1 aKorinto 10:1-33
10 Axinnaka, muupuweleke wira amuhavinre ahu yaahikhala vathi va neeku, ni otheene yaahilapuwa ephareya.
2 Otheene aya yaahipatisiwa ni neeku ni ephareya, mwaha woomutthara Moise.
3 Nave otheene aya yaahilya yoolya yaavahiwe aya ni Muluku.
4 Otheene aya yaahiwurya maasi yaavahiwe aya ni Muluku. Awo yaahiwurya maasi yaakhuma vamwala, yoowo waatthara. Mwala owo yaavahiwe ni Muluku, ni onimuthoonyerya* Kristu.
5 Muluku khaaweemerenrye anamunceene a atthu awo, tivo atthu awo yaahiiviwa moothakoni.
6 Itthu iya sihiiraneya wira sikhale ntakiheryo nahu, wira nihiphaveleke opaka itthu sootakhala, ntoko atthu awo yaaphavenle aya.
7 Nnakhala nihaakokhoreleke amuluku eethiru, ntoko akina a yaawo yaakokhorenle aya. Tivonto valempwale aya, ahimmwaka atthu awo wira: “Atthu yaanilya ni yaaniwurya. Nto yaahivenya, anahakalala”.
8 Nnakhala nihirupihaneke voohiloka,* ntoko akina a yaawo yaarupihanne aya voohiloka,* yiirelaka okhwa atthu 23.000, nihiku nimosa.
9 Nnakhala nihimweehererye Yehova, ntoko akina a yaawo yaamweeherenrye aya, yiirelaka olummwa ni inowa, khukhwa.
10 Nnakhala nihaapeke, ntoko akina a yaawo yaapa aya, yiirelaka wiiviwa ni nlaikha na Muluku.
11 Itthu saawiiranenle atthu awo, soolempwa wira siniixuttihe etthu, wira akina a hiyo, ninkhala wookiseryani wa olumwenku,* nihikhale ntoko atthu awo.
12 Siiso, ole onuupuwela wira orimweemela, aipasoopeke wira ohimore.
13 Weehereriwa onoophwanyani, nave-tho onnaaphwanya atthu otheene. Masi Muluku toororomeleya, ni khonrowa weemererya wookhumelelani etthu muhinwerya anyu ovilela. Ohiya-vo, okathi enookhumelelaayani etthu yooxankiha, owo onoowooniheryani ephiro wira nwerye ovilela.
14 Tivo, axinnaka oophentiwa, musyakeke* waakokhorela amuluku eethiru.
15 Nyuwo mwa atthu arina ankhili, tivonto, muthanleke mmansinyu akhala wira ele enihimya aka ti yeekeekhai wala nnaari.
16 Ekaalisi ya eviinyu, yeeyo enimuxukhurela ahu Muluku, enithoonyerya ephome ya Kristu, khahiyo siiso? Nave-tho, ephaawu enikawanya ahu, enithoonyerya erutthu ya Kristu, khahiyo siiso?
17 Okhala wira eri ephaawu emosa paahi, siiso, hiyo hata naattale ene, nri erutthu emosa paahi, maana otheene ahu ninnikhuura ephaawu emosa-ru.
18 Nwuupuwele aisarayeli: Okathi anilya aya mikuttho sinivahiwa valtaari, kiira onlikana ni olya vamosa ni Muluku?
19 Nto kiniphavela ohimya exeeni? Kiireke mukuttho onivahiwa muluku eethiru, wookhalana efaita? Aahiiso muluku eethiru ookhalana efaita?
20 Nnaari, masi kiniphavela ohimya wira mikuttho atthu a mulaponi anivaha aya, awo anivaha malaikha ootakhala, khaninvaha Muluku. Nto, nkiniphavela wira nyuwo mwaataaneke ni malaikha ootakhala.
21 Nyuwo khamunwerya owurya ele eri mukaalisini mwa Yehova ni mukaalisini mwa malaikha ootakhala. Nave khamunwerya okhala “vameesa va Yehova” ni vameesa va malaikha ootakhala.
22 Aahiiso, ‘niireke nimphavela omwiiriha Yehova onanariwa’? Niireke hiyo noolipa onvikana owo?
23 Itthu sotheene sinneemereriwa, masi khahiyo wira itthu sotheene sinnikumiherya mireerelo. Itthu sotheene sinneemereriwa, masi khahiyo wira itthu sotheene sinnilipiha.
24 Khula mutthu othipeleleke ophavela mureerelo wa mutthu mukina, ohiya mureerelo awe.
25 Mukhuureke inama sinitumihiwa mapuro oniiviwa inama, muhihoveryaka mwaha wa murima* anyu,
26 okhala wira “elapo ni itthu sotheene sinikhala memmo, ti sawawe Yehova”.
27 Akhala wira mutthu ohinimwaamini Kristu onnoolattulani orowa olya, nto nyuwo munaphavela orowa, mulyeeke khula etthu onoovahaaweni, muhihoveryaka mwaha wa murima* anyu.
28 Masi akhala wira mutthu onnooleelani wira, “Enama ela yaavahiwe amuluku eethiru”, muhikhuure wira muhimukwattulihe ole oohimenryeni, ni mwaha wa murima* wa atthu akina.
29 Miyo nkinihimya murima* anyu, masi kinihimya murima* wa mutthu mukina. Siiso, nkiniphavela orumeela otaphuwa waka, wira murima* wa mutthu mukina okiphukeleke mwaha wa etthu eyo.
30 Akhala wira ele kinilya aka ni kinimuxukhurela aka Muluku, ennimwiiriha mutthu mukina okiveeha, weeso nkinrowa olya.
31 Tivonto, mwaalyaaka wala mwaawuryaka aahiiso mwiiraka khula etthu, mpakeke itthu sotheene mphavelaka onvuwiha Muluku.
32 Muhaatthekiheke ayuda ni akereku, nnakhala muloko wa Muluku,
33 ntoko miyo kineererya aka waasiveliha atthu otheene, mwa itthu sotheene. Nkiniphavela mureerelo aka, masi kiniphavela mureerelo wa atthu anceene, wira awo yoopowe.
Inoota
^ Aahiiso, “aari”.
^ Nwehe Moolumo Ootthokiheriwa.
^ Nwehe Moolumo Ootthokiheriwa.
^ Nwehe Moolumo Ootthokiheriwa ani: “Olumwenku”.
^ Ekereku, “mutthyaweke”.
^ Nwehe Moolumo Ootthokiheriwa.
^ Nwehe Moolumo Ootthokiheriwa.
^ Nwehe Moolumo Ootthokiheriwa.
^ Nwehe Moolumo Ootthokiheriwa.
^ Nwehe Moolumo Ootthokiheriwa.
^ Nwehe Moolumo Ootthokiheriwa.
