Eprofesia 4. Ophenta wa Atthu Anceene Wanvukuwa

“Atthu anceene . . . khanrowa waaphentaka atthu a etthoko aya.”—2 TIMOOTHEYO 3:​1-3, God’s Word Bible.

● Chris oniirela mpantta ekrupu ya atthu anaakhaliherya ale anihasuliwa vatthokoni vaya, oNorte wa Elapo ya oGales. Chris onihimya so: “Kinnimuupuwela muthiyana mmosa aanihaavya. Owo khaareere omaniwa mpakha miyo ohiwerya omusuwela nnaamwi kaatonko onweha. Athiyana anceene annixanka vanceene mpakha ohiwerya woowehani”.

ITTHU SINCEENE SINOONIHERYA EXEENI? Elapo emosa ya wÁfrica, eriyari ya athiyana 3 muthiyana mmosa ootoko orupihiwa ori ene mwaana. Yootokosa emosa yaapakiwe elapo emosaru, yaahooniherya wira alopwana anceene annikupali wira khahiyo vootakhala waamana axaaraya. Masi khahiyo athiyana paahi tanihasuliwa vatthokoni. Elapo ya oCanadá, eriyari ya alopwana 10 alopwana araru aatoko omaniwa wala ohasuliwa mwa enamuna ekina ni axaaraya.

ATTHU AKINA ANIHIMYA EXEENI? Okhuma khalai atthu yaanihasulana vatthokoni. Olelo-va atthu awo annitepa othokorerya mwaha owo ovikana khalai.

NIIREKE ITTHU IYO ANIHIMYA AYA TI SEKEEKHAI? Ekeekhai wira iyaakha iya sookiserya mwaha owo wa ohasuliwa atthu vatthokoni onnithokoreriwa vanceene. Niireke eyo ennivukula ohasuliwa atthu vatthokoni? Nnakhala vakhaani. Olelo-va atthu anootepa ohiphentana.

NYUWO MUNOONELA SAI? Niireke anniiraneya moolumo ari 2 Timootheyo 3:1-3? Khamunikupali wira atthu khaniphentana vatthokoni ntoko vaareerela aya?

Eprofesia ya neethanu eniiraneya enivarihana ni elapo. Nwehe ele Biibiliya onihimya awe sa mwaha owo.

[Eponto yuulupale epaaxina 7]

“Ohasulana vatthokoni ekrime enitepa olaleiwa olumwenku wotheene. Vanooneya wira athiyana akina annimaniwa ikwaha 35 ni axiiyeya ahinatthi waaleela mapoliisia”.—PORTA-VOZ DA LINHA DE ATENDIMENTO A VÍTIMAS DE ABUSO DOMÉSTICO DO PAÍS DE GALES