Samuweli Oopacerya 11:1-15
11 Vano Nahaxi, mwene a wAmoni, aahirwa ni anakhotto awe omaka epooma ya oYabexi, oXileyaadi. Alopwana ootheene a oYabexi yaahimuhimeerya Nahaxi wiira: “Mpake nivarihano ni hiyo, nto nnimoorumeelani”.
2 Nahaxi aahiwaakhula wiira: “Aayo, kinoopaka nivarihano ni nyuwo, vakhala wiira ootheene anyu kinimookumihani maitho oolopwana. Kinoopaka eyo wiira aisarayeli ootheene yoone ehaaya”.
3 Makhulupale a oYabexi yaahimwaakhula wiira: “Munivahe mahiku 7, wiira naarume alopwana orowa mittetthe sootheene sa aisarayeli. Aahikhumelele mutthu oonoopola, nnimoorumeelakani”.
4 Alopwana awo yaahirowa oXibeya, epooma aakhala awe Sawuli, ni yaahaaleela atthu moolumo awo. Vano, atthu ootheene yaahipacerya wunla vanceene.
5 Okathi ene yoowo, Sawuli iira okhumaka omatta, oomolelaka inama, onakoha wiira: “Exeeni ekhumelenle? Xeeni atthu aninla aya?” Nto, aahileeliwa ele alopwana a oYabexi yaahimmye aya.
6 Nuumala wiiwa moolumo ala, munepa wa Muluku waahinvaha ikuru Sawuli, ni aahinanariwa vanceene.
7 Owo aahikuxa ipooyi piili, othikilasa ipetaasu sene, ni aaruma alopwana oroiha ipetaasu iyo muttetthe wa Isarayeli, ariki: “Ela ti etthu enrowa aya wiirihiwa, ipooyi sa atthu yaale ahinrowa omutthara Sawuli ni Samuweli!” Vano Yehova aahiwiiriha atthu woova. Tivo atthu ootheene yaahivenya moowiiwanana.*
8 Sawuli aahaakontari atthu oBezeki: aisarayeli yaari 300.000, nave alopwana a nihimo na Yuda yaari 30.000.
9 Moottharelana, Sawuli ni anakhotto awe yaahaaleela alopwana yarwaale wiira: “Mwaaleele alopwana a oYabexi, oXileyaadi wiira: ‘Meelo okathi nsuwa ninrowa aya oviha, munimoopoliwa’”. Siiso, alopwana awo yaahirowa waaleela alopwana a oYabexi, nto awo yaahihakalala vanceene.
10 Alopwana a oYabexi, yaahimuleela Nahaaxi wiira: “Meelo nnimwiivahererya wa nyuwo, wiira muniiriheke ele enoona anyu oreerela”.
11 Mmeeloni mwaya, Sawuli aahaakawanya atoropa ikrupu tthaaru. Nto oxaka,* Sawuli ni anakhotto awe, yaahaatuphela awanani aya, ni yaahiwiiva atthu a wAmoni mpakha waattamela othana eriyari. Ale yooponwe yaahimwara-mwareya, ahinaphwanyaneya anli-anli.
12 Atthu yaahimukoha Samuweli wiira: “Ari vai alopwana ale yaahimya wiira: ‘Niireke Sawuli onoowerya okhala mwene ahu?’ Munivahererye alopwana awo wiira niwiive”.
13 Masi Sawuli aahaakhula wiira: “Nihiku nla khuuvo mutthu onrowa wiiviwa, okhala wiira olelo Yehova oowoopola atthu a Isarayeli”.
14 Samuweli aahaaleela atthu wiira: “Nrowe oXiligali, wiira natthikele olaleya wiira Sawuli ti mwene”.
15 Vano, atthu ootheene yaahirowa oXiligali, weiwo yaahimukhaliha mwene Sawuli ohoolo wa Yehova. Moottharelana, yaahivaha mikuttho sa waataana ohoolo wa Yehova. Nto Sawuli ni alopwana ootheene a Isarayeli, yaahitthapa atteeliwe ene murima vanceene.
Inoota
^ Eheeberi, “ntoko mutthu mmosa”.
^ Eyo piiyo, okhuma 2 oora ya voosiisu mpakha 6 oora ya voosiisu.
