1 aKorinto 9:1-27
9 Kiireke miyo nkihiyo ootaphuwa? Kiireke miyo nkihiyo murummwa? Kiireke miyo nkimoonale Yesu, Pwiya ahu? Kiireke nyuwo khamuhiyo muteko aka kinaavarela aka Apwiya?
2 Hata akina ahikoonaka okhala murummwa, kinnikupali tthiri wira nyuwo munnikoona okhala murummwa! Mweekeekhai, nyuwo mwa ekanyeryo enooniherya wira miyo ka murummwa a Apwiya.
3 Wiixaakiha waka wa ale anikivaanya ti nno:
4 Niireke hiyo khanrina ehakhi* ya olya ni owurya?
5 Niireke hiyo khanrina ehakhi* ya omuthela murokora oowaamini wira eetteke ni hiyo, ntoko siirale aya arummwa akina, ni axinnaya Apwiya, ni Keefa?*
6 Aahiiso, niireke wira miyo ni Baarnaba paahi nihikhalanne ehakhi* ya ohiya ovara muteko wa mulaponi, wira niweryeke wiikhapelela?
7 Niireke ookhala toropa oniliverya itthu sawe, nlelo ori ene toropa? Niireke ookhala onlima ematta ya ewuuva, ohinalya mihokorokho saya? Niireke ookhala onikhapelela nikoto na inama, ohinawurya eleeti ene?
8 Ele enihimya aka khahiyo nlamulo na apinaatamu. Masi-tho nlamulo na Moise ninnihimya itthu iya.
9 Nlamulo na Moise, voolempwa wira: “Muhitthukwe iyano sa enyompe, okathi eninyakela aya ipyo”. Niireke Muluku aavanhe nlamulo nla uupuwelaka inyompe?
10 Aahiiso aahimmye eyo mwaha wa hiyo? Moise aalempe moolumo awo mwaha wa hiyo, okhala wira mutthu onlima ni ole oneepettha ipyo, annivara muteko alipelelaka waakhela ipyo.
11 Vakhala wira nihaala eriyari anyu itthu sinikhuma wa Muluku, kiireke khivanreerela nyuwo onivaha itthu sikina sinnithowa?
12 Akhala wira atthu akina aakhalana ehakhi* ya okhaliheriwa ni nyuwo, hiyo-tho nootepa okhalana ehakhi* eyo. Hata nirina ene ehakhi* eyo, hiyo khinoovekenleni etthu, masi ninnivilela itthu sotheene wira nihittiyelele ephiro ya ihapari sooreera sinimuhimya Kristu.
13 Niireke khamunsuwela wira alopwana anivara miteko sa Muluku mutemplo, annoolya itthu sa mutemplo-mmo, ni wira ale anivara muteko okathi wotheene waltaari, annaakhela epantta emosa wa itthu sinivahiwa waltaari?
14 Tivo, Apwiya aaruma wira ale anlaleya ihapari sooreera, alyeeke mwaha wa ihapari sooreera iyo.
15 Hata vari siiso, miyo nkitonko woovekelani etthu. Masi, khahiyo wira kinoolepelani wira mukivahe itthu iyo vano. Tthiri, kinniittottopa mwaha woolaleya ihapari sooreera voohiliviwa etthu. Tivo, nkinrowa weemererya waakhiwa etthu enikiiriha wiittottopa!
16 Akhala wira kinnilaleya ihapari sooreera, nkirina mathowa oowiittottopa, maana owo muritti aka. Mweekeekhai, kaahilaleye ihapari sooreera, kootakhaliwa!
17 Vakhala wira kinnipaka eyo ni murima wotheene, kinimwaakhela etthuvo. Masi, hata kipakaka eyo kihiphavelaka, nlelo kinniroromeliwa ni Muluku wira kivare muteko ola.
18 Vano, etthuvo aka tiivi? Etthuvo aka, ti olaleya ihapari sooreera kihiliviwaka etthu. Siiso, nkinrowa oveka itthu kirina aka ehakhi* ya waakhela, mwaha woowaalaleerya atthu ihapari sooreera.
19 Miyo ka mutthu ootaphuwa vamaithoni va atthu otheene. Nto kihiikhaliha epottha ya atthu otheene, wira kaaroihe atthu anceene ephiro ya Kristu.
20 Eriyari ya ayuda, kaahiikhaliha muyuda wira kaaroihe ayuda ephiro ya Kristu. Eriyari ya ale aneettela nlamulo, kaahiikhaliha mutthu oneettela nlamulo, hata kiheettelaka nlamulo, wira kaaroihe ephiro ya Kristu ale aneettela nlamulo.
21 Eriyari ya ale ahineettela nlamulo, kaahiikhaliha ntoko mutthu ohineettela nlamulo, nnaamwi kaarina nlamulo na Muluku, ni keettela nlamulo na Kristu, wira kaaroihe ephiro ya Kristu ale ahineettela nlamulo.
22 Eriyari ya ale ahilimpe, kaahiikhaliha oohilipa, wira kaaroihe ephiro ya Kristu ale ahilimpe. Kaahipaka itthu sotheene wira kaakhaliherye atthu a makhalelo otheene, wira mwa inamuna sotheene, kiwoopole akina.
23 Kinnipaka itthu sotheene mwaha wa ihapari sooreera, wira kaalaleerye ihapari iyo akina.
24 Niireke khamunsuwela wira atthu anceene annitthimaka wira axinttane, masi mutthu mmosa paahi tonaakhela etthuvo? Mutthimakeke wira nwerye waakhela etthuvo.
25 Khula mutthu oniirela mpantta oxinttana, onniihiiha mwa itthu sotheene. Atthu awo anniira siiso wira yaakhele etthuvo* enihononeya, masi hiyo, ninniira siiso wira naakhele etthuvo* ehinihononeya.
26 Tivo, kinnitthimaka kisuwelaka onrowa aka. Nave nkiniwana okhalaka ntoko kinimana epheyo.
27 Masi kinnimana* erutthu aka ni kinneettiha ntoko epottha. Kaahiire siiso, woonasa wene miyo kinookhoottiwa ni Muluku, nnaamwi kaalaleeryaka atthu akina.
Inoota
^ Aahiiso, “etireitu”.
^ Aahiiso, “etireitu”.
^ Yoowo-tho oniihaniwa Pedru.
^ Aahiiso, “etireitu”.
^ Aahiiso, “etireitu”.
^ Aahiiso, “etireitu”.
^ Aahiiso, “etireitu”.
^ Aahiiso, “etireitu”.
^ Ekereku, “ekhara”.
^ Ekereku, “ekhara”.
^ Aahiiso, “kinnihaaxa”.
