1 aKorinto 7:1-40
7 Vano, mwaha wa itthu mukilepenle anyu, fataari mulopwana ohirupe ni muthiyana.
2 Masi, okhala wira orupihana woohiloka* khoreere wuulaana, khula mulopwana okhalane mwaarawe, nave khula muthiyana okhalane iyawe.
3 Mulopwana oothela onvaheke mwaarawe itthu siniphavela awe* mwaarawe owo. Nave muthiyana ootheliwa onvaheke iyawe itthu siniphavela awe* iyawe owo.
4 Muthiyana ootheliwa, khahiyo mwaneene erutthu awe, masi mwaneene ti iyawe. Nave, mulopwana oothela, khahiyo mwaneene erutthu awe, masi mwaneene ti mwaarawe.
5 Mulopwana oothela aahiiso muthiyana ootheliwa, ahikhootteke orupihana ni ole othelanne awe. Masi akhala wira mulopwana oothela aahiiso muthiyana ootheliwa, anniiwanana olipelela okathi vakhaani wira ahirupihane, wira akhalaneke okathi woovekela, eyo etthu yooreera. Nto pooti otthikela orupihana, wira Satana ohiweehererye, mwaha wa ohiwerya waya wiihiiha.
6 Miyo kinniweemereryani opaka eyo, masi khahiyo kinimoorumani.
7 Kaaniphavela wira alopwana otheene yaari ntoko miyo. Masi Muluku onvaha khula mutthu owerya wawe, tivo akina anithela aya, akina ahinathela.
8 Vano, kinnaaleela ale oohithela,* ni athiyana anaamukhweli wira fataari okhala ntoko miyo.
9 Masi akhala wira awo khaniwerya wiihiiha, atheleke aahiiso atheliweke, maana fataari othela aahiiso otheliwa, ohikhanle opaha murima aya, mwaha wa ophavela orupihana.
10 Miyo kinnaavaha malakiheryo atthu athelanne, masi khahiyo miyo, Apwiya tanihimya wira: muthiyana ootheliwa, ohivalaane ni iyawe.
11 Akhala wira onoovalaana, weeso ohitheliwe aahiiso ohaana otthikelana ni iyawe. Nave, mulopwana ohimuhiye mwaarawe.
12 Masi akina kinaahimeerya ti miyo, khahiyo Apwiya: akhala wira munna ookhalana mwaarawe ohiniwaamini Apwiya, nto mwaarawe owo onaphavela okhala ni yena, ohimuhiye.
13 Akhala wira muthiyana ookhalana iyawe ohiniwaamini Apwiya, nto iyawe owo onaphavela okhala ni yena, muthiyana owo ohimuhiye iyawe.
14 Tthiri, mulopwana oothela oohaamini, onnitteelihiwa mwaha wa mwaarawe, nave muthiyana ootheliwa oohaamini, onnitteelihiwa mwaha wa iyawe, ori munna. Vahaakhanle siiso, aniinyu yaarowa okhala oohireerihiwa vamaithoni va Muluku, masi vano aareerihiwa.
15 Nto, akhala wira ole oohaamini onnithanla ovalaana, ovalaaneke. Eyo yiiraneya, munna aahiiso murokora khonikhanyereriwa okhala hoothe. Muluku onnoovahani murettele.
16 Nyuwo muthiyana, akhala wira munookhala ni iyanyu, woonasa wene munoomoopola iyanyu owo. Nave nyuwo mulopwana, akhala wira munookhala ni mwaarinyu, woonasa wene munoomoopola mwaarinyu owo.
17 Masi vannireerela khula mutthu okhala ntoko Yehova onvanhe awe. Okhaleke ntoko aari awe, okathi Muluku aamwiihanne awe wira aamini. Nto, malakiheryo ala kinnivaha miloko sotheene.
18 Vakhala wira mulopwana ohiihaniwa ni Muluku ori ene oowinnuwihiwa, okhaleke siiso. Nave, akhala wira mulopwana ohiihaniwa ohinatthi winnuwihiwa, owo ohinnuwihiwe.
19 Etthu yuulupale ti weettela sooruma sa Muluku, ohiya winnuwihiwa aahiiso ohinnuwihiwa.
20 Khula mutthu okhaleke siisaale ntoko okathi aihaniwe awe.
21 Niireke mwaihaniwe muri ene epottha? Weeso muhixanke. Masi mwakhalana eparakha ya okhala ootaphuwa, muhihiyererye eparakha eyo.
22 Ole aihaniwe wira okhale mwiixutti a Pwiya, nlelo ori ene epottha, owo onnitaphuwa ni onlipa ni Pwiya. Siiso-tho, ole aihaniwe ori ene ootaphuwa, onnikhala epottha ya Kristu.
23 Nyuwo moothummwa ni esisapo yuulupale. Muhiye okhala ipottha sa atthu.
24 Axinnaka, khula mutthu okhaleke siiso ohoolo wa Muluku, ntoko okathi aihaniwe awe.
25 Vano, wa ale ahithenle,* Apwiya khakirumme waaleela etthu, masi kinihimya moonelo aka. Nyuwo pooti ororomela ele enihimya aka, okhala wira Apwiya aakimorela ikharari.
26 Mwaha woowi ninkhala okathi wooxankiha, kinoona wira fataari mulopwana okhala siiso ntoko siri awe.
27 Niireke nyuwo moothela? Weeso muhiphaveleke omuhiya mwaarinyu. Niireke nyuwo khamuthenle? Weeso muhimwaavyeke muthiyana.
28 Vano, hata muthelaka, nyuwo khamunittheka. Nave, akhala wira ole ohithenle* onnithela, mutthu owo khonittheka. Masi ale anithelana anookhalana mixankiho mookumini mwaya. Miyo kiniphavela wira muhiphwanye mixankiho iyo.
29 Nave-tho, axinnaka, enihimyaka tiila: okathi ohanle, ori vakhaani. Okhuma vano orowa ohoolo, ale athenle akhaleke ntoko khathenle,
30 ale aninla akhaleke ntoko khaninla, ale anitteeliwa murima akhaleke ntoko khanitteeliwa murima, ale anithuma itthu akhaleke ntoko kharina itthu iyo,
31 ale anittottela mureerelo olumwenku ola, akhaleke ntoko khanittottela mureerelo voomalela, okhala wira makhalelo a olumwenku ola anniturukeya.
32 Kiniphavela wira muhixankeke. Mulopwana oohithela onixankela paahi ovara muteko wa Apwiya, okhala wira oniphavela waahakalaliha Apwiya.
33 Mulopwana oothela, onixankela itthu sa olumwenku, okhala wira oniphavela omuhakalaliha mwaarawe,
34 nave owo ookawanyeya. Nto muthiyana oohitheliwa ni ole oohipaceriwa, anixankela itthu sa Apwiya, wira erutthu aya ni muupuwelo aya sikhale sooreerihiwa. Masi muthiyana ootheliwa onixankela itthu sa olumwenku, okhala wira oniphavela omuhakalaliha iyawe.
35 Kinilavula siiso kiirelaka mureerelo anyu. Nkiniphavela wootthukwani, masi kiniphavela owiirihani opaka itthu sooreera, wira mwaavareleke muteko Apwiya khula nihiku, ni murima wotheene.
36 Akhala mutthu ohithenle, onaweha wira khoniwerya wiihiiha ophavela orupihana, nave oovira iyaakha sa omiravo,* fataari othela. Mutthu owo khonittheka.
37 Masi akhala mutthu olakenle vamurimani vawe ohithela, onavarexexa etthu eyo olakenle awe, okhala wira khoniphavela othela, ni onniwerya wiihiiha ophavela orupihana, eyo etthu yooreera.
38 Siiso-tho, ole onithela onniira etthu yooreera, masi ole ohinithela, onniira etthu yootepa oreera.
39 Muthiyana ootheliwa, ootthukiwa ni nlamulo okathi wotheene iyawe ori awe mukumi. Masi, iyawe akhwa vale, owo ootaphuwa wira otheliwe ni mutthu onimphavela awe, masi ohaana otheliwa mwa Apwiya paahi.
40 Nto miyo kinoona wira owo onootepa ohakalala, aahitheliwe-tho. Kinnikupali wira ni miyo-tho kookhalana munepa wa Muluku.
Inoota
^ Ekereku, porneía. Nwehe Moolumo Ootthokiheriwa.
^ Onihimmwa ophavela orupihana wa atthu athelanne.
^ Onihimmwa ophavela orupihana wa atthu athelanne.
^ Nuulumo na ekereku nirumeeliwe-va, nnaahimya anaamukhweli, ale avalanne, aahiiso amwalanne.
^ Ekereku, “ale ahinarupane mutthu, akhale alopwana aahiiso athiyana”.
^ Ekereku, “ale ahinarupane mutthu, akhale alopwana aahiiso athiyana”.
^ Onitaphulela wira woovira okathi yoole amiravo anitepa aya ophavela orupihana.
