Mamwene Oopacerya 10:1-29
10 Pwiyamwene a oXeba, aahiiwa ovuwa Salomoni aarina awe mwaha wa nsina na Yehova, tivo aahirowa omweehererya ompakelaka makoho oovila.
2 Pwiyamwene owo aahirowa oYerusalemu ni ekrupu yuulupale ya arumeyi awe, ni ikamelo saakunxe makhura a baalsamu ni eweero yoowaatta ni maluku oowaarya. Aahirowa wa Salomoni, omuleela itthu sootheene saari vamurimani vawe.
3 Salomoni aahaakhula makoho ootheene a pwiyamwene owo. Khiivo etthu yaari yootepa ovila, mwene ahaawerya awe omutthokiherya.
4 Okathi pwiyamwene a oXeba aawenhe awe osuwela wootheene wa Salomoni, empa aatenke awe,
5 eyoolya yaakhala vameesa vawe, moota yaakilaathi aya arumeyi awe, ni oweha muteko yaavara aya ale yaarumeela vameesa ni ikuwo yaawara aya, alipa-oolawiha soowurya ni mikuttho aavaha awe khula nihiku mpaani mwa Yehova, khaarina etthu yoohimya.
6 Pwiyamwene owo aahimuhimeerya mwene wiira: “Itthu sootheene kiiwale aka kiri ene elapo aka, sa itthu mpanke anyu ni ankhili anyu, saari seekeekhai.
7 Masi miyo nkaakupanli itthu iyo saahimmwa, mpakha orwa ni oweha ni maitho aka ala. Mweekeekhai, nkaaleeliwe itthu sootheene. Ankhili anyu ni othaaciri wanyu, toowaatta ovikana itthu kaiwale aka.
8 Oohakalala atthu anyu, ni arumeyi anyu, yaawo aneemela ohoolo wanyu okathi wootheene, yaawiriyanaka ankhili anyu!
9 Ottottopeliwe Yehova Muluku anyu, yoowo osiveliwe ni nyuwo, ni owiirinheni okilaathi veehiceni va atthu a Isarayeli. Mwaha wa Yehova waaphenta atthu a Isarayeli voohimala, ohookhalihani mwene wiira mulamuleleke ni exariya ni ekeekhai”.
10 Moottharelana, pwiyamwene owo aahinvaha mwene italento* 120 sa eweero, makhura manceene a baalsamu, ni maluku oowaarya. Khatonko oruuhiwa makhura manceene a baalsamu ntoko ale pwiyamwene a oXeba anvanhe awe mwene Salomoni.
11 Apakiti anceene a Hirami, yaawo yaalovola eweero wOfiri, nave-tho, wOfiri weiwo yaahiruuha matera manceene a sandalu,* ni maluku oowaarya.
12 Mwene aahirumeela matera a sandalu, wiira olipihane empa ya Yehova, ni empa* ya mwene, ni aahaapaka aviola, ni ikaruma sikina sa masipo aavaha alipa-oowiipa. Khanaruuhiwe ni khanawehiwe matera a sandalu ntoko ale okhuma okathi ole mpakha olelo-va.
13 Mwene Salomoni aahinvaha pwiyamwene a oXeba itthu sootheene aaphavela awe ni aavekenle awe, nave-tho aahinvaha itthu sikina mwaha wa oreera wawe murima. Nuumala-vo, owo aahikhuma onatthikela elapo awe ni arumeyi awe.
14 Olemela wa eweero Salomoni aakhela awe khula eyaakha, waakhala wa italento 666.
15 Nave-tho, aanaakhela mpoosito wa alipa a nakoso, alipa a nakoso ooweetteetta, ni wa mamwene ootheene a wArabia ni makuvernatoro a mulaponi.
16 Mwene Salomoni aahipaka iskuutu suulupale 200 sa eweero yaatakaaheriwe eyuuma (khula eskuutu yaalemela ixeekele* 600 sa eweero).
17 Nave-tho aahipaka iskuutu saamukhaani 300 sa eweero saatakaaheriwe eyuuma (khula eskuutu yaamukhaani yaalemela ikarama 570 sa eweero). Moottharelana, mwene aahipweha mpaani mwawe, yiitthaniwa Empa ya Etakhwa ya oLiibano.
18 Nave, mwene aahipaka ehice yuulupale ya maino a etthepo, ni aahisirika ni eweero yooreerihiwa.
19 Wiira mutthu ophiye veehiceni-vo, aahaana owela eskatta mavalo 6, nave yaahikhala etthu yoovilikeya yaakhunela ehice eyo, ehice eyo yaahikhalana miyoono miili, khula mpantta wa moono, yaahikhala elatarato ya kharamu.
20 Mavalo awo 6 a eskatta, saahikhala ilatarato 12 sa akharamu, khula mpantta wa mavalo awo 6 yaahikhala elatarato emosa. Khuuvo omwene mukina waarina ehice yaalikana ni ele.
21 Ikoopho sootheene sa mwene Salomoni, saari sa eweero, ni mireerelo sootheene sa empa eniihaniwa etakhwa ya oLiibano, saari sa eweero yooreera. Khiyaakhanle etthu yaapakiwe ni eparatha, okhala wiira mahiku a Salomoni, eparatha khiyooneliwa vatthu.
22 Mwene aahikhalana apakiti anceene a oTaarisi, yaawo yeetta vamosa ni apakiti a Hirami, ekwaha emosa wa khula iyaakha tthaaru, apakiti awo a oTaarisi yaanirwa akunxe ene eweero, eparatha, maino a etthepo, akhole ni axipalame aalupale.
23 Mwene Salomoni aari oothaaciri vanceene, ni aahikhalana ankhili oowaatta, waavikana mamwene ootheene a valaponi.
24 Vano, atthu ootheene a valaponi, yaanirwa wiira yaawiriyane ankhili a Salomoni, yaawo Muluku anvahale awe.
25 Atthu awo ootheene yaanimuruuhela itthu ntoko: mireerelo sa eparatha, sa eweero, ikuwo, ikaruma sa ekhotto, makhura a baalsamu, ikhavalo ni axinama aniihaniwa muula. Eyo yiiraneya khula eyaakha.
26 Salomoni aanitepa wiithukumanyerya ikaaro sa ekhotto ni ikhavalo. Owo aahikhalana ikaaro sa ekhotto 1.400, ni ikhavalo 12.000, nave aanipweha ikaaro iyo sa ekhotto ni ikhavalo* mpooma ni oYerusalemu waattamela wa mwene.
27 Mwene aahisariha eparatha oYerusalemu, ntoko maluku, nave aahisariha matera a eseeturu, ntoko miri sa ifiiku sa oXefela.
28 Ikhavalo sa Salomoni saakumihiwa wExiitu. Ekrupu ya alipa a nakoso a mwene, yaanithuma makoto a ikhavalo* ni eperesu yaakhala aya.
29 Khula ekaaro ya ekhotto yaakumihiwa wExiitu, yaakhala musurukhu 600 wa eparatha, nave ekhavalo yaakhala musurukhu 150 wa eparatha. Nuumala-vo, yaanaaroihela mamwene ootheene a ahiti, ni mamwene a oSiiria.
Inoota
^ Etalento emosa yaalemela ikiilu 34.2. Munwehe Apendise B14.
^ Enamuna emosa ya matera, anipakeliwa itthu soovirikana sirina efaita yinceene.
^ “Aahiiso, epalaasio”.
^ Exeekele emosa yaalemela ikarama 11.4. Munwehe Apendise B14.
^ Aahiiso, “anakhavalo”.
^ Aahiiso, woonasa wene: “Okhuma wExiitu ni oKewe. Alipa a nakoso a mwene yaathuma oKewe”. Woonasa wene onihimmwa oSiliisiya.
