1 Pedru 4:1-19
4 Okhala wira Kristu aahihaawa ori ene pinaatamu, nave-tho nyuwo mwiilokiherye wira muupuweleke ntoko Kristu, maana mutthu onihaawa, onnooniherya wira oohiya opaka itampi.
2 Siiso, nlelo mutthu owo ori ene mukumi, ophaveleke opaka etthu Muluku oniphavela awe, ohiya sinaasivela atthu.
3 Khalai, mooviriha okathi munceene mpakaka itthu sinipakiwa ni atthu a mulaponi, ntoko mweettelo woohiloka onooniherya ohuuliwa muru,* ophavela itthu sootakhala, ohapaliwa, ifesta sootakhala,* owuryexa ni okokhorela ilatarato.*
4 Atthu awo khanisuwela nthowa naya vano muhinipaka anyu itthu sootakhala mwaavara anyu hoothe, tivonto anilavula aya itthu sootakhala yoohimyakani nyuwo.
5 Masi, atthu awo animwaakhula ohoolo wa Kristu, yoowo onrowa waaphukela atthu akumi ni alipa-ookhwa.
6 Tivonto alipa-ookhwa yaalaleeriwe aya ihapari sooreera, wira nnaamwi aphukeliwaka ntoko aniphukeliwa aya apinaatamu, awo awerye okhala akumi yeettihiwaka ni ikuru sa Muluku.*
7 Masi, omala wa itthu sotheene ori vakhiviru. Tivonto, mukhalaneke muupuwelo wooloka, ni nvekeleke okathi wotheene.*
8 Ohiya-vo, mphentaneke vanceenexa, okhala wira ophenta onnikhuneela itampi sinceene.
9 Mwaakhelaneke muhinlaseyaka.
10 Khula etthu mutthu ovahiwa awe ni Muluku, orumeeleke wira aavareleke muteko akina ntoko murumeyi ooloka, oreereliwe murima vaalupale ni Muluku. Oreera murima iwo, onooniheriwa mwa inamuna soovirikana.
11 Akhala mutthu onlavula, olavuleke ntoko onilavula moolumo a Muluku; akhala mutthu onirumeela, opakeke eyo olipanaka ikuru sinikhuma wa Muluku; wira mwa itthu sotheene, Muluku ovuwihiwe mwaha wa Yesu Kristu. Muluku ookhalana ovuwa ni owerya mahiku otheene ni voohimala. Amen.
12 Annaka oophentiwa, muhitikinihiweke okathi sinoophwanyaayani sooweeha suulupale,* vanakhala ntoko wira itthu iyo khasitonko owiiraneelani.
13 Ohiya-vo, mutteeliweke murima okhala wira munnihaawa ntoko aahanwe awe Kristu, wira okathi ovuwa wawe onrowa aya wooniheriwa, mutepeke otteeliwa murima.
14 Nyuwo mwa atthu oohakalala, mwaaruwaniwaka mwaha wa nsina na Kristu, maana munepa woowaarya wa Muluku* ni ovuwa waya, ori ni nyuwo.
15 Ohikhale mwa nyuwo onihaawa mwaha wookhala nawiive, latarau, mutakhali aahiiso mutthu a ohankawaani.
16 Masi akhala mutthu onihaawa mwaha wookhala mukristau, ohuuliwe muru, ohiya-vo, onvuwiheke Muluku, eettelaka ekristau.
17 Tthiri woophiya okathi wira opacerye ophukela. Nto ophukela iwo onipacerya ni atthu a Muluku.* Vano akhala wira ti hiyo ninrowa opacerya ophukeliwa, nto exeeni enrowa owiiraneela ale ahiniiwelela ihapari sooreera sa Muluku?
18 “Vakhala wira naxariya ohaana wiimananiha vanceene wira oopoliwe ni Muluku, nto exeeni enrowa omwiiraneela mutthu ohinimwiiwelela Muluku ni natampi?”
19 Tivonto, ale anihaawa mwaha woopaka ele Muluku oniphavela awe, yiivahereryeke ni murima aya wotheene wa Mpattuxa oororomeleya, avaraka miteko sooreera.
Inoota
^ Ekereku, aselgéia. Nwehe Moolumo Ootthokiheriwa ani: “Mweettelo Woohiloka Onooniherya Ohuuliwa Muru”.
^ Ifesta seiye khula mutthu onipaka awe etthu eniphavela awe.
^ Aahiiso, “ilatarato sinikokhoreliwa ni anatiini”.
^ Aahiiso, “munepa wa Muluku”.
^ Aahiiso, “okathi wotheene mukhaleke oolikana ene wira nvekeleke”.
^ Aahiiso, “sinlikana ni mooro”.
^ Aahiiso, “ikuru sa Muluku”. Nwehe Moolumo Ootthokiheriwa ani: “Munepa woowaarya”.
^ Ekereku, “empa ya Muluku”.
