Mamwene Oopacerya 21:1-29
21 Nuumala itthu iyo, waahikhumelela mwaha waavarihana ni ematta ya ewuuva ya Nabothi a oYezireyeli. Ematta eyo yaari oYezireyeli, waattamana ni epalaasio ya Akhabi, mwene a oSamariya.
2 Akhabi aahimuleela wiira: “Mukivahe ematta anyu ya ewuuva wiira kipake ewortha aka, okhala wiira yaattamenle owannyaka. Miyo kinimoovahani ematta ekina yooloka ya ewuuva. Aahiiso mwaphavela, kinimoolivani musurukhu”.
3 Masi Nabothi aahimwaakhula Akhabi oriki: “Kittharaka moonelo wa Yehova, nkinikhala-khala koovahakani etthu kihiyeriwe aka ni amuhavinre aka”.
4 Akhabi aahirowa owannyawe, ovirikanyiwe ene ni oriipiwe ene murima mwaha wa etthu Nabothi a oYezireyeli aamwaakhunle awe, oriki: “Nkinoovahani etthu kihiyeriwe aka ni amuhavinre aka”. Moottharelana Akhabi aahimmaathi vakhaamani wawe onaweha exiri, ohinaphavela olya.
5 Mwaarawe Akhabi, Yezabeli, aahirowa opuro ammaathale awe onamukoha oriki: “Xeeni muhireere anyu onanariwa muhinaphavela olya?”
6 Akhabi aahaakhula wiira: “Mwaha woowi kinvekenle Nabothi a oYezireyeli wiira: ‘Mukitumiherye ematta anyu ya ewuuva. Aahiiso mwaphavela, miyo kinimoovahani ematta ekina ya ewuuva’. Masi Nabothi onahimya wiira: ‘Nkinoovahani ematta aka ya ewuuva’”.
7 Vano mwaarawe, Yezabeli, aahimuleela wiira: “Nyuwo khamuhiyo mwene a wIsarayeli? Nvenye, mulye etthu nave mutteeliweke murima. Kinimoovahani ematta ya ewuuva ya Nabothi, a oYezireyeli”.
8 Siiso Yezabeli aahilepa ikarta ni nsina na Akhabi, otthittya ni ekanyeryo ya mwene, aaroihela axitokweene ni makhulupale yaakhala epooma ya Nabothi.
9 Mukartani-mmo Yezabeli aalempe so: “Mwaarume atthu ootheene atthukwe, nave mmukilaathihe Nabothi ohoolo wa atthu.
10 Mwaakilathihe alopwana anli ahirina efaita ohoolo wawe, wiira amootherye ahimyaka wiira: ‘Moomutakhaliha Muluku ni mwene!’ Nuumala-vo mmukumiherye ota wa epooma, munvonyakase maluku mpakha omwiiva”.
11 Alopwana a epooma eyo, axitokweene ni makhulupale yaakhala epooma eyo, yaahiira siiso ntoko yaalempwale aya mukartani Yezabeli aaroihenle awe.
12 Awo yaahaaruma atthu ootheene otthukwa, ni yaahimukilaathiha Nabothi ohoolo wa atthu.
13 Alopwana anli ahirina efaita yaahirwa akilaathi ohoolo wawe anamootherya Nabothi ohoolo wa atthu ahimyaka wiira: “Nabothi oomutakhaliha Muluku ni mwene!” Nuumala-vo awo yaahimukumiherya ota wa epooma anvonyakasa maluku mpakha omwiiva.
14 Vano awo yaahiruma oleeliwa Yezabeli wiira: “Nabothi oovonyakasiwa maluku mpakha wiiviwa”.
15 Moowaakuveya, nuumala Yezabeli wiiwa wiira Nabothi oovonyiwa maluku mpakha wiiviwa, owo aahimuleela Akhabi wiira: “Mwakuxeke ematta ya ewuuva ya Nabothi a oYezireyeli, yoowo aakhoottale wootumiheryani, okhala wiira vano khahiyo-tho mukumi, ohookhwa”.
16 Akhabi omalaka-ru wiiwa wiira Nabothi aahikhwa, aahirowa ematta ya ewuuva ya Nabothi a oYezireyeli, okuxa ematta eyo.
17 Masi Yehova aahimuleela Eliya a oTiixibi wiira:
18 “Nvenye, murowe mwakumane ni Akhabi mwene a wIsarayeli, yoowo onikhala oSamariya. Owo ori ematta ya ewuuva ya Nabothi, okhala wiira oronwe okuxa ematta eyo.
19 Mwamuhimeerye Akhabi wiira: ‘Enihimya awe Yehova tiila: “Nyuwo moomwiiva mulopwana wiira mukuxe ematta awe?”’ Nave mwamuleele wiira: ‘Enihimya awe Yehova tiila: “Opuro alapwa alante aya ephome ya Nabothi, alapwa anoolata ephome anyu”’”.
20 Akhabi aahimuleela Eliya wiira: “Nyuwo nwanani aka, mookiphwanya-tho?” Eliya aahaakhula wiira: “Aayo kihoophwanyani. ‘Okhala wiira nyuwo moolakela opaka itthu soohiloka vamaithoni va Yehova,
21 kinimooruhelani ehasara, kinimoomala-malihani ni kinimwaamala-maliha alopwana ootheene* a etthoko ya Akhabi wIsarayeli, waahela muhina ale ahinikhaliheriwa ni ootteettheya.
22 Etthoko anyu, kinimwiiriha etthu emosa-ru kiirinhe aka etthoko ya Yerobowamu, mwaana a Nebathi, ni etthoko ya Bayexa, mwaana a Ahiya, okhala wiira mookiiriha onanariwa ni muhaatthekiha aisarayeli’.
23 Nave, omuhimyaka Yezabeli, Yehova oohimya wiira: ‘Alapwa anoomukhuura Yezabeli muttetthe wa oYezireyeli.
24 Khula mutthu a etthoko ya Akhabi onrowa okhwela opooma, alapwa anoomukhuura, ale anrowa okhwela otakhwani axipalame a musulu anoomukhuura.
25 Khotonko okhala mutthu olakenle opaka etthu yootakhala vamaithoni va Yehova ntoko Akhabi, yoowo aatumereriwe ni mwaarawe Yezabeli.
26 Owo aanipaka itthu sootepa ohiirya aakokhorelaka amuluku eethiru oohiirya,* ntoko yiira aya atthu ootheene a wAmori, yaawo Yehova aawoomonle awe ohoolo wa aisarayeli’”.
27 Nuumala Akhabi wiiwa moolumo ala, aahikhera ikuwo sawe, owara isaakho, onapacerya otthukwa. Owo aarupa vasaakhoni, ni eetta oriipiwe ene murima.
28 Eliya a oTiixibi aahiiwa moolumo a Yehova yaahimya wiira:
29 “Monweha Akhabi moota iiyevinhe awe mwaha wa miyo? Okhala wiira ohiiyeviha mwaha wa miyo, nkinrowa omuruuhela ehasara ori ene mukumi. Kinrowa okumiherya ehasara etthoko awe mahiku a mwanawe”.
Inoota
^ Eheeberi, “ootheene ale anirusela exiri”. moolumo a eheeberi anooniherya onyohola, yaarumeeliwa ehimmwaka alopwana.
^ Nuulumo na eheeberi, woonasa wene ninvarihana ni nuulumo noowi “eturumu” nenno ninrumeeliwa ephavelaka ohimmwa etthu yoohiirya.
