Mamwene Oopacerya 20:1-43
20 Vano, Beni-Hadadi, mwene a oSiiria, aahaathukumanya anakhotto awe ootheene, ni mamwene makina 32, ni anakhavalo awe, ni ikaaro saya sa ekhotto. Owo aahirowa oSamariya, orukurerya epooma eyo, otuphela.
2 Moottharelana, Beni-Hadadi aahiruma oleeliwa mwene Akhabi, a wIsarayeli, aari opooma wiira: “Enihimya awe Beni-Hadadi tiila:
3 Eparatha anyu, ni eweero anyu ti yaawaka, nave axaarinyu ni aniinyu ooreerexa, taawaka’”.
4 Siiso, mwene a wIsarayeli aahimwaakhula wiira: “Ntoko sihimmye anyu, pwiya aka mwene, miyo kaawinyu ni itthu saka sootheene ti saawinyu”.
5 Muhoolo mwaya, alopwana ale yaarummwale yaahitthikela wa Akhabi anamuhimeerya wiira: “Enihimya awe Beni-Hadadi tiila: ‘Miyo kooruma wiira muleeliwe wiira: “Nyuwo munrowa okivaha eparatha anyu, eweero anyu, axaarinyu ni aniinyu”.
6 Masi, meelo ewoora ene yeela, kinimwaaruma arumeyi aka, nto awo anoovira-vira owannyinyu, ni owannyeya arumeyi anyu. Anookumiha, ni anookuxa itthu sootheene munoona anyu okhala sa faita’”.
7 Mwene a wIsarayeli aahaathukumanya axitokweene ootheene a elapo ele, onaahimeerya wiira: “Xontte, nwiriyane. Moone moota mulopwana ola olakenle awe onikumiherya ehasara, okhala wiira ooruma wiira kinvahererye axaaraka, anaaka, eparatha aka, ni eweero aka, nto miyo nkimukhoottihenrye itthu iyo”.
8 Vano, axitokweene ootheene, ni atthu ootheene yaahimuhimeerya wiira: “Muhimwiiwelele nnakhala muheemererye eyo”.
9 Owo aahaahimeerya alopwana ale yaarummwale ni Beni-Hadadi wiira: “Murowe mwamuleele pwiya aka mwene, wiira: ‘Murumeyi anyu ola onimwiira itthu sootheene nvekenle anyu woopaceryani, masi ele nvekenle anyu niinaano-va, nkiniira”’. Vano, alopwana ale yaahirowa omuleela Beni-Hadadi ihapari iyo.
10 Beni-Hadadi aahiruma oleeliwa Akhabi wiira: “Muluku okitakhalihe, ni otepe okitakhaliha, vakhala wiira ntthupi ninrowa ohala oSamariya nnoophiyerya waavaha anakhotto aka ootheene mmatatani!”.
11 Mwene a wIsarayeli aahaakhula oriki: “Mwamuleele Beni-Hadadi wiira: ‘Ehinatthi opacerya ekhotto muhiittottopeke okhalaka ntoko mooxintta ekhotto eyo’”.
12 Beni-Hadadi omalaka-ru wiiwa eyo, okathi aari awe ni mamwene makina ewuryaka mutentani* mwaya, aahaahimeerya arumeyi awe wiira: “Mwiilokiherye wiira naatuphele!” Vano awo yaahilokiherya wiira yatuphele epooma.
13 Masi profeta mmosa aahimwaattamela mwene Akhabi a wIsarayeli, onamuhimeerya wiira: “Enihimya awe Yehova tiila: ‘Munniweha muttitthi ola wootheene wa atthu? Olelo kinimoovahereryani mmatatani mwanyu, nto nyuwo munoosuwela wiira miyo ka Yehova’”.
14 Akhabi aahikoha wiira: “Moota xeeni?” Vano profeta owo aahimuhimeerya wiira: “Enihimya awe Yehova tiila: ‘Aarumeelaka arumeyi a makhulupale a iprovinsia’”. Nto Akhabi aahikoha-tho oriki: “Tani onrowa opaceriha ekhotto?” Vano owo aahimwaakhula oriki: “Ti nyuwo!”
15 Moottharelana, Akhabi aahakontari arumeyi a makhulupale a iprovinsia, aaphwanya 232. Nuumala-vo aahakontari alopwana ootheene a Isarayeli aaphwanya 7.000.
16 Awo yaahikhuma othana eriyari, okathi Beni-Hadadi aari awe mutentani ohapaliwaka ni mamwene makina 32 yaawo yaamukhaliherya.
17 Okathi arumeyi a makhulupale a iprovinsia yaapacerya aya ophiya, moowakuveya Beni-Hadadi aahaaruma alopwana. Awo yaahimuleela wiira: “Ahoorwa alopwana anikhuma oSamariya”.
18 Vano owo aahihimya wiira: “Akhala wiira anirweela murettele, mwaavare ari ene akumi; hata yaarweelaka ekhotto, nlelo mwaavare ari ene akumi”.
19 Okathi arumeyi a makhulupale a iprovinsia ni atoropa yaahoola yaakhumme aya opooma,
20 khula mmosa aahimwiiva nwanani awe. Vano atthu a oSiiria yaahitthyawa, nto atthu a Isarayeli yaahaatthimakela. Masi Beni-Hadadi, mwene a oSiiria aahitthyawa ni ekhavalo, ni anakhavalo akina.
21 Mwene a wIsarayeli, aahikhuma, otuphela ikhavalo ni ikaaro sa ekhotto, nto owo aahiwiiva atthu anceene a oSiiria.
22 Muhoolo mwaya, profeta ole aahimwaattamela mwene a wIsarayeli, onamuhimeerya wiira: “Murowe mwaalokiherye anakhotto anyu, ni muupuwele saana ele enrowa anyu opaka, okhala wiira woopaceryani wa eyaakha eyo, mwene a oSiiria onimoorwa wootuphelani”.
23 Vano arumeyi awe mwene a oSiiria, yaahimuhimeerya wiira: “Muluku aya, ti Muluku a miyaako. Tivo awo aniwenrye aya. Masi akhala wiira ninrowa owana ekhotto opuro woowaataleya, nnimwaawerya.
24 Nave-tho, mwiire so: Mwaakumihe mamwene ootheene okhottoni, mwaaranttelihe ni makuvernatoro.
25 Vano mwaathukumanye anakhotto anlikana ni anakhotto ale yiiviwe, nave-tho mwaattelo mmosa wa ikhavalo ni ikaaro sa ekhotto. Nrowe nawanane opuro woowaataleya, moohaanyiherya nnimwaawerya”. Nto owo aahiwiriyana miruku iye, ni aahiira siiso.
26 Wanipacerya wa eyaakha, Beni-Hadadi aahaathukumanya atthu a oSiiria, ni aahirowa wAfeki wiira awane ekhotto ni atthu a wIsarayeli.
27 Nave-tho, atthu a Isarayeli yaahithukumanyiwa, ni yaahivahiwa yoolya, vano awo yaahirowa okumana ni atthu a oSiiria. Okathi atthu a Isarayeli yaamanke aya ohoolo waya, awo yaakhala ntoko ikrupu piili saamukhaani sa ipuri, vano atthu a oSiiria yaahisareya muttetthe ole wootheene.
28 Vano mulopwana a Muluku eekeekhai, aahimwaattamela mwene a wIsarayeli onamuhimeerya wiira: “Enihimya awe Yehova tiila: ‘Okhala wiira atthu a oSiiria aahimya wiira, “Yehova ti Muluku a miyaako, khahiyo Muluku a mapuro oowaataleya”, kinimoovahereryani mmatatani mwanyu muttitthi ola muulupale wa atthu. Nto nyuwo munoosuwela wiira miyo ka Yehova”’.
29 Atthu a Isarayeli ni atthu a oSiiria yaahimaka opuro ole awehanaka ni awanani aya mpakha mahiku 7. Vano, nihiku na neethanu nenli yaahipacerya owaniwa ekhotto. Nihiku nimosa paahi, atthu a Isarayeli yaahiwiiva anakhotto yeetta mwentto 100.000 a oSiiria.
30 Anakhotto akina yaahanle yaahitthyawela wAfeki, akelasa mpooma. Masi exiri yaahaamorela alopwana 27.000 yaahanle, ewiiva. Nave, Beni-Hadadi, aahitthyawela mpooma, okela empa emosa, iipitha ekwartu ya muhina.
31 Vano arumeyi awe yaahimuhimeerya wiira: “Nwiriyane, khoo mwene, nihiiwa wiira mamwene a etthoko ya atthu a Isarayeli, mamwene oomoriwa ikharari.* Xontte, nrowe nakumane ni mwene a wIsarayeli niwanre ene isaakho muyuununi, nave niitthukwelenle ene mikhoyi mmuru. Woonasa wene, owo khonrowa owiivani”.
32 Arumeyi awe yaahiwara isaakho muyuununi, atthukwelela mikhoyi mmuru, enarowa okumana ni mwene a Isarayeli amuhimeerya wiira: “Murumeyi anyu Beni-Hadadi onihimya wiira: ‘Xontte, muhikiive’”. Mwene a wIsarayeli aahiwaakhula oriki: “Owo nlelo mukumi? Owo munnaka”.
33 Okathi alopwana ale yaiwale aya eyo, yaahoona wiira yaari etthu yooreera. Nto attharaka ele mwene aahimmye awe, yaahaakhula ariki: “Aayo, Beni-Hadadi munninyu”. Vano mwene a wIsarayeli aahaahimeerya wiira: “Mmurowele, mukiruuhele”. Vano, Beni-Hadadi aahiivahererya wa mwene, nto Akhabi aahinweliha mukaaroni mwawe ya ekhotto.
34 Beni-Hadadi ahimuhimeerya Akhabi wiira: “Kinimoottikiheryani ipooma, paapa aka aamwaakhale awe paapa anyu, nave nyuwo pooti opaka imerkaatu oDamaasiko, ntoko paapa aka opanke awe oSamariya”.
Akhabi aahaakhula wiira: “Mwaha wa nivarihano nenla, kinimoohiyani murowoka”. Siiso, Akhabi aahipaka nivarihano ni Beni-Hadadi, onamuhiya orowaka.
35 Mmosa a anamwane a maprofeta,* oleeliwaka ni Yehova, aahimuleela mukhwaawe wiira: “Xontte, mukimane”. Masi mulopwana owo aahikhootta ommana.
36 Vano, mulopwana owo aahimuhimeerya wiira: “Okhala wiira khanwiriyanne nsu na Yehova, mukhumaka-ru va, kharamu onoowiivani”. Nuumala mulopwana owo okhuma, aahitupheliwa ni kharamu, iiviwa.
37 Owo aahimphwanya mulopwana mukina omuhimeerya wiira: “Xontte, mukimane”. Vano mulopwana owo aahimmana, onvulaliha.
38 Moottharelana, profeta owo aahiwara ikuwo sikina, iitthukwelela owiitho ni nleeso, onarowa omulipelela mwene mphironi.
39 Okathi mwene aavira awe, mulopwana owo aahimukhuwelela onamuhimeerya wiira: “Murumeyi anyu ola aari opuro waawaniwa ekhotto, vano mulopwana mmosa aahimuruuha nanvariwa mmosa onahimya wiira: ‘Munwehaweheke mulopwana ola. Atthyawa vale, ti nyuwo munrowa oliva ni okumi anyu, aahiiso munrowa oliva etalento* emosa ya eparatha’.
40 Nto okathi murumeyi anyu ola aaluttuweliwe awe miteko sikina, mootutuxerya mulopwana owo aahitthyawa”. Vano mwene a wIsarayeli aahimuhimeerya mulopwana owo wiira: “Ti nyuwo mwiiphukenle mmansinyu, maana ti nyuwo muhimmye siiso”.
41 Moowakuveya, mulopwana owo aahikumiha nleeso owiitho wawe, nto mwene a wIsarayeli aahisuwela wiira aari mmosa a maprofeta.
42 Mulopwana owo aahimuhimeerya mwene wiira: “Enihimya awe Yehova tiila: ‘Okhala wiira moomuhiya otthyawaka mmatatani mwanyu mulopwana koohimenryaakani wiira mwaahaana ompwetexa, nyuwo munimookhwa nipuro nawe, nave atthu anyu animookhwa nipuro na atthu awe’”.
43 Nuumala-vo, mwene a wIsarayeli aahirowa owannyawe oSamariya, ovirikanyiwa ene ni oriipiwe ene murima.
Inoota
^ Aahiiso, “muheemani; mmaxaxani”.
^ Aahiiso, “arina ophenta woororomeleya”.
^ “Anamwane a maprofeta” vanikhala wiira enihimmwa exikola yiixuttihiwa aya maprofeta aahiiso muthenkeso mmosa wa maprofeta.
^ Etalento emosa yaalemela ikiilu 34.2. Munwehe Apendise B14.