Mamwene Oopacerya 6:1-38
6 Waattamela eyaakha ya 480, nuumala aisarayeli* okhuma elapo ya wExiitu, mwaakha wa neexexe nuumala Salomoni okhalihiwa mwene a wIsarayeli, mweeri wa Zivi* (eyo piiyo, mweeri wa nenli), Salomoni aahipacerya oteka empa ya Yehova.*
2 Empa mwene Salomoni aamutekenle awe Yehova, erakamelo aya yaari ya ikoovatu* 60, okhuveya waya waari wa ikoovatu 20, nave orakamela waya osulu waari wa ikoovatu 30.
3 Epantta ya ohoolo wa etemplo, naahikhala niphiryo, naalikana ni okhuveya wa etemplo: naarina ikoovatu 20. Niphiryo nlo naanincererya ikoovatu 10 erakamelo ya empa.
4 Owo aahipakela empa eyo ixanela saamukhaani.
5 Nave-tho aahiteka empa ekina yaaphiteerya ixiri sa empa eyo. Empa eyo ekina yaarukurenrye ixiri sa etemplo, eyo piiyo, ixiri sa opuro woowaarya* ni sa empa ya muhina.* Nave aahipaka isaala mukerekhere mwa empa eyo.
6 Empa eyo ekina, antaari oopacerya, okhuveya wawe waari wa ikoovatu 5, antaari a eriyari, okhuveya wawe waari wa ikoovatu 6, nave antaari a osulu, okhuveya wawe waari wa ikoovatu 7. Ixiri iyo sootheene saarukurenrye empa eyo, antaari a vathi yaari a mwiitti ovikana exiri ya antaari a eriyari. Nave antaari a eriyari yaari a mwiitti waavikana antaari a osulu. Aahipaka eyo wiira ixiri sa empa eyo sihipakiwe iviika.
7 Empa eyo yaatekiwe ni maluku oopwexiwa ni oolokiheriwa. Tivo okathi yaatekiwa aya, khivaiwanyeya oruma wa martelu, maxatto, nnakhala ikaruma sikina sa eyuuma.
8 Mukhora wa antaari a vathi waarina isaala mukerekhere, waari mpantta wa osuuli* wa empa. Nave-tho, yaahikhala eskatta, yaawela mpakha antaari a nenli, nave eskatta ekina, yaakhuma antaari a nenli erowaka antaari a neeraru.
9 Owo khaahiyale oteka empa eyo mpakha omaliha. Aahitthunyela empa eyo ni miri sa eseeturu, othataka ithaapwa sa eseeturu.
10 Salomoni aahiteka isaala mukerekhere mwa empa eyo yootheene, khula esaala orakamela waya osulu waari wa ikoovatu 5, nave saahilupanyiwa ni empa arumeeliwaka matera a eseeturu.
11 Nto Yehova aahimuhimeerya Salomoni wiira:
12 “Empa ela muniteka anyu, mwaiwelela sooruma saka, mwatthara ikano saka, mweettelaka malamulo aka ootheene, kinoowiirelani ele kaamuleihenrye aka paapa anyu, Davidi.
13 Nave miyo kinrowa okhalaka eriyari ya aisarayeli, ni nkinrowa waanyanyala atthu aka aisarayeli”.
14 Salomoni khaahiyale oteka empa eyo, mpakha omaliha.
15 Owo aahiteka ixiri sa muhina sa empa eyo, ni ithaapwa sa eseeturu. Nave aahivirihela ixiri sa muhina ni matera, okhuma vathi wa empa eyo mpakha iviika sa etarato. Nave vathi va empa eyo aahaatala ithaapwa sa xuniipero.
16 Ottuli wa empa eyo, aahiteka esaala yaarina ikoovatu 20. Esaala eyo aatenke ni ithaapwa sa eseeturu, okhuma vathi mpakha osulu, nave muhina mwaya waari Nipuro Noowaaryexa.
17 Mpantta wa ohoolo wa etemplo* (eyo piiyo empa ya Muluku), yaahikhala esaala yoowaarya yaarina ikoovatu 40.
18 Matera a eseeturu a muhina mwa empa, yaahipatthiwa ilatarato sa ikahi ni ifilori soothapuluwa. Sootheene saari sa eseeturu; ni nihinooneya nnakhala nluku.
19 Salomoni aahipaka esaala ekina muhina mwa empa, wiira opwehe nivuku na nivarihano na Yehova.
20 Esaala ya muhina, orakama waya waari wa ikoovatu 20, okhuveya waya waari wa ikoovatu 20 ni orakamela waya osulu waari wa ikoovatu 20. Owo aahisirikela ni eweero yooreeraxa; altari aamuthante ni miri sa eseeturu.
21 Salomoni aahisirika muhina mwa empa eyo ni eweero yooreera, ni aahihela ikwirinti sa eweero ohoolo wa esaala ya muhina, yeeyo yaasirikiwe ni eweero.
22 Salomoni aahisirika empa yootheene ni eweero mpakha omalihiwa, nave aahaasirika altari ootheene ni eweero, yaawo yaari waattamela esaala ya muhina.
23 Esaala ya muhina ahaapaka makerubi manli ni matera a pinyeiro,* khula kerubi orakamela wawe osulu waari wa ikoovatu 10.
24 Nipupha nimosa na kerubi naarina ikoovatu 5, nave nipupha nikina naarina ikoovatu 5. Okhuma oponta wa nipupha nimosa mpakha oponta wa nipupha nikina waari wa ikoovatu 10.
25 Nave-tho kerubi a nenli aarina ikoovatu 10. Nto makerubi oowanli yaarina munnuwelo ni makhalelo mamosa-ru.
26 Kerubi mmosa orakamela wawe osulu waari ikoovatu 10, nave kerubi mukina aarina irakamelo imosa-ru.
27 Moottharelana, owo ahaapweha makerubi empa ya muhina.* Vano mapupha a makerubi yahitapuruxiwa. Nipupha na kerubi mmosa naanikwannya epantta emosa ya exiri, nave nipupha na kerubi mukina naanikwannya epantta ekina ya exiri. Mapupha aya makina yaahitapuruxeliwa eriyari ya empa, nto mapupha awo yaahikwannyana.
28 Vano makerubi awo yaahisirikeliwa eweero.
29 Nave, ixiri sootheene sa empa, eyo piiyo, esaala ya muhina, ni esaala ya ota, saahilempwa ilatarato sa makerubi, miri sa mikole, ni ifilori soothapuluwa.
30 Empa ya muhina ni ya ota vathi vaya yaahisirikiwa ni eweero.
31 Nave empa ya muhina aahipaka mikhora sa epinyeiro, ipilaari khula mpantta, ni epantta ya osulu, ntoko epantte ya neethanu.*
32 Mikhora iyo miili saapakiwe ni matera a epinyeiro, aahipaka ilatarato sa makerubi, mikole, ni ifilori soothapuluwa, osirika ni eweero. Nave aahisirika ni eweero yoomaniwa ni martelu, ilatarato iyo sa makerubi ni miri sa mikole.
33 Nave, mukhora wa etemplo,* aahipaka epantta ya osulu ni matera a epinyeiro, yeeyo yaari epantta ya neexexe.*
34 Aahipaka mikhora miili sa matera orumeelaka mwiri oniihaniwa xuniipero. Mukhora mmosa waahikhalana masele manli yaahuleya ni itoopratisa, nave mukhora mukina waahikhalana masele manli yaahuleya ni itopratisa.
35 Masele awo aahipaka ilatarato sa makerubi, mikole ni ifilori soothapuluwa, osirikela eweero ilatarato iyo.
36 Owo aahiteka muuru wa nivate na muhina. Iliinya tthaaru saari sa maluku oopwexiwa ni oolokiheriwa, ni eliinya emosa yaari ya matera a eseeturu.
37 Alisenso a empa ya Yehova yaapaceriwe otekiwa eyaakha ya neexexe, mweeri wa Zivi.*
38 Nto eyaakha ya namuloko namosa, mweeri wa Buli* (eyo piiyo, mweeri wa neethanu neeraru), empa eyo yaahimalihiwa ni itthu sootheene, ntoko yuupuweleliwe aya otekiwa. Salomoni aamalinhe iyaakha 7 otekaka empa eyo.
Inoota
^ Eheeberi, “anamwane a Isarayeli”.
^ Munwehe Apendise B15.
^ Munwehe Apendise B8.
^ Ekoovatu emosa enikhala isentiimeturu 44.5. Munwehe Apendise B14.
^ Eheeberi, “etemplo”. Woonasa wene onihimmwa opuro woowaarya.
^ Eyo piiyo, opuro woowaaryaxa.
^ Eheeberi, “moono woolopwana”.
^ Eyo piiyo, Nipuro Noowaarya, naakhala mpantta wa ohoolo wa Nipuro Noowaaryexa.
^ Woonasa wene pinyeiro a wAlebo.
^ Eyo piiyo, Nipuro Noowaaryexa.
^ Woonasa wene onihimmwa opuro waaheliwa aya mikhora iyo, aahiiso waahimmwa munnuwelo wa mikhora iyo.
^ Onihimmwa opuro woowaarya.
^ Woonasa wene enihimmwa epantte yaaheliwa mukhora aahiiso waahimmwa munnuwelo wa mikhora.
^ Munwehe Apendise B15.
^ Munwehe Apendise B15.
