Mamwene Oopacerya 7:1-51
7 Salomoni aahiviriha iyaakha 13 otekaka empa* awe, mpakha omaliha empa yootheene.
2 Nave aahiteka empa yiihaniwa etakhwa ya oLiibano, orakama waya waari wa ikoovatu* 100, okhuveya waya waari wa ikoovatu 50, ni orakamela waya osulu waari wa ikoovatu 30. Empa eyo yaatekiwe vasulu wa iliinya xexe sa ipilaari sa eseeturu, seiyo vasulu vaya saathatiwe ithaapwa sa eseeturu.
3 Vasulu va empa eyo, saari ithaapwa sa eseeturu, seiyo saari vasulu va ipilaari; ithaapwa iyo saari 45, khula eliinya saari 15.
4 Empa eyo yaarina iliinya tthaaru sa ixanela, khula eliinya ya ixanela yaari vasulu va eliinya ekina. Nave khula exanela yaawehana ni exanela ya mpantta mukina.
5 Mikhora sootheene ni ipantta sa osulu sa mikhora iyo saarina ipantte xexe, ntoko mpantta wa ohoolo wa ixanela, seiyo saawehana ni ixanela sikina saarina iliinya tthaaru sa mpantta mukina.
6 Aahiteka-tho esaala ya ipilaari, orakama waya waari wa ikoovatu 50 ni okhuveya waya waari wa ikoovatu 30. Ohoolo waya aahihela mukhora waarina ipilaari ni epwaro.
7 Nave aahiteka esaala yaari aya ehice, weiwo aarowa awe ophukaka milattu, eyo piiyo, esaala ya ophukela. Esaala eyo yaahiviriheliwa eseeturu, okhuma vathi mpakha osulu.
8 Empa* aarowa awe okhalaka-mo, yaatekiwe mpantta mukina wa nivate ottuli wa esaala* eyo. Nave Salomoni aahimutekela empa yaalikana ni esaala eyo, mwaana mwaamuthiyana a Farawo, yoowo aamukunxe awe wiira okhale mwaarawe.
9 Ipa iyo sootheene, okhuma alisenso mpakha osulu saamalela ixiri, nave mpantta wa ota mpakha nivate nuulupale, saatekiwe ni maluku a musurukhu munceene yaawo yaapwexiwe alokiheriwa ni aserariwa ni aseera a maluku, muhina ni ota.
10 Alisenso aya, aatekiwe ni maluku maalupale ni a musurukhu munceene. Maluku makina yaari a ikoovatu 10, vano makina yaari a ikoovatu 8.
11 Nave vasulu va maluku awo, yaahikhala-tho maluku makina a musurukhu munceene, yaawo yaapwexiwe alokiheriwa. Nave-tho, yaahikhala matera a eseeturu.
12 Mukerekhere mwa nivate nuulupale, saahikhala iliinya tthaaru sa maluku oopwexiwa ni oolokiheriwa, ni eliinya emosa ya matera a eseeturu mpantta wa osulu, saalikana niiye saari niyate na muhina na empa ya Yehova ni vamukhora va empa eyo.
13 Mwene Salomoni aahiruma oroweliwa Hirami, oTiro.
14 Owo aari mwaana a muthiyana naamukhweli a nihimo na Nefetali, nave paapa awe aari mulipa-oohana ekoopiri, a oTiro. Hirami, aanirattela, aanisuwela, ni aanivara muteko oratteene ni mithinto soovirikana sa ekoopiri. Nto aahirowa wa mwene Salomoni ni aahinvarela miteko sootheene.
15 Owo aahiteka ipilaari piili sa ekoopiri. Khula epilaari orakamela waya osulu waari wa ikoovatu 18, nave orukurerya waya waari wa ikoovatu 12.
16 Nave, aahipaka malipiheryo manli wiira ohele vasulu va ipilaari iyo. Nlipiheryo nimosa orakamela waya osulu waari wa ikoovatu 5, nave nlipiheryo nikina orakamela waya osulu waari wa ikoovatu 5.
17 Nlipiheryo nlo naari vasulu va khula epilaari, naahikhalana etthu yaalikana ni reeti a eyuuma ni ikwirinti sootthaveleliwa. Nlipiheryo nimosa naarina 7, vano nlipiheryo nikina naarina 7.
18 Owo aahipaka iliinya piili sa ilatarato sa muhokorokho oniitthaniwa roma, saamurukurerya reeti wiira sikhuneeleke malipiheryo yaakhala vasulu va ipilaari. Aahipaka etthu emosa-ru ni malipiheryo oomanli.
19 Malipiheryo awo yaari vasulu va ipilaari, seiyo saari vamukhora, yaalikana ni ifilori sa mmatta,* orakamela waya osulu waari wa ikoovatu 4.
20 Malipiheryo awo, yaari vasulu va ipilaari piili, osulu wa mpantta woovilikeya waarukureriwe ni areeti. Nave saahikhala iliinya sa ilatarato 200 sa mihokorokho siniitthaniwa roma saarukurerya khula nlipiheryo.
21 Owo aaheemexa ipilaari vamukhora va etemplo.* Epilaari eemenxe awe moono woolopwana,* aahivaha nsina noowi Yakini* vano epilaari eemenxe awe moono woothiyana* aahivaha nsina noowi Bowazi.*
22 Vasulu va ipilaari iyo, waalikana ni ifilori sa mmatta.* Nto muteko wootheene wootekiwa ipilaari waahimalihiwa.
23 Moottharelana, aahipaka epasiya yuulupale ya maasi yaihaniwa ephareya ya ekoopiri. Epasiya eyo yaari yoovilikeya, okhuma mpantta mmosa wa eyano aya mpakha mpantta mukina, waarina ikoovatu 10, orakamela waya osulu waari wa ikoovatu 5 ni orukurerya waya waari wa ikoovatu 30.
24 Mukerekhere mwa vathi wa eyano ya epasiya eyo ya maasi, saahikhala ilatarato saareeriha, saalikana ni ikahi, khula ikoovatu 10, seiyo saari mukerekhere mwa epasiya eyo yootheene, ni iliinya piili sa ilatarato sa ekahi.
25 Epasiya eyo, yaari vasulu va ipooyi 12, tthaaru saaweha onorti, tthaaru saaweha mpantta onikela nsuwa, tthaaru saaweha osuuli, nave tthaaru saaweha mpantta onikhuma nsuwa. Epasiya eyo ya maasi, yaari vasulu va ipooyi iyo. Epantte ya ottuli ya ipooyi iyo, yaari eriyari ya epasiya eyo.
26 Mwiitti aya, waalikana ni wunnuwa wa ntata.* Nave eyano aya, yaari ntoko eyano ya ekaalisi, yaalikana ni efilori ya mmatta. Epasiya eyo, yaanikela ipaathi* 2.000 sa maasi.
27 Nto, owo aahipaka ikarinya* 10 sa ekoopiri. Khula ekarinya orakama waya waari wa ikoovatu xexe, okhuveya waya waari wa ikoovatu xexe, ni orakamela waya osulu waari wa ikoovatu tthaaru.
28 Ikarinyu iyo, saapakiwe so: Ipantta saya saari sa ekoopiri, nave ipantta iyo saalupanyiwe ni aaro a ekoopiri.
29 Nave, eriyari ya ipantte iyo ni aaro, saahikhala ilatarato sa akharamu, ipooyi, ni makerubi, nave-tho saahikhala ilatarato simosa-ru osulu wa aaro awo. Osulu ni vathi wa akharamu ni inyompe saahikhala ilatarato saareeriha soovilikeya.
30 Nave, khula ekarinya yaarina maroota maxexe a ekoopiri ni eexo a ekoopiri, yaawo yaakhala ipantte xexe. Vathi va epasiya eyo yaahikhala etthu yaavarelela, yaarina ilatarato soovilikeya saareeriha khula mpantta.
31 Mwiithe aya waakhala muhina mwa ekhara, ni orakamela waya osulu waari wa ekoovatu emosa. Mwiithe owo, waari vasulu va ekhara waari woorukurerya, nave saahikhala itthu saavarelela, seiyo munnuwelo aya waari wa ekoovatu emosa ni orakamela waya osulu waari wa ekoovatu emosa nnimeya. Nave ekhara eyo yaahikhalana ilatarato. Ipantta saari mukerekhere, saari soowookololowa ohiya soovilikeya.
32 Maroota oomaxexe, yaari vathi wa ipantta saari mukerekhere wa ekarinyu eyo, nave epantte yaakhaliherya maroota awo yaalupanyiwe vakarinyuni, ni orakamela waya osulu khula nroota waari wa ekoovatu emosa nnimeya.
33 Maroota awo yaari ntoko maroota a ekaaro ya ekhotto. Ipantta saakhaliherya, aaro, iraiyo ni ikuupu, sootheene saari sa eyuuma yoohaniwa.
34 Ipantta xexe sa ekarinyu, khula mpantta yaahikhala etthu emosa yaalupanyiwa ni ekarinyu eyo. Itthu iyo saapakiwe ni eyuuma yoohaniwa ntoko mpantta wa ekarinyu eyo.
35 Epantta ya osulu ya ekarinyu yaahikhala etthu yoovilikeya, orakamela waya osulu waari wa nimeya na ekoovatu. Epantte eyo ya osulu wa ekarinyu, ilatarato ni ipantta sa mukerekhere, saari soohaniwa ntoko etthu yaapakeliwe ekarinyu.
36 Vasulu va ilatarato iyo ni ipantta sa mukerekhere, saahipakiwa ilatarato sa makerubi, akharamu ni mikole, khula elatarato opuro aya. Nave-tho, saahikhala ilatarato soovilikeya saareeriha mukerekhere mootheene.
37 Ela enamuna saapakiwe aya ikarinyu iye 10. Sootheene saapakiwe mwa enamuna emosa-ru, munnuwelo mmosa-ru ni makhalelo mamosa-ru.
38 Nave-tho, owo aahipaka ipasiya 10 sa ekoopiri. Khula epasiya yaanikela ipaathi 40 sa maasi. Khula epasiya yaarina ikoovatu 4. Ikarinyu iyo 10, khula ekarinyu yaahikhalana epasiya emosa.
39 Moottharelana, aahipweha ikarinyu 5 mpantta woolopwana wa empa, ni aahipweha ikarinyu 5 mpantta woothiyana wa empa. Nave-tho aahipweha epasiya yuulupale ya ekoopiri yaaheliwa maasi moono woolopwana wa empa, eriyari ya osuuli ni mpantta onikhuma nsuwa.
40 Nave, Hirami aahipaka ipasiya, ipoxolo, ni itixela. Siiso, Hirami aahimaliha muteko wootheene anvarela awe mwene Salomoni, empa ya Yehova:
41 ipilaari piili ni malipiheryo manli yaalikana ni itixela, yaari vasulu va ipilaari iyo piili. Areeti anli yaari vasulu va malipiheryo awo manli, yaawo yaari vasulu va ipilaari;
42 mihokorokho 400 siniihaniwa roma sa areeti anli, eyo piiyo, iliinya piili sa mihokorokho siniihaniwa roma khula reeti, wiira sikhuneele malipiheryo manli yaalikana ni itixela yaari vasulu va ipilaari piili;
43 ikarinya 10 ni ipasiya 10 saari mukarinyani;
44 epasiya yuulupale ya ekoopiri yaaheliwa maasi ni ipooyi 12 saari vathi va epasiya eyo;
45 ikaruma sootheene saarumeeliwa, ipoxolo, itixela ni ikaruma sikina, Hirami aahimpakela mwene Salomoni ni ekoopiri yooreerihiwa, wiira sirumeeliweke empa ya Yehova.
46 Mwene Salomoni aahiruma ototoxiwa ekoopiri eyo, opuro waapakiwa mireerelo sa oloko, edistritu ya oYordani, eriyari ya oSukothi ni oSartani.
47 Salomoni khaapesanri ikaruma sootheene, okhala wiira khisaareere waatta. Nto khivaasuweliwa olemela wa ekoopiri yootheene.
48 Salomoni aahipaka ikaruma iyo sootheene wiira sirumeeliweke empa ya Yehova: altaari a eweero; meesa a eweero yaapwehiwa iphaawu saavahiwa Muluku;
49 ni mithuko sa eweero yooreera, mithanu saari moono woolopwana, nave mithanu saari moono woothiyana ohoolo wa esaala ya muhina; ni ifilori soothapuluwa, mithuko, ni ipanelo saattipihaniwa ntthampo, sa eweero;
50 ipasiya, itisora saathikilaniwa ntthampo noovya, itixela, ikoopho, ni ekaruma yaaheliwa mooro ya eweero yooreera; nave-tho, saahikhala ivarelelo vamukhora va empa ya muhina, eyo piiyo, Nipuro Noowaaryexa ni mikhora sa empa ya etemplo, sa eweero.
51 Siiso, mwene Salomoni aahimaliha muteko wootheene wa oteka empa ya Yehova. Salomoni aahiruuha itthu sootheene paapa awe, Davidi, aakhalinhe awe soowaarya, ni aahipweha eparatha, eweero ni ikaruma sootheene opuro waasukiwa aya mihakhu sa empa ya Yehova.
Inoota
^ Aahiiso, “epalaasio”.
^ Ekoovatu emosa enikhala isentiimeturu 44.5. Munwehe Apendise B14
^ Aahiiso, “Epalaasio”.
^ Eheeberi, “empa ya esaala”.
^ Aahiiso, “iliiriyu”.
^ Onihimmwa opuro woowaarya.
^ Aahiiso, “osuuli”.
^ Nsina nintaphulela “owo [eyo piiyo Yehova] olipiherye”.
^ Aahiiso, “onorti”.
^ Waanyiheryasa nintaphulela “ni ikuru”.
^ Aahiiso, “iliiriyu”.
^ Etthu yoowiiraka isentiimeturu 7, 4. Munwehe Apendise B14.
^ Etthu yoowiiraka iliituru 44.000. Munwehe Apendise B14.
^ Aahiiso, “ikarinyu saalovolaniwa maasi”.
