Mamwene Oopacerya 1:1-53
1 Mwene Davidi aahuuluvala vanceene, nnaamwi aakhuneeliwa ni manta, khoona oviha.
2 Vano arumeyi awe yaahimuhimeerya wiira: “Ohaaveriwe pwiyaka mwene mwali ohitonko orupa ni mulopwana, wiira omukhapeleleke ntoko nfirimeera awe. Owo onrowa wumpaathiki ni pwiyaka mwene, wiira mwene ooneeke oviha”.
3 Awo yaahivira-vira muttetthe wootheene a wIsarayeli amwaavyaka mwali ooreera, nto yaahimphwanya Abixagi, a oXunemi, ni yaahimuroiha wa mwene.
4 Mwali owo aari ootepa oreera. Owo aahikhala nfirimeera a mwene ni aanimukhapelela, masi mwene khaatonko orupana.
5 Adoniya, mwaana a Hagithi, aaniivuwiha ohimyaka wiira: “Miyo kinrowa okhala mwene!” Owo aahiruma opakeliwa ekaaro yaapuruliwa ni inama, aahikhalana anakhavalo, ni alopwana 50 yaatthimaka ohoolo wawe.
6 Masi paapa awe khaatonko ompwapwela ohimyaka wiira: “Xeeni munipaka anyu eyo?” Nave-tho Adoniya aari ooreera vanceene, maama awe aamuyanre nuumala omuyara Absalomi.
7 Adoniya, aahivaanela ni Yowabi mwaana a Seruwiya, ni namukuttho Abiyatari, nto awo yaaheemererya omukhaliherya Adoniya.
8 Masi namukuttho Sadoki, ni Benaya mwaana a Yehoyada, ni profeta Natani, Ximeyi, Reyi, ni anakhotto ootupa a Davidi, khiyaamukhalihenrye Adoniya.
9 Muhoolo mwaya, Adoniya aahivaha mukuttho wa ipwittipwitthi, ni ipooyi, ni inama sooneneva waattamela nluku na oSoheleti, nenlo naattamenle wEni-Rogeli. Owo ahaalattula axinna awe ootheene, anamwane a mwene, ni alopwana ootheene a oYuda, yaawo yaari arumeyi a mwene.
10 Masi khaamulattunle profeta Natani, Benaya ni anakhotto ootupa, nnakhala Salomoni, yoowo aari munna awe.
11 Moottharelana, Natani aahimuleela Bati-Xeba, maama awe Salomoni wiira: “Khamwiiwale wiira Adoniya, mwaana a Hagithi, ohiikhaliha mwene, ni wiira pwiyahu Davidi khonsuwela mwaha owo?
12 Vano, xontte mukiwiriyane. Mukihiye koovaheeni miruku, wiira moopole okumi anyu, ni okumi wa mwaninyu Salomoni.
13 Murowe wa mwene Davidi, ni mwamuleele wiira: ‘Pwiyaka mwene, khahiyo nyuwo mwaamuleihenrye murumeyi anyu, mwiiraka: “Mwaninyu Salomoni onrowa okhala mwene okiranttelaka miyo, ni ti yoowo onrowa okilaathi veehiceni vaka”? Nto xeeni Adoniya iikhalinhe awe mwene?’
14 Nlelo mulavulaka ni mwene, miyo kinimoorwa, ni kinimwaakhulela moolumo anyu”.
15 Siiso, Bati-Xeba aahikela okwaartu wa mwene. Mwene aari oowuuluvala vanceene, nave Abixagi, a oXunemi iira omukhapelelaka mwene.
16 Bati-Xeba aahikokhora uuramaka mpakha vathi ohoolo wa mwene, nto mwene aahimukoha wiira: “Mumphavela-ni?”
17 Bati-Xeba aahimwaakhula wiira: “Pwiyaka, nyuwo mwaahimulaiherya murumeyi anyu ni nsina na Yehova, Muluku anyu, mwiiraka: ‘Mwaninyu Salomoni onrowa okhala mwene okiranttelaka miyo, ni ti yoowo onrowa okilaathi veehiceni vaka’.
18 Masi, Adoniya ohiikhaliha mwene, nave pwiyaka mwene khonsuwela mwaha owo.
19 Owo oovaha mukuttho wa ipooyi, inama sooneneva ni ipwittipwitthi sinceene, nave ohaalattula anamwane ootheene a mwene, ni namukuttho Abiyatari ni xeefi a anakhotto Yowabi. Masi khomulattunle murumeyi anyu Salomoni.
20 Vano pwiyaka mwene, atthu ootheene a Isarayeli anoolipelelani nyuwo wiira mmuhimye ole onrowa okilaathi veehiceni vanyu ooranttelakani nyuwo.
21 Mwaahiire siiso, nuumala pwiyaka mwene orowa omumula ni amuhavinre awe, miyo ni mwanaka Salomoni ninrowa wooniwaka ntoko awanani”.
22 Nlelo Bati-Xeba olavulaka ni mwene, profeta Natani aahirwa.
23 Moowaakuveya mwene aahileeliwa wiira: “Profeta Natani ohoorwa!” Nto Natani aahirowa ohoolo wa mwene okokhora uuramaka mpakha vathi.
24 Natani aahihimya wiira: “Pwiyaka mwene, niireke nyuwo mootoko ohimya wiira: ‘Adoniya onrowa okhala mwene okiranttelaka miyo, ni ti yoowo onrowa okilaathi veehiceni vaka’?
25 Olelo Adoniya oronwe ovaha mukuttho wa ipooyi, inama sooneneva, ni ipwittipwitthi sinceene, nave ohaalattula anamwane ootheene a mwene, maxeefi a anakhotto, ni namukuttho Abiyatari. Awo ari wuuwu alyaaka ni awuryaka ni yena, ahimyaka wiira: ‘Mwene Adoniya okhaleke mahiku ootheene!’
26 Masi owo khokilattunle miyo murumeyi anyu, nnakhala namukuttho Sadoki, wala Benaya mwaana a Yehoyada, hata murumeyi anyu Salomoni.
27 Nyuwo pwiyaka mwene, niireke muheemererya etthu ela muhimulenle murumeyi anyu, tani onrowa okilaathi veehiceni vanyu ooranttelakani nyuwo?”
28 Mwene Davidi aahihimya wiira: “Kiihaneliwe Bati-Xeba”. Nto Bati-Xeba aahirwa eemela ohoolo wa mwene.
29 Vano mwene aahimmana natiri iiraka: “Ntoko siisaale Yehova onikhala awe, yoowo okooponle mixankiho sootheene,
30 nave ntoko siisaale kooleihenryaakani mwa nsina na Yehova, Muluku a Isarayeli, kiiraka: ‘Mwaninyu Salomoni onrowa okhala mwene okiranttelaka miyo, ni ti yoowo onrowa okilaathi veehiceni vaka, opuro aka!’, eyo ti etthu kinrowa aka opaka olelo”.
31 Bati-Xeba aahikokhora, uurama mpakha vathi ohoolo wa mwene, onahimya wiira: “Pwiyaka mwene Davidi okhaleleke mahiku ootheene!”
32 Moowaakuveya mwene Davidi aahihimya wiira: “Kiihaneliwe namukuttho Sadoki, profeta Natani, ni Benaya mwaana a Yehoyada”. Nto awo yaahirwa ohoolo wa mwene.
33 Mwene ahaahimeerya wiira: “Mwaakuxe arumeyi a pwiya anyu, ni mwanaka Salomoni, munwelihe mwaabuuru aka, mmuhoole oXihoni.
34 Namukuttho Sadoki, ni profeta Natani anoomukhaliha mwene a atthu a Isarayeli. Moottharelana moope nlope muhimyaka wiira: ‘Mwene Salomoni okhaleke mahiku ootheene!’
35 Vano okathi onhokolowa awe mmutthareke, owo onimoorwa ni onookilaathi veehiceni vaka. Miyo kinoomukhaliha mwene opuro aka, nave kinoomuthanla wiira okhale muhooleli a atthu a Isarayeli ni a Yuda”.
36 Benaya mwaana a Yehoyada, aahimwaakhula mwene oriki: “Amen! Yehova Muluku a pwiyaka mwene, eemererye eyo.
37 Ntoko sisaale Yehova aari awe ni pwiyaka mwene, okhale ni Salomoni, nave Muluku omwiirihe okhala ootepa ovuwa onvikana pwiyaka mwene Davidi”.
38 Moottharelana, namukuttho Sadoki, profeta Natani, Benaya mwaana a Yehoyada, akereti, ni apeleti, yaahirowa ni Salomoni onwenle ene mwaapuuru a mwene Davidi. Nto awo yaahimuhoola oXihoni.
39 Vano namukuttho Sadoki aahikuxa mutentani nnyaka naarina makhura, omwiitthela Salomoni. Siiso awo yaahipacerya woopa nlope, ni atthu ootheene yaahipacerya okhuwela yiiraka: “Mwene Salomoni okhaleke mahiku ootheene!”
40 Okathi Salomoni aatthika awe, atthu ootheene yaanimutthara, yoopaka iphivi* atteeliwe ene murima vanceene, mpakha elapo otetereya mwaha wa onyakula wa atthu awo.
41 Okathi Adoniya ni atthu ootheene aalattunle awe yaamalinhe aya olya, yaahiiwa onyakula iwo. Nuumala Yowabi wiiwa oruma wa nlope, owo aahikoha wiira: “Xeeni opooma ohireere aya onyakuliwa?”
42 Nlelo olavulaka, Yonathani mwaana a namukuttho Abiyatari aahiphiya. Moottharelana Adoniya aahihimya wiira: “Nvoloweke, okhala wiira nyuwo mwa mulopwana ooreera murima, nave munikiruuhela ihapari sooreera”.
43 Masi Yonathani aahimwaakhula Adoniya oriki: “Nnaari! Pwiya ahu mwene Davidi oomukhaliha Salomoni mwene.
44 Mwene aahimuruma namukuttho Sadoki, profeta Natani, Benaya mwaana a Yehoyada, akereti ni apeleti, onweliha Salomoni mwaapuru a mwene.
45 Namukuttho Sadoki ni profeta Natani yaahimuthanla Salomoni ntoko mwene oXihoni. Nuumala-vo, yaahitthika atteeliwe ene murima, nave atthu ootheene a opooma yaahitthapa. Tivo mwaiwa anyu onyakula iwo.
46 Nave-tho Salomoni aahikilaathi veehiceni ya mwene.
47 Etthu ekina, arumeyi a mwene yaahirwa anamuttottopela mwene Davidi ahimyaka wiira: ‘Muluku anyu iirihe nsina na Salomoni okhala nootepa ovuwa ovikana nsina nanyu, nave Muluku omwiirihe okhala ootepa ovuwa woovikanani nyuwo!’ Siiso mwene aahikokhora vakhaamani vawe wiira omulompe Muluku.
48 Nave mwene aahihimya wiira: ‘Ottottopeliwe Yehova Muluku a Isarayeli, yoowo olelo omuthanlale mutthu wiira okilaathi veehiceni vaka, ni okeemerenrye oweha eyo ni maitho aka!’”
49 Vano, atthu ootheene yaalattuliwe ni Adoniya, yaahoova, nto khula mmosa aahivenya onarowa.
50 Nave-tho Adoniya aahoova mwaha wa Salomoni. Tivo aahivenya, onarowa ovara manyaka waltaari.
51 Mwene Salomoni aahileeliwa wiira: “Adoniya onimoova mwene Salomoni, tivo oovara manyaka a waltaari, oriki: ‘Mwene Salomoni okileiherye miyo murumeyi awe, wiira khonrowa okiiva ni espaata’”.
52 Salomoni aahihimya wiira: “Apaka itthu sooloka, khiivo ekharari ya mmuruni mwawe enrowa omorela vathi. Masi, apaka etthu yootakhala, onimwiiviwa”.
53 Mwene Salomoni aahiruma okuruxiwa waltaari. Moottharelana Adoniya aahirwa uurama ohoolo wa mwene Salomoni, nuumala-vo Salomoni aahimuhimeerya wiira: “Murooke owannyinyu”.
Inoota
^ Aahiiso, “iflauta”.
