1 aTesaloonika 3:1-13
3 Vano, okathi nahaawerya ahu ovilela-tho wunkheliwa wahu ni nyuwo, naahoona oreerela ohala mekhihu wAthena.
2 Nave, noomuruma Timootheyo, munnihu ni murumeyi a Muluku,* yoowo onilaleya ihapari sooreera sa Kristu, wira oolipiheni ni oomaaliheni, nave-tho olipihe waamini wanyu,
3 wira ohikhale mutthu aarowa otteettheya* mwaha wa mixankiho iya. Nyuwo munnisuwela wira hiyo khanikhanle oosyaka mixankiho iya.
4 Okathi naari ahu ni nyuwo, naanooleelani wira saamuniphwanya mixankiho. Nto eyo ti etthu eniiraneya, ntoko munisuwela anyu.
5 Tivo, okathi kahaaweryaaka-tho olipelela, kaahiruma wira kiruuheliwe ihapari sa ororomeleya wanyu. Tthiri, kaanoova wira Diabo aarowa oweehereryani. Siiso, muteko ahu waarowa okhala wa mahala.
6 Timootheyo onoophiya-ru nno okhumaka weiwo, nto ooniruuhela ihapari sooreera sa ororomeleya ni ophenta wanyu. Nave oonileela wira okathi wotheene munninuupuwela mutteeliwe ene murima ni munniphavela oniweha, ntoko hiyo nimphavela ahu woowehani.
7 Tivonto axinnaka, okathi wotheene naaxanka ahu* ni naahaawa ahu, naahilipihiwa mwaha wa nyuwo ni mwaha wa ororomeleya munooniherya anyu.
8 Vano nisuwenle ahu wira waataana wanyu ni Apwiya ti woolipa, hiyo noolipa.*
9 Tthiri, ninnimuxukhuru Muluku mwaha wa nyuwo, okhala wira munniniiriha otteeliwa murima vanceene.
10 Othana ni ohiyu hiyo ninnivekela vanceene, wira nooweheeni ni nookhaliheryeni ni etthu enoothowani wira mulipihe waamini wanyu.
11 Muluku, yoowo ori Tiithi ihu, ni Pwiya ahu Yesu, anikhaliherye orwa wa nyuwo.
12 Nave, Apwiya etepeke wuncererya ophentana wanyu ni waaphenta wanyu atthu otheene, ntoko hiyo nnoophentaahuni,
13 wira alipihe mirima sanyu, akhalihaka soohittheka ni soowaarya ohoolo wa Muluku Tiithi ihu, okathi Pwiya Yesu onitthika* awe ni arumeyi awe otheene oororomeleya.*
Inoota
^ Aahiiso, woonasa wene: “onivara muteko vamosa ni Muluku”.
^ Ekereku, “ottikinyeya”.
^ Ekereku, “naathoiwa ahu”.
^ Ekereku, “hiyo ninnikhala akumi”.
^ Nwehe Moolumo Ootthokiheriwa.
^ Ekereku, “oowaarya”.
