Mamwene Oopacerya 9:1-28
9 Nuumala Salomoni omaliha oteka empa ya Yehova, empa* ya mwene, ni itthu sootheene Salomoni aaphavela awe opaka,
2 Yehova aahimukhumelela Salomoni ekwaha ya nenli, ntoko aamukhumelenle awe oXibeyoni.
3 Yehova aahimuhimeerya wiira: “Kihiiwa nivekelo nanyu ni etthu evekenle anyu ohoolo waka. Kooreeriha empa ela mutenke anyu, kiirihaka nsina naka okhala weiwo mahiku ootheene, nave maitho aka ni murima aka anrowa okhalaka weiwo okathi wootheene.
4 Nave nyuwo, akhala wiira munimweetta ohoolo waka ntoko paapa anyu Davidi eettale awe, ni murima anyu wootheene ni exariya, mpakaka itthu sootheene koorumalyaakani, mwiiwelelaka ikano saka ni malamulo aka,
5 nto kinoolipiha ehice ya omwene anyu eriyari ya atthu a Isarayeli mahiku ootheene, ntoko kaamuleihenrye aka paapa anyu Davidi kiiraka: ‘Okathi wootheene osuulu anyu onrowa okilaathiki veehiceni va atthu a Isarayeli’.
6 Masi akhala wiira nyuwo ni aniinyu munoohiya okitthara ni munoohiya weettela sooruma saka ni malamulo aka koovahalyaakani, munarowa waarumeela amuluku akina, mwaakokhorelaka yaawo,
7 kinimwaakumiha atthu a Isarayeli elapo kaavanhe aka, nave empa ela kireerinhe aka erina nsina naka kinookumiha ohoolo waka, ni atthu a Isarayeli anoothanyiwaka ni anootheiwa ni atthu ootheene.
8 Nave empa ela enoopwexakasiwa ni enoothatuwa milepe. Khula mutthu onrowa oviraka opuro ola onoowehaka otikinihiwe ene, onimoopaka muturi ni onookohaka wiira: ‘Xeeni Yehova ohalaka wiiriha siisa elapo ela ni empa ela?
9 Awo animwaakhula wiira: ‘Mwaha woowi aamunyanyala Yehova, Muluku aya, yoowo aakuminhe amuhavinre aya elapo ya wExiitu, anaweettela amuluku akina, anaakokhorela ni anaarumeela yaawo. Tivo Yehova aakumihenrye awe ehasara ela yootheene’”.
10 Nuumala iyaakha 20 Salomoni aavirinhe awe otekaka ipa iye piili, empa ya Yehova ni empa ya mwene,
11 Hirami, mwene a oTiro, aahinvaha Salomoni matera a eseeturu ni a xuniiperu, ni eweero yootheene Salomoni aaphavela awe, tivo mwene Salomoni aahinvaha Hirami ipooma 20 sa elapo ya oGalileya.
12 Siiso, Hirami aahikhuma oTiro wiira awehe ipooma Salomoni anvanhe awe, masi ipooma iyo khisaamusivenle.*
13 Hirami aahikoha wiira: “Munnaka, ipooma xeeni iye mukivanhe anyu?” Tivo ipooma iye siniihaniwa aya muttetthe wa oKabuli* mpakha olelo-va.
14 Hirami aahimuroihela mwene italento* 120 sa eweero.
15 Yoowiiraneya ela ti ya atthu mwene Salomoni aawiihanenle awe ovara muteko wookhanyereriwa wa oteka empa ya Yehova, empa awe, opuro woottukhuwa waihaniwa Milo, ixiri sa oYerusalemu, sa oHasori, sa oMegido, ni sa oXezeri.
16 (Farawo, mwene a wExiitu, aahituphela ni aahikuxa epooma ya oXezeri, opaha ni mooro, ni owiiva akanaani yaakhala epooma eyo. Nuumala-vo, aahinvaha epooma eyo mwanawe mwaamuthiyana ntoko yoovaha ya ekasamento, yoowo aatheliwe ni Salomoni.)
17 Salomoni aahiteka* epooma ya oXezeri, oBethi-Horoni wookhuruwa,
18 oBaalathi, ni oTamari, mpantta wa woothakoni wa elapo ele,
19 nave-tho, aahiteka ipooma saari arumasiya a Salomoni, ipooma sa ikaaro saapuruliwa ni inama, ipooma sa anakhavalo, ni khula etthu Salomoni aaphavela awe oteka oYerusalemu, oLiibano ni ilapo sootheene aalamulela awe.
20 Vano, atthu ootheene yaahanle a wAmori, ahiti, aperizi, ahivi ni ayebusi, yaawo yahiirela mpantta atthu a Isarayeli,
21 yaari a osuulu wa atthu yaakhala elapo ele, yaawo aisarayeli yahaawenrya aya waamala-maliha, mwene Salomoni aahaakuxa wiira avareke muteko wookhanyereriwa ntoko ipottha mpakha olelo-va.
22 Masi Salomoni khaakhalinhe aisarayeli ipottha, okhala wiira awo yaari anakhotto awe, arumeyi, makhulupale awe, anamakhaliherya awe, maxeefi awe a ikaaro saapuruliwa ni inama ni anakhavalo.
23 Yaahikhala maxeefi 550 a ahooleli, yaawo yaaweherya muteko wooteka wa Salomoni. Awo yaari makapataaxi a anamuteko.
24 Mwaana mwaamuthiyana a Farawo aahikhuma epooma ya Davidi, onarowa empa, Salomoni aamutekenle awe. Moottharelana, Salomoni aahiteka opuro woottukhuwa waihaniwa Milo.*
25 Ikwaha tthaaru vamwaakhani, Salomoni aanivaha mikuttho soopahiwa ni mikuttho sa opatthani valtaari aamutekenle awe Yehova. Nave-tho, owo aanivaha mwiixi wa mukuttho woopahiwa valtaari, yoowo aari ohoolo wa Yehova. Siiso aahimaliha empa ele.
26 Mwene Salomoni aahaapaka apakiti anceene wEsiyoni-Geberi, waattamela wElothi, mukerekhere mwa ephareya Yooxeerya, elapo ya wEdomi.
27 Hirami aahaaruma arumeyi awe, yaawo yaasuwela oweettiha oratteene apakiti, vamosa ni apakiti awo, wiira yavareke muteko vamosa ni arumeyi awe Salomoni.
28 Awo yaahirowa wOfiri, ni yaahikuxa weiwo italento 420 sa eweero, amuroihela mwene Salomoni.
Inoota
^ Aahiiso, “epalaasio”.
^ Eheeberi, “khahiyo saari sooloka vamaithoni vawe”.
^ Aahiiso, woonasa wene: “muttetthe ohirina efaita”.
^ Etalento emosa yaalemela ikiilu 34.2. Munwehe Apendise B14.
^ Aahiiso, “aahilipiha”.
^ Nuulumo na eheeberi nintaphulela “osariha”.
