1 aKorinto 4:1-21
4 Hiyo nimphavela wira atthu anooneke ntoko arumeyi aninvarela muteko Kristu, ni atthu aroromeliwe isiiri sa Muluku.
2 Masi, murumeyi ohaana ovara saana miteko sawe.
3 Vano miyo nkinicala ophukeliwa ni nyuwo aahiiso ophukeliwa ni etripunaale ya apinaatamu. Mweekeekhai, hata miyo nkiniiphukela mmansaka.
4 Miyo nkinoona wira koopaka etthu yoohiloka. Masi nkiniphavela ohimya wira ka naxariya, okhala wira Yehova paahi tonihimya* akhala wira ele kinipaka aka ti yooreera aahiiso ti yootakhala.
5 Tivo, muhiphukeleke etthu ohinatthi ophiya okathi aya. Ohiya-vo, mulipeleleke mpakha nihiku anirwa aya Apwiya. Awo anookumiherya nipuro nookokola itthu sivithiwe weepiphini, ni animooniherya itthu siri vamurimani va atthu. Nuumala-vo, Muluku onoomuttottopela khula mutthu, mwaha wa miteko sawe.
6 Axinnaka, mwa itthu iya kihimyale aka, miyo ni Apolo ninnivaha ntakiheryo wira mphwanye mureerelo. Muttharaka ntakiheryo nahu, nyuwo munoowerya weettela yooruma ela eni: “Mutthareke paahi itthu silempwale”. Mwiira siiso, khamunrowa wiixinnuwihaka, ni khamunrowa othanyanaka mukina ni mukhwaawe.
7 Exeeni erina anyu enookupalihani wira mwa mukhulupale waavikana akina? Kiira itthu sotheene murina anyu nvahiwe ni Muluku? Akhala wira Muluku toovanheni itthu sotheene, xeeni muniittottopa anyu okhalaka ntoko mphwannye ni ikuru sanyu?
8 Niireke toko moophiyeriwa? Niireke toko moothaaciri? Niireke moopacerya olamulela ntoko mamwene, hiyo nihipacenrye? Tthiri kaaniphavela mwaapacenrye olamulela ntoko mamwene, wira ni hiyo-tho nilamuleleke ntoko mamwene.
9 Miyo kinoona wira Muluku ooniiriha hiyo arummwa, okhala ekrupu yookiserya enrowa okela muteaturuni wira niwehiwe ni atthu otheene, okhala wira noolamuliwa wiiviwa. Nto ninnooniwa ni olumwenku wotheene, ni malaikha, ni atthu.
10 Hiyo na alolo mwaha wa Kristu, masi nyuwo mwa atthu arina ankhili mwa Kristu. Hiyo na atthu ootteettheya, masi nyuwo mwa atthu oolipa. Nyuwo munnittittimihiwa, masi hiyo khaninttittimihiwa.
11 Mpakha olelo-va, hiyo nlelo ninnivoliwa etala ni ntthona, ninnithoiwa soowara,* ninnimaniwa* ni khanrina opuro wookhala.
12 Nave ninnivara muteko woolipa ni matata ahu. Okathi atthu anniruwana aya, hiyo ninnaareeliha. Okathi onilupatthiwa ahu, ninnivilela nipixaka murima.
13 Atthu yaaniveehaka, hiyo ninnaalavula saana. Mpakha olelo-va, ninnithokoreriwa okhala ikokhola sa olumwenku ni owowo wa itthu sotheene.
14 Khahiyo kinoolepelani itthu iya wira muuliwe muru, masi kiniphavela woolopolani ntoko anaaka oophentiwa.
15 Nyuwo pooti okhalana alipa-oowiixuttiha 10.000, yaawo aniwiixuttihani moota woomutthara Kristu, masi khamurina axipaapa anceene. Miyo ka paapa anyu, okhala wira koowiixuttihani ihapari sooreera sinimuhimya Kristu Yesu.
16 Tivonto, kinootumereryani wira mukitakiheke miyo.
17 Siiso, kinnimuruma Timootheyo orwa muri anyu, maana owo mwanaka onimphenta aka vanceene, ni toororomeleya mmutekoni mwa Apwiya. Owo onoowuupuxeryani inamuna kinimurumeela aka Kristu Yesu, ntoko kiniixuttiha aka miloko sotheene.
18 Atthu akina anuupuwela wira nkinrowa weiwo, tivo aniittottopa aya.
19 Yehova aphavela vale, kinimoorwa niinaano. Kiniphavela waaweha atthu awo oowiittottopa, masi nkiniphavela wiiwa moolumo aya. Ohiya-vo, kiniphavela osuwela yaarina owerya wa Muluku aahiiso yahaarina.
20 Omwene wa Muluku, khonooniheriwa ni moolumo paahi, masi onooniheriwa ni owerya wa Muluku.
21 Exeeni muniphavela anyu? Kiireke muniphavela wira kirwe ni ekopo, aahiiso kirwe ni ophenta ni murima woomaala?
