ITTHU SINIKUMIHERYA OHAKALALA VATTHOKONI

Wiiriha Ekasamento ya Nenli Okhumela Saana

HERMAN: * “Mwaaraka oopacerya, aahikhwa mwaha wa oretta wa kanser, nuuvira iyaakha 34 nithelanne ene. Nuumala omuthela Linda, owo uupuwela wira kaamakela omulikanyiha ni amwaaraka oopacerya. Etthu yaatepiha, okhala wira apatthani aka a khalai, yaamakela olavula sa mikhalelo sooloka sa amwaaraka a khalai; nto eyo yaanimunyoonyiha Linda”.

LINDA: “Nuumala otheliwa ni Herman, kaanoona wira aiyaka khiyaakithokorerya ntoko amwaaraya oopacerya. Mwaaraya oopacerya yaanimphenta vanceene, omulavula saana, ni onvaha efaita vanci. Ikwaha sikina kaaniikoha akhala wira Herman aarowa okiphentaka ntoko aaphenta awe amwaarawe oopacerya.”

Herman ni Linda annihakalala mwaha woophwanyana. Linda, yoowo omwalanne ni iyawe oopacerya, onnimwiitthana Herman okhala ole onimphenta awe a vamurimani. Masi, ntoko sinisuwela aya anamathelana ala, ekasamento ya nenli yookhalana mixankiho seiyo sihitonko okhumelela ekasamento yoopacerya. *

Akhala wira moothela wala mootheliwa vasya, nyuwo munoonela sai ekasamento anyu ya nenli? Muthiyana mmosa oniitthaniwa Tamara, yoowo otheliwe vasya, nuuvira iyaakha 3 omwalanne ene ni iyawe, onihimya so: “Mukwaha woopacerya munithela anyu wala otheliwa, nyuwo pooti wuupuwela wira ekasamento anyu ti ya mahiku otheene. Masi okathi wa ekasamento ya nenli, nyuwo khamunuupuwela siiso; maana munnisuwela wira ekasamento anyu yoopacerya yoomala”.

Masi, anamathelana anceene, aaphwanya ohakalala wuulupale nuumala othelana vasya. Awo aawerya wiiriha ekasamento aya okhala yoohakalala, nto nyuwo-tho munoowerya! Moota xeeni? Nrowe niwehe  mixankiho 3 sinimakela okhumelela, ni moota malakiheryo a Biibiliya aniwerya aya okhaliherya. *

MUXANKIHO 1: WIIMANANIHA WIRA EKASAMENTO ANYU YOOPACERYA EHIVUKULE OHAKALALA WA EKASAMENTO ANYU ESYA.

Ellen, yoowo onikhala wAfrika do Sul, onihimya so: “Nkiniwerya oliyala itthu saakiiranenle wa ekasamento aka yoopacerya, vanceenexa okathi yoole kinivira aka mapuro yaale kaavira aka ni aiyaka oopacerya okathi wa ifeeriya. Ikwaha sikina, masi moohilakela miyo kinnimulikanyiha iyaka a niinano ni iyaka a khalai”. Mwa mpantta mukina, akhala wira ole muthelanne anyu ootoko othela wala otheliwa, nyuwo pooti ohisiveliwa akhala wira owo onimakela olavula sa ekasamento yoopacerya.

MALAKIHERYO: Mweemererye wira khivaniweryaneya nyuwo wala ole othelanne anyu oliyala mowaakuveya ekasamento yoopacerya, vanceenexa akhala wira ekasamento eyo yaari ya iyaakha sinci. Tthiri, atthu akina anihimya wira moohilakela aatoko omwiitthanela ole athelanne aya, nsina na iyaya wala mwaaraya oopacerya! Nto munrowa opaka exeeni okathi wa mixankiho ntoko iyo? Biibiliya oniira so: “Mmananiheke wiiwexexana mukina ni mukhwaawe”.​—1 Pedru 3:8, New Century Version.

Muhikhoottiheke oromoliwa wotheene wa ekasamento yoopacerya. Akhala wira ole othelanne anyu onnoona otthuneya olavula sa ekasamento awe yoopacerya, munwiriyane mooreerela ni mwa othunku. Nave-tho, muhaakuve ohimya wira owo onimoolikanyihani ni ekasamento awe yoopacerya. Lino onihimya so: “Mwaaraka Katarina khotonko wuupuwela wira olavula sa amwaaraka oopacerya ori ntoko malavi. Masi, Katarina onnoona eyo okhala ntoko enamuna ya okisuwela moota siri aka olelo”. Nave-tho, ovaanela iyo pooti wookhaliheryani okhala oowaataana saana ni ole muthelanne anyu niinano.

Mphaveleke osuwela mikhalelo sooloka ni sa vameekhaaya sa ole othelanne anyu vano. Ekeekhai wira iyanyu wala mwaarinyu pooti ohikhalana mikhalelo sikina aarina awe ole aathelanne anyu khalai. Masi owo, pooti okhalana mikhalelo sikina soolokexa. Tivonto, mulipiheke wataana wanyu nuule othelanne anyu, ‘muhimulikanyihaka n’atthu akina’. Muupuweleleke ni nvaheke efaita ele enoosivelani sa iyanyu wala mwaarinyu. (aGalasia 6:4) Edmundo, yoowo othenle ikwaha piili, onnitthokiherya mwaha ola oriki so: “Okhala wira khaavo apatthani anli oolikanasa, nto khiivo ikasamento piili soolikanasa”.

Munrowa owerya sai wuupuwelela saana itthu sa ekasamento anyu yoopacerya vamosa ni okumi wa ole othelanne anyu niinano? Jaime onihimya so: “Miyo kaahimuleela mwaaraka wira ekasamento aka yoopacerya eri ntoko eliivuru yooreera elempwale ni amwaaraka oopacerya ni miyo. Okathi mukina miyo pooti otthukula ni osoma eliivuru eyo ni wuupuwelela itthu sooloka saaniiranenle. Masi okumi aka vano khokhanle muliivuruni-mmo. Tthiri, mwaaraka musya tori ntoko eliivuru enilepa ahu nenna-va. Eyo tenikihakalaliha vanci”.

MWEERERYE ELA: Mmukohe iyanyu wala mwaarinyu akhala wira onninyoonyiheya okathi munilavula anyu sa ekasamento anyu yoopacerya. Musuwele okathi ohinreerela aya olavula sa ekasamento anyu yoopacerya.

MUXANKIHO 2: WIIMANANIHA WIRA NVAANELE NI APATTHANI A KHALAI YAAWO AHINISUWELIWA SAANA NUULE OTHELANNE ANYU NIINANO.

Javier, yoowo aavirinhe iyaakha 6 omwalanne ene ni amwaarawe onihimya so: “Mwa okathi vakhaani nuumala othelana, mwaaraka aanoona wira apatthani aka akina yaanimutokosa mukhalelo awe”. Mulopwana mukina oothela oniihaniwa Leo aahikumana muxankiho mmosaru. Owo onihimya so: “Miyo kiryeene ni mwaaraka, atthu akina yaanimuleela wira yaanimphenta vanceene ni onvaha efaita iyawe a khalai!”

MALAKIHERYO: Mweererye osuwela muupuwelo wa apatthani anyu. Lino, oromoliwe woopaceryani oni: “Kinoona wira apatthani a khalai okathi mukina annoona okhala voowereya ni vooxankiha opatthana ni mutthu yoowo amusuwenle aya niinano”. Nto ‘mukhaleke òrera murima n’atthu othene’. (Tito 3:2) Muhiye okathi wira apatthani ni amusi anyu alokiherye makhalelo aya. Okhala wira ekasamento anyu yooturukeya, nto apatthani anyu anirowa orukunuxa makhalelo aya. Javier, oromoliwe woopaceryani onihimya so: “Ekeekhai wira miyo ni mwaaraka, okathi mukina ninaaphavela apatthani ahu a khalai. “Masi, ntoko anamathelana asya, hiyo ninnimananiha waapaka apatthani a niinano, nto eyo enninikhaliherya vanci”.

 Mmuthokoreryeke ole othelanne anyu vaavo munivaanela anyu ni apatthani a khalai. Mwa ntakiheryo, waakhumelela ovaanela voohimya sa ekasamento anyu yoopacerya, mukhale a miruku ni wuupuwelela saana, wira iyanyu wala mwaarinyu, ohuupuwele wira khonithokoreriwa. Biibiliya onihimya so: “Akhala wira mutthu onoolavula etthu ohuupuwenle, nto moolumo awo pooti ovulaliha ntoko ekatana. Masi mutthu a miruku onnikhalana ephoole ni itthu sinihimya awe”.—Miruku 12:18, Holy Bible—Easy-to-Read Version.

MWEERERYE ELA: Mmananihe osuwela vahinatthi okathi wala itthu saarowa omunyoonyiha ole othelanne anyu. Nto ohinatthi ophiya okathi owo, nvaanele wa moota woothokorerya makoho wala ikomentaario sa apatthani anyu voohimya sa ekasamento anyu yoopacerya.

MUXANKIHO 3: WIIMANANIHA WIRA MMUROROMELE OLE OTHELANNE ANYU VANO, MAANA IYANYU WALA MWAARINYU OOPACERYA KHOONIHENRYE OROROMELEYA.

André, yoowo ohiiwale ni amwaarawe onihimya so: “Khalai miyo kaanoova wira kaamurowa-tho omwalaniwa”. Muhoolo, aahimuthela muthiyana mukina, Rita. “Miyo kaamakela wiikoha akhala wira kanwerya okhala ntoko iyawe Rita oopacerya. Nto kaanoova wira Rita aamukihiya wira otheliwe ni mulopwana mukina uupuwelaka wira miyo nkamphenta vanceene”.

MALAKIHERYO: Nvaaneleke mootaphuwa nuule othelanne anyu, voohimya sa ele enooxankihani. Biibiliya oni: “Mwahikoheru miruku, munimojela miteko sanyu”. (Miruku 15:22) Ovaanela mwa miruku, woomukhaliherya André ni Rita okhala oororomelana. André onihimya so: “Miyo koomuleela mwaaraka wira nkinikhala-khala kimwalanaka nuuwo moophavela otthyawa mixankiho. Nto Rita ookilipiherya etthu emosaru. Nto vakhaani-vakhaani kaahipacerya omuroromelaka mwaaraka ni murima wotheene”.

Akhala wira iyanyu wala mwaarinyu a vano oroomwalaniwa ekasamento awe yoopacerya, mwiimananihe wooniherya wira nyuwo mwa mutthu oororomeleya. Mwa ntakiheryo, Michel ni Sofia, yaawo amwalanne ni ale yaathelanne aya woopaceryani, aavarihana ohimeeryana akhala wira aalavulana ni ale yaathelanne aya khalai. Sofia onihimya so: “Opaka eyo woonikhaliherya okhala oororomelana ni oohakalala”.​—aÉfeso 4:25.

MWEERERYE ELA: Muhele mikano voohimya sa ovaanela nuule aathelanne anyu, ohela muhina ovaanela mutelefonini, wala orweela mwa Internet.

Ikasamento sinci sa nenli sookhumela saana, nto yawinyu-tho pooti oloka. Ohiya-vo, mwalikanyiha ni okathi woopacerya mwaathenle anyu wala otheliwa, woonasa wene vano munniisuwela saana. André oromoliwe ottuli, onihimya so: “Koophwanya itthu sinci sookihakalaliha mukasamentoni mwaka ni Rita. Nuuvira iyaakha 13 sa othelana wahu, hiyo nookhalana ekasamento yoolipa, ehiniphavela ahu omala nnakhala vakhaani”.

[Inoota]

MWIIKOHEKE SO . . .

▪ Mikhalelo xeeni sa vameekhaaya sa ole othelanne aka sinikisivela vanci?

▪ Akhala wira onnipacerya olavuliwa mwaha wa ekasamento aka yoopacerya, kinrowa olokiherya sai ovaanela iwo mwa enamuna enooniherya ophenta ni omuttittimiha ole othelanne aka vano?

[Elatarato epaaxina 8]

[Elatarato epaaxina 10]

Mpakeke itthu sa niinano sinrowa wookhaliheryani wuuraana ntoko anamathelana