Samuweli Oopacerya 13:1-23
13 Sawuli aarina iyaakha . . .* okathi aakhalihiwe awe mwene, nave aahilamulela wIsarayeli iyaakha piili.
2 Sawuli aahaathanla alopwana 3.000 eriyari ya atthu a Isarayeli: alopwana 2.000 yaahanle ni Sawuli oMikimaaxi, muttetthe wa omiyaakoni wa oBeteli, nave alopwana 1.000 yaahanle ni Yonathani oXibeya wa Beniyamini. Owo aahaaruma alopwana akina yaahanle, khula mutthu otthikela mutentani* mwawe.
3 Yonathani aahixintta ekrupu ya anakhotto afilisti yaari oXeba, nto afilisti yaahisuwela eyo. Moottharelana, Sawuli aahiruma woopiwa nlope, elapo yootheene oriki: “Aheeberi yiiwe!”
4 Atthu ootheene a Isarayeli yaahiiwa ihapari iya: “Sawuli ooxintta ekrupu ya anakhotto ya afilisti, vano afilisti annaanyokha atthu a Isarayeli”. Nto, atthu yaahileeliwa wiira amutthare Sawuli oXiligali.
5 Afilisti yaahithukumana wiira yawane ni atthu a Isarayeli. Awo yaari ni ikaaro sa ikhotto 30.000, anakhavalo 6.000, ni ekrupu ya anakhotto oowaatta ntoko mihaava sa ophareya. Nto yaahiwela ni yaahimaka oMikimaaxi, mpantta onikhuma nsuwa wa oBethi-Aveni.
6 Alopwana a Isarayeli yaahoona wiira yaahivela-vela vanceene, okhala wiira yaari mmaxakhani. Nto atthu yaahiipitha mmakhukuni, mphakani, opuro waari miyala, mapuro oothimpwa ni mmalittini.
7 Hata aheeberi akina yaahilapuwa muro Yordani, etthyawelaka elapo ya oGadi ni oXileyaadi. Masi Sawuli nlelo aahanle oXiligali, nave atthu yaamutthara yaanithukumela ni woova.
8 Sawuli aahithipelela olipelela mahiku 7 mpakha okathi Samuweli aathanlale awe, masi Samuweli khaaronwe oXiligali, nave atthu yaahipacerya omwara-mwareya amuhiyaka Sawuli.
9 Wookiseryani waya, Sawuli aahihimya wiira: “Mukiruuhele mukuttho woopahiwa ni mikuttho sa waataana”. Nto Sawuli aahivaha mukuttho woopahiwa.
10 Masi, Sawuli omalaka-ru ovaha mukuttho woopahiwa, Samuweli aahiphiya. Vano Sawuli aahirowa okumana ni Samuweli, onamukoha ihaali.
11 Samuweli aahimukoha wiira: “Mpanke-ni?” Sawuli aahaakhula oriki: “Kaahiweha wiira atthu yaanikihiya, ni nyuwo khamwaaphiyale okathi mwaathanlale anyu, nave afilisti yaanithukumana oMikimaaxi.
12 Nto kaahuupuwela wiira: ‘Afilisti anookituphela oXiligali, nave nkinatthi onvekela Yehova wiira okikhaliherye’. Tivo kaahoona wiira kaahaana ovaha mukuttho woopahiwa”.
13 Samuweli aahimuleela Sawuli wiira: “Nyuwo muhiira itthu seelolo. Khamwiiwelenle yooruma ya Yehova, Muluku anyu, yeeyo oovanhaaweni. Mwaiwelenle, Yehova aamulipiha omwene anyu wIsarayeli mahiku ootheene.
14 Masi vano omwene anyu khonrowa opisa. Yehova onomphwanya mulopwana onrowa omuhakalalihaka murima awe. Yehova onoomuthanla wiira aahooleleke atthu awe, maana nyuwo khamwiiwelenle yooruma ya Yehova”.
15 Moottharelana, Samuweli aahivenya oXiligali, onarowa oXibeya wa Beniyamini. Nto Sawuli aahaakontari alopwana aahalanne awe, aaphwanya alopwana 600.
16 Sawuli, ni mwanawe Yonathani, ni atthu yaahanle naawo, yaahimaka oXeba wa Beniyamini. Vano afilisti yiira amanke ene oMikimaaxi.
17 Atoropa a afilisti, yaahikawanyiwa ikrupu tthaaru. Ekrupu emosa yaahikela estaraata yaarowa wOfra, mulaponi mwa oXuwali;
18 ekrupu ya nenli yaahikela estaraata ya oBethi-Horoni; nave ekrupu ya neeraru yaahikela estaraata yaarowa omukanoni waawehana ni okhatoni wa oSeboyimi, erowaka woothakoni.
19 Mulaponi mootheene mwa atthu a Isarayeli, khaakhanle mulipa-oohana iyuuma, maana afilisti yaahihimya wiira: “Nihaahiye aheeberi apakaka ispaata* aahiiso mavaka”.
20 Nto aisarayeli ootheene yaahaana orowa wa afilisti wiira yanoneke ixaruwa* saya, ihipa saya, amaxatto aya, aahiiso ifoise* saya.
21 Musurukhu waaliviwa wiira sinoniwe ixaruwa, ihipa, ansiinyu a maino mararu, amaxatto, vamosa ni olipiha ikaruma sa eyuuma, waakhala etthu yoowiiraka ikarama 8 sa eparatha.*
22 Nto khula okathi yaawaniwa aya ekhotto, atthu yaari ni Sawuli ni Yonathani, khuuvo aarina espaata aahiiso nivaka. Sawuli ni Yonathani paahi ti yaarina ikaruma sa ekhotto.
23 Vano ekrupu ya anakhotto ya afilisti yaahirowa weemela mphironi oMikimaaxi.
Inoota
^ Soolempwa sa eheeberi khanikhanle nummeru nene.
^ Aahiiso, “muheemani”.
^ Aahiiso, “ yaapakaka axoowa”.
^ Ekaruma yuulupale ya eyuuma enipuruliwa ni ipooyi aahiiso etaratoore wira elimaniweke mmatta.
^ Aahiiso, “icampeya; ifonso”.
^ Eheeberi, “epiimi emosa”. Epiimi yaarumeeliwa wiira siphimmweke itthu soolemela khalai. Munwehe Apendise B14.
