MMWAATTAMELE MULUKU

Owo Onnisariha Mirima Sahu Vanceene

Niireke Yehova onninthokorerya tthiri, wala khonoona othunku voohimya sa mixankiho sa apinaatamu valaponi? Biibiliya onnaakhula nikoho nlo mwa enamuna enihakalaliha murima ahu. Tthiri, Muluku onnaathokorerya apinaatamu otheene, ni oniphavela wira hiyo nikhaleke oohakalala. Khula nihiku owo onniweemererya apinaatamu, hata yaale ahinimuxukhuru wira attottele mureerelo oreera wawe murima vanceene. Muthokorerye masu a murummwa Paulo.​—Musome Miteko 14:16, 17.

Olavulaka ni atthu a epooma ya oListra yaawo yahaamurumeela Muluku, Paulo aahimmye so; “Mahiku avinre okhuma khalayi, Muluku ahatthuniherya atthu othene otthara iphiro saya. Arimwiraru siso, ahiwoniherya mahiku othene orera wawe murima, awirelaka sorera: tthirí osulu oryawe, onnorupihelani epula, onnovahani sohepha okathi aya, onnoruwerihani solya, onnosarihani otteliwa murima”. Nto yaataphulelani masu awo wa atthu ale yanwiriyana Paulo?

Atthu a oListra yanwerya wiiwexexa mowaakuveya ele Paulo aahimya awe. Atthu ale yaari alipa oolima ni yaakhala mapuro ooruwerya ni mittetthe sooriirya saavira maasi. Masi, ntoko Paulo aawuupuxenrye awe, Muluku tonikumiherya epula ni okathi wa sohepha. Veekeekhai, khuta okathi wooreerela awo yaanihepha mihokorokho sa mmatta sooloka ni olya eyoolya yoosiva. Tthiri awo yaanittottela mureerelo oreera murima wa Muluku.

Masu a Paulo wa atthu oListra anniniixuttiha itthu sinceene sootthuneya voohimya sa Yehova Muluku.

Yehova onninivaha mukhalelo wa othanla mootaphuwa. Moone wira Yehova aaheemya wira amalapo ‘atthare iphiro saya’. Eliivuru emosa ya anamataphulela a Biibiliya enihimya wira moolumo ala pooti otaphulela so: “Opaka itthu saatthuna aya” wala “opaka itthu suupuwela aya okhala sooloka”. Yehova khonimukhanyererya mutthu omurumeela. Owo oonivaha mukhalelo wa othanla mootaphuwa, eyo piiyo, owerya wa othanla ele eniphavela ahu opaka mookumini mwahu.​—Otumererya 30:19.

Yehova oniphavela wira hiyo nimusuwele. Murummwa Paulo aahitthokiherya wira Muluku “ahiwoniherya mahiku othene orera wawe murima”. Eliivuru ele eromoliwe wanipacerya, enihimya wira efrase ela pooti otaphuleliwa-tho so: “Owo owooniherya atthu oratteene muthinto xeeni Muluku oryaawe”. Tthiri itthu Muluku sipattuxale awe, sinnivaha onamoona voohimya sa “makhalelo [awe] ahinóneya”, ohela muhina oreera wawe murima, miruku, owerya, ni ophenta. (aRoma 1:20) Yehova ohooniherya itthu sinci voohimya sa owo omurumeelaka Biibiliya. (2 Timótheyo 3:16, 17) Niireke itthu iyo khasinooniherya wira owo oniphavela wira nimusuwele?

Yehova oniphavela wira hiyo nikhaleke oohakalala. Paulo aahimyale wira: Muluku ‘onnoruwerihani solya, [ni] onnosarihani otteliwa murima’. Hata anamattheka ahinimusuwela Yehova anniwerya olya eyoolya wira atteelihe murima aya ni ophwanya ohakalala mookumini mwaya. Masi, Muluku oniphavela wira hiyo niphwanye ohakalala wekeekhai ni opuha woohimala. Eyo enooweryaneya akhala wira hiyo nnimwiixutta ekeekhai voohimya sa Muluku ni ovarihela muteko mookumini mwahu.​—Esalimo 144:15; Matheyo 5:3.

Otheene ahu ninnittottela mureerelo oreera murima wa Muluku khuta nihiku. Xeeni muhiniixutta anyu itthu sikina voohimya sa moota woomuxukhurela Muluku yoowo onoovahani soolya, ni itthu sikina ‘sinitteliha murima’ anyu?

Malakiheryo a omusoma Biibiliya Julyo

Miteko 11-28

[Eponto yuulupale ya epaaxina 11]

Khula nihiku owo onniweemererya apinaatamu, hata yaale ahinimuxukhuru wira attottele mureerelo oreera wawe murima vanceene.