MWAHA WA VAKAAPANI | YOOWIIRANEYA YOOVARA MURIMA YA MOOTA BIIBILIYA OOPONWE AWE
Biibiliya Ohoopowa Makhalelo a Okathi
Ophavela Opwetexiwa: Ikaruma saarumeeliwa wira olempwe Biibiliya ti papiro ni pergaminho. * (2 Timootheyo 4:13) Moota xeeni ikaruma ahu saakhanle aya oomwiiriha Biibiliya ohoopowa?
Papiro ekaruma yowaakuva ohononeya, okhereya ni wuntta. Alopwana anisoma makhalelo a wExiitu wa khalai aniihaniwa Richard Parkinson ni Stephen Quirke ahimmye so: “Epaphelo ya papiro pooti ohononeya mpakha ohala ifiiyu wala ntthupi paahi. Okathi enisukiwa aya, eroolu ya papiro pooti onya mukwitha wala ohononeya mwaha wa oriirya. Nave pooti okhuuriwa ni axikokho otepexa wene ni oweexe”. Ipaphelo sinceene sa papiro saphwanyiwa ni nsuwa ninceene wala oriirya saanaakuva ohononeya.
Pergaminho onniviriha okathi munceene onvikana papiro, masi pergaminho onnaakuva ohononeya akhala wira onniphwanyiwa nsuwa ninceene wala oriirya. * Nave axikokho waasivela omukhuura pergaminho. Tivonto eliivuru A Escrita do Dia a Dia no Leste Greco-Romano ennihimya moota saasukiwa aya iliivuru khalai eriki: “Vaanivila iliivuru sa khalai oviriha okathi munceene wala woopowa”. Vaakhanle wira Biibiliya aahihononeya, muhupi awe khiwaarowa ophiya mpakha olelo-va.
MOOTA BIIBILIYA OOPONWE AWE: Nlamulo yaavahiwe aYuda, naahimya wira khula mwene “akilathi-ru vehijeni v’omwene awe, alepe [wala okopiyari] mulivuruni mwawe Ikano iya” wala iliivuru 5 soopacerya sa Biibiliya. (Otumererya 17:18) Nave atthu muteko aya waari okopiyari iliivuru, awo yaahipaka ikoopiya sinceene sa Biibiliya. Nto okathi wa arummwa, saahikhala ikoopiya sinceene musinagoga mwa Isarayeli ni mapuro makina oorakamela oMacedônia! (Luka 4:16, 17; Miteko 17:11) Vaaweryaneyale sai soolempwa sa khalai ophiya mpakha olelo-va?
Soolempwa sinisuweliwa okhala Iroolu sa Ephareya Yookhwa, saahivira iseekulu sinceene sipwehiwe ene mmurinkini mwa oloko, mmakhukuni ni mapuro owuuma wala ooviha
Musomi a Waataana wa Naanaano oniihaniwa Philip W. Comfort ohimmye so: “AYuda yaanipweha iroolu mmurinkini wala mmwaapuni wira sihononeye”. Eyo enooniherya wira maKristau yaanipaka etthu emosaru. Nto soolempwa sikina sa Biibiliya saahiphwanyiwa mmurinkini wa oloko ni makhuku ooriipela, otepexa wene mapuro oowuuma wala ooviha.
YOOKHUMELELA AYA: Olelo-va, sookhala mipantta sinceene sa Biibiliya, sikina ti sa iyaakha 2.000 sivinre. Khiivo eliivuru ekina ya khalai erina ikoopiya sinceene onvikana Biibiliya.
^ etti. 3 Papiro yaari ekaruma yaarumeeliwa wira atthu alepe itthu yaaphavela aya, mwiri owo onikhala mmaasini ni oniihaniwa papiro. Pergaminho onipakiwa ni esapala ya inama.
^ etti. 5 Mwa ntakiheryo, edukumento ya Declaração de Independência dos Estados Unidos yaalempwale orumeeliwaka pergaminho. Vano nuuvira iyaakha 250, edukumento ele yoohononeya ni khivaniweryaneya osoma.