NKAHAYA MUUPUWELE ELA: Nkahaya muupuwele muri ene museu sihireere monumento wala itthu sa khalai. Itthu sikina soolyiwa oweexe ni sihanle omala-mala. Mipantta sikina khasinooneya oratteene. Masi emosa ti yoomalela ni ennooneya oratteene. Nto munnimuleela ole onoohoolani wira: “Etthu ela ti ya niinaano ovikana sikina”. Owo onnaakhula wira: “Nnaari, ela ti ya khalaixa ovikana sikina ni khenalokiheriwe”. Nto nyuwo munnimukoha wira: “Niireke khetonko orumpwa epula ni itthu sikina saakhanle oohonona?” Owo onniwaakhulani oriki: “Nnaari. Ela khereere orumpwa epula ni epheyo. Nave atthu akina yaaheererya ohonona”. Woonasa wene, mwaamutikinihiwa muhimyaka wira: ‘Ela evirikanne sai ni itthu sikina?’

Biibiliya ori ntoko monumento. Maana Biibiliya eliivuru ya khalai ovikana iliivuru sotheene sikhanle. Ekeekhai wira sookhala iliivuru sikina sa khalai. Masi ntoko monumento olyinwe oweexe, nuuvira okathi munceene iliivuru iyo soohononeya. Mwa ntakiheryo, atthu akina anihimya wira itthu iliivuru iyo sinihimya aya khasinivarihana ni siensia. Nave anihimya wira itthu sinihimya aya voohimya sa olooliwa iretta sinnikumiherya mixankiho ohiya okhaliherya. Nave ipaaxina sikina sa iliivuru iyo khasikhanle wala soohononeya.

Biibiliya oovirikana vanceene ni iliivuru iyo. Owo olempwale iyaakha 3.500 sivinre, masi hata vari siiso khuuvo mpantta wa Biibiliya ohononeyale. Nnaamwi ikwaha sinceene atthu akina yaaphavela ommala-maliha, ntoko ophavela ompaha, waakhoottiha atthu okhalana, omusoma ni ohivahiwa efaita, nlelo itthu oniixuttiha awe sookhalana efaita. Nave itthu Biibiliya onihimya awe sinnivarihana ni atthu anisuwela aya olelo-va.

Woonasa wene, nyuwo munniikoha so: ‘Niireke miruku sa mBiibiliyani sinnivareleya muteko olelo-va?’ Wira musuwele waakhuliwa waya, nkahaya muupuwele makoho ala: ‘Mixankiho xeeni suulupale apinaatamu arina aya olelo-va? Mixankiho xeeni sinitepa owoopopiha?’ Pooti wira nyuwo munnuupuwela, ikhotto, wuncererye wa atthu, ikrime ni makhwankwa. Vano nwehe itthu vakhaani Biibiliya oniixuttiha awe. Nuumala-vo, mwiikoheke so: ‘Vaakhanle wira atthu anneettela ele Biibiliya oniixuttiha awe, niireke olumwenku khiwaarowa okhala wooloka?’

OPHAVELA MURETTELE

“Oohakalala taale anikhaliha murettele, okhala wira animwiireliwa anamwane a Muluku”. (Matheyo 5:9) “Mpakeke sotheene muniwerya anyu, wira mukhaleke ni murettele ni atthu otheene”.​—aRoma 12:18.

OMORIWA IKHARARI NI OLEVELELA

“Oohakalala taale oomoriwa ikharari, okhala wira anoomoreliwa ikharari”. (Matheyo 5:7) “Nvilelaneke, mulevelelaneke ni murima wotheene ikwaha sotheene, hata musuwelaka wira mootthekeliwa. Ntoko Yehova * oolevelenlyaaweni, ni nyuwo-tho mwiireke siiso”.​—aKolosi 3:13.

OHIKHALANA NTHALU

“Muluku ohaakumiherya atthu a maloko otheene, wira akhaleke elapo yotheene ya vathi”. (Miteko 17:26) “Muluku khonaathanya atthu, masi khula elapo, owo onnimwaakhela khula mutthu onimoova, ni oneettela exariya”.​—Miteko 10:34, 35.

OHIHONONA ELAPO

“Apwiya Muluku yahimukuxa mutthu, khumukhaliha mmatta mwa wEdeni, wira alimeke, asukeke”. (Maphattuwelo 2:15) Muluku onrowa ‘waapwetexa ale anihonona elapo’.​—Wiisuupulula 11:18.

OTHANYA NRIMA NI ORUPIHANA WOOHILOKA

“Mwiikasoope ni musyake ohiphiyeriwa, maana hata mutthu orina ene itthu sinceene, itthu iyo khasininvaha okumi”. (Luka 12:15) “Orupihana woohiloka ni itthu soonanara sotheene aahiiso ohiphiyeriwa, sihiromoliweke eriyari anyu, nnakhala vakhaani, maana eyo khenaareerela arumeyi a Muluku”.​—aEefeso 5:3.

OROROMELEYA NI OLUTTUWELIWA OVARA MUTEKO

“Ninniphavela okhala oororomeleya mwa itthu sotheene”. (aHeeberi 13:18) “Ole ori nawiiye, ottharuwe wiiya; ohiya-vo, iimananiheke ovara muteko wooloka ni matata awe”.​—aEefeso 4:28

WAAKHALIHERYA ATTHU OOTHOIWA

“Mwaamaaliheke ale ariipiwe murima, mwaakhaliheryeke ale ahilimpe, mwaapixeryeke murima atthu otheene”. (1 aTesaloonika 5:14) “Waakhapelela athiyana anaamukhweli moohaawani mwaya”.​—Yakobo 1:27.

Biibiliya khonnivaha paahi elista ya itthu iyo sooloka. Masi owo onniniixuttiha moota nikhanle ahu oovarihela muteko mookumini mwahu khula nihiku. Vaakhanle wira atthu anneettela itthu Biibiliya oniixuttiha awe, khamunikupali wira eyo yammaliha mixankiho sinceene sa apinaatamu? Tthiri malakiheryo a mBiibiliyani annivareleya muteko okathi wotheene! Masi olelo-va, Biibiliya onrowa wookhaliheryani sai?

Mulopwana ohireerane ankhili waavikana atthu otheene aahimmye so: “Ankhili a mutthu annooneya ni itthu sa xariya onipaka awe”. (Matheyo 11:19) Niireke nyuwo munnikupali eyo? Enamuna yuulupale yoosuwela akhala wira miruku iyo ti sooloka, ori ovarihela muteko. Okhala wira ti siiso, woonasa wene munnuupuwela so: ‘Akhala wira miruku sa mBiibiliyani ti sooloka, iyo sihaana okikhaliherya mookumini mwaka. Masi onrowa okikhaliherya sai omaliha mixankiho kirina aka niinaano-va?’ Nwehe ntakiheryo nimosa.

Maria, * aaniluttuweliwa vanceene ovara muteko ni aanihakalala vanceene. Mooriipiha murima, makhalelo awe yaahiturukeya mowaakuveya. Mwanawe mwaamuthiyana aahikhwa. Nave aahimwalana ni iyawe. Nto aahikopha musurukhu munceene. Maria onihimya so: “Nkoona etthu yoopaka, mwanaka mwaamuthiyana aahikhwa, kaahimwalaniwa ni nkaarina empa. Kaahixanka vanceene, ni nkaaphavela-tho okhala mukumi”.

Maria aahoona oratteene wira moolumo ari Esalimo 90:10 tekeekhai, yaawo anihimya wira: “Iyakha miloko mithanu na mili sinniphiyerya ekumi ahu: nakhalanaka ikuru sinjene, nnophiya iyakha miloko mithanu na miraru. Vano olekela waya, ovelavela n’uhawa pahi: ekumi ennakuva ovira, hiyo khurimela”.

Okathi ole wooxankiha, malakiheryo a mBiibiliyani yaahimukhaliherya vanceene Maria. Tthiri Biibiliya aahimukhaliherya vanceene. Ntoko sinrowa aya wooniherya myaha miraru sinittharelana, atthu akina ahoona wira malakiheryo a mBiibiliyani annikhaliherya vanceene. Maana vaavo anivarihela aya muteko, mixankiho saya sinnivukuwa. Nave ahoona wira Biibiliya ori ntoko monumento nilavunle ahu wanipacerya wa mwaha ola. Biibiliya oovirikana ni iliivuru sikina, seiyo nuuvira okathi miruku saya sihinivareleya muteko. Niireke eyo enniiraneya mwaha woowi Biibiliya okhalana itthu sikina sihikhanle iliivuru sikina? Niireke Biibiliya nuulumo na Muluku khahiyo na apinaatamu amulempe?​—1 aTesaloonika 2:​13.

Pooti wira munnikupali wira okumi ahu ti wowaakuva ovira ni khoreerane mixankiho. Okathi wa mixankiho, munrowa ophwanya woowi nimaaliho, nikhaliheryo ni miruku sooloka?

Nrowe niwehe inamuna tthaaru Biibiliya okhanle awe oowookhaliheryani mookumini mwanyu. Biibiliya onimookhaliheryani

1. osyaka mixankiho.

2. ophuka sakhumelela mixankiho.

3. owanana mixankiho muhiniwerya anyu omaliha.

Myaha sinittharelana ninrowa othokorerya myaha iyo miraru.