1 aTesaloonika 5:1-28
5 Axinnaka, nilavulaka sa okathi othanliwe, nyuwo khamuniphavela olepeliwa.
2 Nyuwo munnisuwela oratteene wira nihiku na Yehova, ninrwa ntoko latarau, ohiyu.
3 Okathi atthu anrowa aya ohimyaka wira: “Nookhalana murettele ni ovareleleya!”, nto anoopwetexiwa niinaano-ru ni vootutuxerya, siisaale ntoko owereya onimphwanya awe muthiyana oorupala ohanle oyara. Vano, awo khanrowa woopowa hata vakhaani.
4 Masi nyuwo axinnaka, khamukhanle mweepiphini ntoko alatarau, wira nihiku nlo noophwanyeeni vootutuxerya.
5 Mweekeekhai, otheene anyu mwa anamwane a muthuko ni anamwane a othana. Hiyo khanihiyo a ohiyu nnakhala a epiphi.
6 Tivo, nihirupeke ntoko atthu akina aniira aya, masi niwehaweheke ni nuupuweleke saana.
7 Ale anrupa, anrupa ohiyu, nave ale anihapaliwa, anihapaliwa ohiyu.
8 Masi, hiyo nri atthu a othana, nuupuweleke saana ni niware waamini ni ophenta, siisaale eniwariwa aya yoowara ya eyuuma enikhapelela epeeto,* nave niware nlipelelo na woopowa, ntoko ekapaseeti,
9 okhala wira Muluku khonithanlale wira oniviruwele, masi onithanlale wira noopowe, omurumeelaka Pwiya ahu, Yesu Kristu.
10 Yesu owo ohookhwa mwaha wa hiyo, wira hata noonaka aahiiso nirupaka,* nakhale akumi vamosa nuuwo.
11 Tivonto, mulipihaneke* ni mukhaliheryaneke mukina ni mukhwaawe, ntoko muniira anyu.
12 Axinnaka, ninnoovekelani wira mwaattittimiheke ale anivara muteko ni nthiti eriyari anyu, ni anoohoolelani mmutekoni mwa Apwiya, ni anoolopolani.
13 Nave mwaathokoreryeke vanceene ni waaphenta mwaha wa muteko anivara aya. Otheene anyu mukhaleke ni murettele.
14 Masi, ninnootumereryani nyuwo axinna, wira mwaalopoleke ale ahiniiwelela, mwaamaaliheke ale ariipiwe murima,* mwaakhaliheryeke ale ahilimpe, mwaapixeryeke murima atthu otheene.
15 Ohikhale mutthu iireliwe etthu yootakhala onrowa omuttikiherya etthu yootakhala mukhwaawe, masi okathi wotheene, mphaveleke wiirelana itthu sooreera, ni nwiireleke itthu sooreera atthu otheene.
16 Mutteeliweke murima okathi wotheene.
17 Nvekeleke voohihiyererya.
18 Mmuxukhureleke Muluku mwaha wa itthu sotheene. Ela ti etthu Muluku onaaphavelela awe ale animutthara Kristu Yesu.
19 Muhikhoottiherye munepa wa Muluku ovara muteko mookumini mwanyu.*
20 Muhithokoreryeke iprofesia ntoko itthu sihirina efaita.
21 Nvareryeke itthu sotheene, musuweleke ele eri yooloka. Nto nvarexexeke yeeyo.
22 Mukhootteke inamuna sotheene sa otakhala.
23 Kinvekela wira Muluku, yoowo onivaha murettele, ookhaliheni oowaarya wira nvare muteko awe. Nave, axinnaka, mikhalelo sotheene sooreera munooniherya anyu, ni okumi* anyu ni erutthu anyu, sakhaleke soohittheka ni sooreera mwa inamuna sotheene, okathi Pwiya ahu Yesu Kristu onitthika* awe.
24 Ole oniwiihanani toororomeleya, nave onimwiira siiso tthiri.
25 Axinnaka, muhihiyeke onivekelela.
26 Mwaakoheke ihaali anna otheene, mwaavahaka epeexo.*
27 Mwa nsina na Apwiya, ninnoovekelani wira epaphelo ela esomeliwe axinna otheene.
28 Oreera murima wuulupale wa Pwiya ahu Yesu Kristu, okhale ni nyuwo.
Inoota
^ Aahiiso, “etthirima”.
^ Aahiiso, “nirupaka mookhwaani”.
^ Aahiiso, “mmaalihaneke”.
^ Aahiiso, “akhulumunwe”.
^ Ekereku, “Muhittipihe mooro wa munepa”.
^ Nwehe Moolumo Ootthokiheriwa.
^ Nwehe Moolumo Ootthokiheriwa.
^ Makristau yaanikohana ihaali avahanaka epeexo okathi yaakumana aya.
