Mamwene Oopacerya 11:1-43
11 Ohiya paahi mwaana mwaamuthiyana a Farawo, mwene Salomoni aanaaphenta athiyana anceene a anamurwa, ntoko: athiyana a oMowabi, a wAmoni, a wEdomi, a oSiidoni ni ahiti.
2 Athiyana awo yaari a maloko yaawo Yehova aalenle awe aisarayeli oriki: “Muhitakaahane naawo,* nnakhala awo ahitakaahane ni nyuwo, okhala wiira mweekeekhai anoohapuxa murima anyu wiira mwaarumeeleke amuluku aya”. Vano Salomoni aahaataana ni aahisiveliwa naawo.
3 Owo aahikhalana axaarawe 700 yaawo yaakhala etthoko ya mwene, nave aahikhalana athiyana awe akina* 300. Vakhaani-vakhaani axaarawe awo yaahihapuxa murima awe.*
4 Salomoni vuuluvanle awe, axaarawe yaahihapuxa murima awe wiira aatthareke amuluku akina, nave khaamurumeela moomalela Yehova Muluku awe, ntoko siirale awe paapa awe, Davidi.
5 Salomoni aanimukokhorela Astoreti, muluku muthiyana a oSiidoni ni Milikomi, muluku oohiirya a wAmoni.
6 Nave, Salomoni aahipaka itthu soohiloka vamaithoni va Yehova, maana khaamutthanre moomalela Yehova, ntoko paapa awe, Davidi.
7 Tivonto, Salomoni aamutekenle awe opuro woorakamela osulu, Kemoxi, muluku oohiirya a oMowabi, ni Moloki muluku oohiirya a wAmoni, omwaako ohoolo wa oYerusalemu.
8 Eyo ti etthu aawiirenle awe axaarawe ootheene a ilapo sikina, yaawo yaavaha mwiixi wa mukuttho woopahiwa, ni yaavaha mikuttho amuluku aya.
9 Yehova aahinanariwa vanceene ni Salomoni, okhala wiira murima awe waahihiya omutthara Yehova, Muluku a Isarayeli, yoowo aamukhumelenle ikwaha piili,
10 nave yoowo aamuloponle mwaha wa etthu ene yeela, wiira ohaarumeele amuluku akina. Masi Salomoni khaiwelenle etthu Yehova aamurumme awe.
11 Nto Yehova aahimuleela Salomoni oriki: “Okhala wiira moopaka eyo, nave khamwiiwelenle nivarihano naka ni malamulo koorummyaakani, kinoowaakhani omwene ni kinonvaha mmosa a arumeyi anyu.
12 Mwaha wa paapa anyu Davidi, nkinrowa opaka eyo muri ene mukumi. Omwene owo kinrowa omwaakha mwaninyu,
13 masi nkinrowa omwaakha omwene wootheene. Kinonvaha mwaninyu nihimo nimosa, mwaha wa murumeyi aka Davidi, ni mwaha wa oYerusalemu, weiwo kithanlale aka”.
14 Yehova aahimukumiherya nwanani a Salomoni, yoowo aihaniwa Hadadi, a wEdomi, a etthoko ya mwene a wEdomi.
15 Okathi Davidi aaxinttale awe atthu a wEdomi, Yowabi xeefi a anakhotto aahivitha mirutthu, ni aaheererya waamala-maliha alopwana ootheene a wEdomi.
16 (Yowabi ni aisarayeli ootheene, yaahihala weiwo myeeri 6 mpakha waamala-maliha alopwana ootheene a wEdomi.)
17 Masi Hadadi ni arumeyi akina a paapa awe, yaawo yaari a wEdomi, yaahitthyawela wExiitu. Okathi ole Hadadi aari mmiravo.
18 Siiso awo yaahikhuma oMidiyani anarowa oParani. Nuumala-vo, yaahirowa wExiitu ni alopwana akina a oParani, yaahiphiya wa Farawo mwene a wExiitu, yoowo anvanhe Hadadi empa, eyoolya ni imatta.
19 Farawo aahisiveliwa vanceene ni Hadadi, mpakha omutheliha muhima awe mwaarawe. Mwaarawe Farawo aari pwiyamwene,* aihaniwa Tahapene.
20 Nuuvira okathi, muhima awe Tahapene, aahimuyara mwaana mwaamulopwana, aihaniwa Genubati. Vano Tahapene aahimuhuwa* mwaana owo etthoko ya Farawo, nto Genubati aahikhala etthoko ya Farawo ni anamwane a Farawo.
21 Hadadi aahiiwa ori ene wExiitu wiira Davidi aahirowa omumula ni amuhavinre awe, ni wiira Yowabi xeefi a anakhotto, aahikhwa. Nto Hadadi aahimuhimeerya Farawo wiira: “Mukihiye kitthikele elapo aka”.
22 Masi Farawo aahimukoha wiira: “Exeeni enoohaleelani opuro ola eniwiirihani ophavela otthikela elapo anyu?” Owo aahaakhula oriki: “Khiivo enkihaleela, masi xontte mukihiye kirooke”.
23 Muluku aahimukumiherya-tho nwanani mukina a Salomoni, aihaniwa Rezoni, mwaana a Eliyada, yoowo aamutthyanwe pwiyawe, Hadadezeri mwene a oSoba.
24 Okathi Davidi aaxinttale awe alopwana a oSoba, Rezoni aahaathukumanya alopwana akina wiira okhale xeefi a ekrupu emosa ya alavilavi. Nuumala-vo, awo yaahirowa oDamaasiko, anakhala weiwo ni yaahipacerya olamulela oDamaasiko.
25 Rezoni aahikhala nwanani a atthu a Isarayeli mahiku a Salomoni, incereryaka mixankiho saakumiheriwe ni Hadadi. Okathi Rezoni aalamulela awe oSiiria aanaanyokha aisarayeli.
26 Nave-tho, Yerobowamu mwaana a Nebathi aahipacerya onvirikanya mwene. Owo aari a nihimo na Efrayimi wa oSereda, nave aari murumeyi a Salomoni. Maama awe aari naamukhweli yoowo aihaniwa Seruwa,
27 Etthu yaamwiirinhe onvirikanya mwene tiila: Salomoni aahiteka opuro woorakamela osulu, ni aahilokiherya ixiri sa epooma ya Davidi, paapa awe.
28 Yerobowamu aari mulopwana oowerya. Okathi Salomoni aawenhe awe wiira aari mmiravo aakhalela nthiti ovara muteko, aahimuthanla wiira okhale muhooleli a atthu ootheene yaavara miteko sookhanyereriwa a etthoko ya Yosefe.
29 Okathi ole, Yerobowamu aahikhuma oYerusalemu. Profeta Ahiya, a oSilo, aahikumana ni yena mustaraatani. Ahiya aawanre nlaya nsya, nto oowanli aya yaari mekhaya omathalani.
30 Ahiya aahikuxa nlaya nsya aawanre awe, okawanya ipantte 12.
31 Moottharelana, Ahiya aahimuleela Yerobowamu wiira:
“Mukuxeke ipantte 10, okhala wiira enihimya awe Yehova Muluku a Isarayeli, tiila: ‘Kinoomwaakha omwene Salomoni, nave kinimoovahani, mahimo 10.
32 Masi owo onoohalana nihimo nimosa mwaha wa murumeyi aka Davidi ni mwaha wa oYerusalemu, epooma yeeyo kithanlale aka eriyari ya mahimo ootheene a Isarayeli.
33 Kinoopaka eyo okhala wiira awo aakihiya, anamukokhorela Astoreti, muluku muthiyana a atthu a oSiidoni, ni Kemoxi muluku a oMowabi, ni Milikomi muluku a atthu wAmoni. Nave-tho, awo khaneettela-tho iphiro saka apakaka ele eri yooloka vamaithoni vaka, ni yiiwelelaka ikano saka ni malamulo aka, ntoko paapa awe Davidi, iira awe.
34 Masi nkinrowa omwaakha omwene wootheene. Kinoomuhiya ntoko mukhulupale mahiku ootheene a okumi awe, mwaha wa murumeyi aka Davidi, yoowo kimuthanlale aka, okhala wiira owo aaniiwelela sooruma saka ni ikano saka.
35 Kinoomwaakha omwene owo mwanawe Salomoni, koovaheeni nyuwo mahimo 10.
36 Mwanawe kinrowa onvaha nihimo nimosa, wiira muthuko wa murumeyi aka Davidi, okathi wootheene okhaleke ohoolo waka oYerusalemu, epooma yeeyo kiithanlenle aka, wiira okhale opuro orina nsina naka.
37 Kinimoothanlani wiira mukhale mwene a atthu ootheene, ni mwaalamuleleke atthu ootheene a Isarayeli.
38 Mwaiwelela itthu sootheene kinoorumaakani, ni mweettela iphiro saka, mpakaka ele eri yooloka vamaithoni vaka, mwiiwelelaka ikano saka ni sooruma saka, ntoko murumeyi aka Davidi iira awe, kinookhala ni nyuwo. Kinimootekelani empa enikhala mahiku ootheene, ntoko kaamutekenle aka Davidi, nave kinimoovahereryani atthu a Isarayeli.
39 Kinimuulihiha muru osuulu wa Davidi, mwaha wa etthu ela, masi nkinrowa opaka eyo mahiku ootheene’”.
40 Salomoni aaheererya omwiiva Yerobowamu, masi Yerobowamu aahitthyawela wExiitu, wa Xixaki mwene a wExiitu. Owo aahikhala wExiitu mpakha Salomoni okhwa.
41 Itthu sikina siiraneyale ni Salomoni, itthu sootheene aapanke awe ni ankhili awe, soolempwa muliivuruni mwa soowiiraneya sa Salomoni.
42 Salomoni aavirinhe iyaakha 40 aalamulelaka atthu a Isarayeli, oYerusalemu.
43 Moottharelana, Salomoni aahirowa omumula ni amuhavinre awe, ovithiwa epooma ya Davidi, paapa awe. Vano mwanawe, Robowamu, aahikhala mwene nipuro nawe.
Inoota
^ Aahiiso, “muhaathele”.
^ Nwehe Moolumo Ootthokiheriwa ani: “Muthiyana Mukina”.
^ Aahiiso, “axaarawe yaahikhalana owerya wuulupale woomuhapuxa”.
^ Pwiyamwene yoowo ahaalamulela.
^ Aahiiso, woonasa wene: “aahimuhiiha waamwa”.
