala wira munikhala muttetthe vanivila aya opaceriha soosoma sa Biibiliya. Woonasa wene, atthu akina khaniphavela muhupi ninlaleya ahu wala anninlupattha mwaha woolaleerya. Etthu xeeni enrowa onikhaliherya ohihiya okhalana moonelo wooloka vaavo ninlaleerya ahu muttetthe atthu ahiniphavela aya oniwiriyana? Muupuweleke wira makhalelo a atthu anniturukeya moowaakuveya. Nto hata atthu yaale khalai yahaaphavela oniwiriyana, awo pooti woonaka wira ahaana olakiheriwa ni omusuwela Muluku. (Math. 5:3) Atthu akina khalai yaakhootta iliivuru sahu, muhoolo mwaya aheemererya osomihiwa Biibiliya. Nave ninnisuwela wira Yehova tori mwaneene ematta. (Math. 9:38) Yehova oniphavela wira nihihiye waala ni okhuwari. Nto owo tonrowa wiiriha wunnuwa. (1 aKor. 3:6, 7) Akhala wira mpakha-va khamuniiriha yoosoma ya Biibiliya, muhiliyale ela: Yehova onoonitthuvela mwaha wa wiimananiha wahu ohiya mwaha wa itthu ninkumiherya ahu! *

15. Yehova onoonela sai vaavo mutthu oneemererya awe omusoma Biibiliya ni oneettela ele oniixutta awe?

¹⁵ Yehova onnihakalala vaavo mutthu oneemererya awe ekeekhai ya mBiibiliyani ni onaaleela awe atthu akina ekeekhai eyo. (Mir.  23:15, 16) Tthiri ohakalala wa Yehova onnincerereya vaavo oniweha awe itthu sinikhumelela olelo-va! Mwa ntakiheryo, nnaamwi waakhumelenle oretta wa olumwenku wotheene wa koronaviiru, mwaakha wa muteko wa 2020 saahiirihiwa soosoma sa Biibiliya 7.705.765. Nave atthu 241.994 yaahipatisiwa kukhala Anamoona a Yehova. Awiixutti awo a niinaano anrowa waasomihaka Biibiliya atthu akina ni waapaka awiixutti asya. (Luka 6:40) Moohaanyiherya, Yehova onnihakalala vanceene vaavo onniweha awe nivaraka muteko wowaapaka awiixutti.

16. Yoolakela xeeni khula mmosa a hiyo onireerela awe okhalana?

¹⁶ Vanitthuneya wiimananiha wira naapake awiixutti. Masi nikhaliheriwaka ni Yehova, nnoowerya owiixuttiha atthu omphenta Tiithi ahu a wiirimu. Munoonela sai okhalana yoolakela ya okhalana ni wiiriha yoosoma ya Biibiliya hata ekhalaka emosa? Akhala wira khula mutthu nnimphwanya ahu ninninvekela omusoma Biibiliya ni hiyo, nnoohakalala vanceene waaweha atthu anceene yeemereryaka. Nikupaliki ni murima wotheene wira Yehova onooreeliha wiimananiha wahu.

17. Ninrowa woonela sai akhala wira nnookhalana yoosoma ya Biibiliya?

¹⁷ Eparakha yuulupale waalaleerya ni owiixuttiha atthu ekeekhai! Muteko owo onniniphwanyiha ohakalala wekeekhai. Murummwa Paulo aahaakhaliherya atthu a oTesaloonika okhala awiixutti a Yesu. Owo aahihimya moonelo awe vaavo alempe awe so: “Taani anrowa okhala nlipelelo nahu, otteeliwa wahu murima ni etthuvo ahu? Kiira ti nyuwo? Mweekeekhai, nyuwo ti mukhanle ovuwa wahu ni otteeliwa wahu murima”. (1 aTes. 2:19, 20; Mit. 17:1-4) Anna ni arokora anceene olelo-va, arina moonelo mmosaru ntoko wa murummwa Paulo. Murokora oniihaniwa Stéphanie ni iyawe ahaakhaliherya atthu anceene wiixutta ekeekhai mpakha opatisiwa. Murokora Stéphanie onihimya so: “Khiivo etthu enniphwanyiha ohakalala ovikana waakhaliherya atthu akina wiivahererya wa Yehova”.