Mamwene Oopacerya 4:1-34
4 Mwene Salomoni taalamulela wIsarayeli wootheene.
2 Makhulupale a Salomoni taala: Azariya mwaana a Sadoki, aari namukuttho;
3 Elihorefi ni Ahiya, anamwane a Xixa yaari masekretaario;Yosafati mwaana a Ahiludi, aari mulipa oolepa;
4 Benaya mwaana a Yehoyada, aari xeefi a anakhotto; Sadoki ni Abiyatari, yaari anamukuttho;
5 Azariya mwaana a Natani, taaweherya makuvernatoro; Zabudi mwaana a Natani, aari namukuttho ni mpatthani a mwene;
6 Ahixari, taaweherya empa, nave Adonirami mwaana a Aabida, taaweherya ale yaavarihiwa miteko sookhanyereriwa.
7 Salomoni aahikhalana makuvernatoro 12 wIsarayeli wootheene, yaawo yaamuroihela eyoolya mwene ni atthu a etthoko awe. Khula mmosa aahikhalana muritti wooruuha eyoolya mweeri mmosa vamwaakhani.
8 Masina aya taala: Mwaana a Huri, taaweherya muttetthe wa omiyaakoni wa Efrayimi;
9 mwaana a Dekeri, taaweherya oMakasi, oXaalabimi, oBethi-Xemexi, ni wEloni-Bethi-Hanani;
10 mwaana a Hesedi, taaweherya wArubothi, (taaweherya oSoko wootheene ni elapo yootheene ya oHeferi;
11 mwaana a Abinadabi, taaweherya mattumuxa* ootheene a oDori, (Tafathi, mwaana a Salomoni, aari mwaarawe);
12 Bayana, mwaana a Ahiludi, taaweherya oTaanaki, oMegido, ni muttetthe wootheene wa oBethi-Xeyani, yoowo onivahana mukano ni muttetthe wa oSartani, mukerekhere mwa oYezireyeli, okhuma oBethi-Xeyani, ovira wAbeli-Mehola, mpakha muttetthe wa oYokomowami;
13 mwaana a Geberi, taaweherya oRamothi-Xileyaadi, (taaweherya mittetthe sa itenta sa Yayiri, mwaana a Manase, seiyo siri oXileyaadi. Nave-tho, taaweherya muttetthe wa wArgobi onikhala oBaxani: Ipooma suulupale 60 saarina ixiri, mikhora, ni itaranka sa ekoopiri);
14 Ahinadabi mwaana a Ido, taaweherya oMahanayimi;
15 Ahimaasi, taaweherya oNefetali (owo aahimuthela mwaana mwaamuthiyana mukina a Salomoni aihaniwa Basemathi);
16 Bayana mwaana a Huxayi, taaweherya wAxeri ni oBeyalothi;
17 Yosafati mwaana a Paruwa, taaweherya wIsakari;
18 Ximeyi mwaana a Ela, taaweherya muttetthe wa nihimo na Beniyamini;
19 Geberi, mwaana a Uri, taaweherya elapo ya oXileyaadi, eyo piiyo, elapo ya Sihoni, mwene a Amori, ni Ogi mwene a oBaxani. Nave-tho, aahikhala kuvernatoro mmosa aahoolela makuvernatoro ala ootheene.
20 Atthu a Yuda ni Isarayeli yaari oowaatta ntoko mihaava sa ophareya. Awo yaanilya, yaaniwurya ni yaanihakalala.
21 Salomoni anilamulela ilapo sootheene okhuma muro Eufrate, mpakha muttetthe wa afilisti ophiyerya mukano wa wExiitu. Ilapo iyo saanimuroihela mpoosito ni saaninvarela muteko Salomoni mahiku ootheene a okumi awe.
22 Khula nihiku, eyoolya ya Salomoni yaakhala ikooro 30* ya ephepa yooreerexa, ni ikooro 60* ya ephepa ekina,
23 ipooyi 10 sooneneva, ipooyi 20 soohineneva, ni ipwittipwitthi 100. Ohiya-vo, saahikhala inamuna soovirikana sa anaahe, ni axipalame ooneneva.
24 Owo taaweherya itthu sootheene mpantta ola wa muro, okhuma oTiifisa mpakha oGaza, waahela muhina mamwene ootheene a mpantta ola wa muro.* Nave aahikhalana murettele ni mittetthe sootheene, saamurukurenrye.
25 Mahiku ootheene a Salomoni, atthu a oYuda ni a Isarayeli, yaahikhala oovareleleya, okhuma oDani mpakha oBeri-Xeba. Khula mutthu aanikilaathi vathi wa mwiri awe wa evidera ni vathi va mwiri awe wa efiiku.
26 Salomoni aahikhalana mapuro 4.000* saapwehiwa ikhavalo saapurula ikaaro sawe, nave aahikhalana ikhavalo 12.000.
27 Makuvernatoro awe yaahikhalana muritti wa omuroihela eyoolya mwene Salomoni ni atthu ootheene yaalya vameesa va mwene Salomoni. Khula mmosa aahikhalana muritti wa oroiha eyoolya mweeri mmosa ni oweha vakhala wiira khiivo etthu yaathowa.
28 Awo-tho yaaniruuha malaxi oowuuma ni soolya sikina soovirikana sa ikhavalo. Khula mmosa aniruuha moovarihana ni muteko aathanleliwe awe.
29 Muluku aahinvaha Salomoni ankhili anceene, ni osuwela wuulupale, ni miruku sinceene ntoko mihaava sa ophareya.
30 Ankhili a Salomoni yaanaavikana ankhili a atthu ootheene a mpantta onikhuma nsuwa ni ankhili a atthu ootheene a wExiitu.
31 Khuuvo mutthu anvikana yena. Owo aari a miruku onvikana Etani, a oZerahi, ni Hemani, Kalikoli, ni Dara, anamwane a Maholi. Ovuwa wawe waahimwareela mittetthe sootheene saamwaattamenle.
32 Salomoni aahilavula mihapo 3.000 ni isipo sawe saari 1.005.
33 Owo aanisuwela otthokiherya miri, okhuma mwiri wa eseeturu* wa oLiibano mpakha mutathi oniihaniwa isopo, yoowo oninnuwa vaxirini. Nave-tho, aanisuwela otthokiherya inama, axipalame, inama siniipurula vathi, inama sinivava ni ihopa.
34 Atthu a maloko ootheene yaanirwa waawiriyana ankhili a Salomoni, waahela muhina mamwene a ilapo sootheene yaawo yaiwale ahimmwaka ankhili awe.
Inoota
^ Aahiiso, “miyaako saamukhaani”.
^ Ekooro emosa yaakhala iliituru 220. Munwehe Apendise B14.
^ Ekooro emosa yaakhala iliituru 220. Munwehe Apendise B14.
^ Eyo piiyo, mpantta onikela nsuwa wa muro Eufrate.
^ Nummeru nla ninniphwanyaneya soolempwa sikina sa khalai ni yoolepa ekina enlikana ni ela. Soolempwa sikina sa khalai sinihimya wiira 40.000.
^ Miri iya sinlikana ni mwiri oniihaniwa pinyeiro, seiyo sinaattela wunnuwa oLiibano.
