1 aTesaloonika 2:1-20
2 Axinnaka, nyuwo moosuwela oratteene wira hiyo khinooxukunryeni mahala ene.
2 Ntoko munisuwela anyu, nnaamwi woopaceryani naahaawale ni naahaaxiwe oFilipi, Muluku oonivaha olipa murima wira noolaleeryeni ihapari sooreera, nnaamwi nivaanyihiwaka vanceene.*
3 Otumererya wahu khahiyo ti woowootha, nnakhala ni muupuwelo wootakhala aahiiso khanimphavela woowokani,
4 ohiya-vo, hiyo ninlavula ntoko atthu athanliwe ni Muluku wira alaleye ihapari sooreera. Khaninlavula wira naasivelihe atthu, masi nimphavela omusiveliha Muluku, yoowo onisuwela mirima sahu.
5 Nyuwo munnisuwela wira hiyo khanitonko woowokani nirumeelaka moolumo ooreera, nnakhala khinootherenrye okhala atthu ooloka, wira niphwanye etthu. Muluku onnisuwela saana etthu ela!
6 Nnakhala khanimphavela ovuwihiwa ni apinaatamu, mukhale nyuwo aahiiso atthu akina. Ntoko arummwa a Kristu, hiyo nanwerya wooreyani muritti woolemela wira munikhapeleleke.
7 Ohiya-vo, hiyo naahiikhaliha ooreera murima eriyari anyu, ntoko maama onaamwiha onaakhapelela awe anaawe.
8 Okhala wira ninnoophentani vanceene, naahihakalala* woolaleeryani ihapari sooreera sa Muluku. Masi ohiya paahi opaka eyo, hiyo naahileva okumi ahu wira nookhaliheryeni.
9 Axinnaka, tthiri nyuwo munnisuwela wiimananiha wahu ni muteko woolipa nivanre ahu. Okathi noolalenryaahuni ihapari sooreera sa Muluku, hiyo naahivara muteko ohiyu ni othana wira niikhapelele, nihiphavelaka omureya muritti khula mmosa a nyuwo.
10 Okathi naari ahu ni nyuwo, naahiroromeleya, naahipaka itthu sa xariya, ni khinaarina mulattu. Nyuwo vamosa ni Muluku, mwa anamoona ahu.
11 Nyuwo munnisuwela oratteene wira hiyo naanoolipihani, woomaalihani ni woolopolani, siisaale paapa oniwiirela awe anaawe.
12 Hiyo naahiira siiso, wira nyuwo mweetteke ntoko Muluku oniphavela awe, yoowo oniwiihanani wira mukele Moomweneni mwawe, ni mwaakhele ovuwa.
13 Tivonto hiyo-tho ninnimuxukhuru Muluku voohihiyererya, okhala wira okathi mwaakhenle anyu nuulumo na Muluku, nenlo noolalenryaahuni, nyuwo khimwaakhenle ntoko nuulumo na atthu, masi mwaakhenle ntoko siri aya, eyo piiyo, ntoko nuulumo na Muluku, nenno nnookhaliheryani nyuwo atthu oowaamini.
14 Mweekeekhai, nyuwo axinna mootthara ntakiheryo na miloko sa makristau a oYudeya, seiyo siri miloko sa Muluku, okhala wira nyuwo moohaawa mmatatani mwa atthu a elapo anyu, itthu simosa-ru yaahaawale aya axinna a oYudeya mmatatani mwa ayuda,
15 yaawo amwiivale Pwiya Yesu ni maprofeta, ni yaanilupattha. Atthu awo khanimusiveliha Muluku, nave itthu anipaka aya khasinaaphwanyiha mureerelo atthu.
16 Awo anneererya onikhoottiherya waalaleerya atthu ahikhanle ayuda, moota akhanle aya oowoopoliwa. Siiso, awo annitepa wuncererya itampi saya. Masi, oviruwa wa Muluku ohaaphwanya.
17 Axinnaka, khalai hiyo naahivalaana ni nyuwo okathi vakhaani, masi khinaavalanne vamurimani. Nto, okhala wira naaniphavela tthiri woowehani, naahiimananiha vanceene wira nirwe wooxukuryani.*
18 Tivonto, naaniphavela orwa wooxukuryani. Mweekeekhai, miyo Paulo, kaaheererya orwa ikwaha piili, masi Satana aahittiyelela ephiro ahu.
19 Okathi Apwiya Yesu anitthika* aya, taani anrowa okhala nlipelelo nahu, otteeliwa wahu murima ni etthuvo* ahu? Kiira ti nyuwo?
20 Mweekeekhai, nyuwo ti mukhanle ovuwa wahu ni otteeliwa wahu murima.
Inoota
^ Aahiiso, woonasa wene: “niwanaka vanceene”.
^ Ekereku, “osiveliwa vanceene”.
^ Ekereku, “niwehe owiitho wanyu”.
^ Nwehe Moolumo Ootthokiheriwa.
^ Ekereku, “ekhara”.
