Samuweli Oopacerya 14:1-52
14 Nihiku nimosa, Yonathani mwaana a Sawuli, aahimuhimeerya murumeyi awe aakuxa ikaruma sawe sa ekhotto wiira: “Nrowe nilapuwele ekhopela ekina, opuro woorakamela osulu, weiwo ari aya anakhotto a afilisti”. Masi Yonathani, khaamuhimenrye etthu paapa awe.
2 Sawuli aari mukerekhere wa oXibeya, vathi va mwiri oniihaniwa romeera* aari oMigroni, weiwo yaahikhala alopwana 600 yaarina awe.
3 (Aamukunxe eefodi, aari Ahiya, mwaana a Ahitubi, munnawe Ikabodi, mwaana a Pineha, mwaana a Eli, namukuttho a Yehova, oSilo.) Vano anakhotto khiyaasuwela wiira Yonathani aahikhuma.
4 Yonathani aanimananiha ophiya opuro woorakamela osulu yaamanke aya anakhotto a afilisti, oviraka eriyari ya miyala miili, saalikana ni maino. Mwala mmosa waihaniwa Bosesi, nave mwala mukina waihaniwa Sene.
5 Mwala mmosa waari ntoko epilaari yaari onorti, ohoolo wa oMikimaaxi, nave mwala mukina waari osuuli, ohoolo wa oXeba.
6 Yonathani aahimuhimeerya murumeyi awe aamukhaliherya oteexa eskuutu wiira: “Nrowe nilapuwele opuro woorakamela osulu, ari aya alopwana ale oohinnuwihiwa. Woonasa wene Yehova onoonikhaliherya, maana khiivo etthu enimukhoottiherya Yehova woopola, hata aarumeelaka atthu anceene, wala atthu vakhaani”.
7 Nto murumeyi awe aamukhaliherya oteexa eskuutu aahimuhimeerya wiira: “Nvare ele murima anyu onoona aya okhala yooloka. Mwiire ele emphavela anyu, nave weiwo murima anyu omphavela aya orowa, miyo kinimoottharani”.
8 Yonathani aahihimya wiira: “Nrowe nilapuwele mpakha opuro ori aya alopwana awo, wiira yaniwehe.
9 Yanihimeerya wiira: ‘Mweemele vaavo muri anyu!’ hiyo nnimweemela opuro nri ahu, nave khaninrowa okumana naawo.
10 Masi yanihimeerya wiira: ‘Murwe nwane ni hiyo!’ hiyo nnoorowa okhala wiira Yehova onoonivahererya mmatatani mwahu. Eyo enrowa okhala esinaale ahu”.
11 Moottharelana, Yonathani ni murumeyi awe yaahiisooniherya wa anakhotto a afilisti opuro woorakamela osulu. Afilisti awo yaahihimya wiira: “Nwooneke aheeberi ale anikhuma munikhukuni yaipinthe aya”.
12 Vano anakhotto ale yaari opuro woorakamela osulu, yaahimuhimeerya Yonathani ni murumeyi awe aamukhaliherya oteexa eskuutu wiira: “Murwe nno ori ahu, nto hiyo nnimoosomihani!” Moowaakuveya Yonathani aahimuhimeerya murumeyi awe wiira: “Mukitthareke, okhala wiira Yehova onrowa waavahererya mmatatani mwa atthu a Isarayeli”.
13 Yonathani aahiwela orumeelaka matata awe ni metto sawe, vano murumeyi awe aamukhaliherya oteexa eskuutu aanimutthara ottuli. Yonathani aahipacerya waatuphela afilisti, nto murumeyi awe aaniwiivakasa ottuli wawe.
14 Ekwaha yoopacerya Yonathani ni murumeyi awe aatuphenle awe afilisti, aahiwiiva alopwana oowiiraka 20 opuro mwaamukhaani.*
15 Vano atoropa yaari omuttettheni, ni anakhotto yaari opuro woorakamela osulu yaahoova vanceene, hata atoropa yaarummwale waatuphela aisarayeli yaahoova vanceene. Etthaya yaahipacerya othukumela, mwaha wa woova waakumiheriwe ni Muluku.
16 Alipa-oowehaweha a Sawuli yaari oXibeya wa Beniyamini, yaahoona wiira ohiiwanana waahimwara-mwareya ipantta sootheene.
17 Sawuli aahaaruma anakhotto aarina awe wiira: “Xontte, mwaakontari atthu, wiira mwaawehe anihala”. Okathi yaakontariwe aya atthu, vaahooniwa wiira Yonathani ni murumeyi awe aamukhaliherya oteexa eskuutu khiyaakhanle.
18 Vano Sawuli aahimuhimeerya Ahiya wiira: “Muruuhe-va nivuku na nivarihano na Muluku eekeekhai!” (Okathi ole,* nivuku na nivarihano na Muluku eekeekhai, naari ni aisarayeli.)
19 Nlelo Sawuli olavulaka ni namukuttho, ohiiwanana opuro yaamanke aya afilisti waamutepa wuncerereya. Vano Sawuli aahimuleela namukuttho wiira: “Muhiye ele enipaka anyu”.*
20 Sawuli ni anakhotto ootheene aarina awe yaahithukumana ni yaahirowa owana ekhotto. Nuumala ophiya opuro ole, yaahiweha wiira afilisti yaaniivanana yaawo-ru ni espaata,* nave waahikhala ohiiwanana wuulupale.
21 Nave-tho, aheeberi yaale khalai yaari ni afilisti, yaawo yaaronwe opuro ole waamakiwe, yaahitakaahana ni aisarayeli yaari ni Sawuli vamosa ni Yonathani.
22 Okathi alopwana ootheene a Isarayeli yaipinthe muttetthe wa omiyaakoni wa Efrayimi yaiwale aya wiira afilisti yaahitthyawa, yaahikela-tho okhottoni, anawoomola afilisti awo.
23 Nto Yehova aahiwoopola atthu a Isarayeli nihiku nle, nave yaahiwaniwa ekhotto mpakha oBethi-Aveni.
24 Masi anakhotto a Isarayeli yaahikhulumuwa nihiku nle, okhala wiira Sawuli aahilapha aahimeeryaka wiira: “Ootakhaliwa mulopwana yoole onrowa olya etthu* vahinatthi wiila, ni miyo kihinatthi owunlela ikuhu awanani aka!” Nto khuuvo nakhotto aalyiiye etthu.
25 Moottharelana, anakhotto ootheene* yaahikela mutakhwani, ni yaahiphwanya oravo vathi.
26 Okathi yaakenle aya mutakhwani, yaahoona oravo ottonyeryaka vathi, masi khuuvo aalyaale, okhala wiira yaanoova mwaha wa etthu yaalamphe aya.
27 Masi Yonathani khaiwale ele paapa awe aawiirinhe awe anakhotto olapha. Tivo aahisamiha oponta wa ekopo awe mooravoni-mmo. Nuumala olya oravo owo, aahiphwanya ikuru.*
28 Vano nakhotto mmosa aahimuhimeerya wiira: “Paapa anyu oowiiriha anakhotto olapha, oriki: ‘Ootakhaliwa mulopwana onrowa olya etthu olelo!’ Tivo anakhotto ala akhulumunwe aya”.
29 Masi Yonathani aahihimya wiira: “Paapa aka ohaakumiherya muxankiho muulupale atthu ala. Nwehe moota kiphwannye aka ikuru, mwaha woowi kihoolya oravo ola vakhaani.
30 Vaamureera vaakhanle wiira anakhotto ahoolya vootaphuwa itthu awaakhale aya awanani aya! Nto nanwiivakasa afilisti anceene”.
31 Nihiku nle atthu a Isarayeli yaahithipelela owiivakasa afilisti okhuma oMikimaaxi mpakha wAiyaloni. Nave anakhotto yaahikhulumuwa vanceene.
32 Siiso atthu yaahipacerya okuxa voohiphiyeriwa itthu yaawaakhale aya awanani aya. Awo yaahikuxa ipwittipwitthi, ipooyi suulupale ni saamukhaani, ni yaahiivakasa anakhuura enama ni ephome ene.
33 Sawuli aahileeliwa wiira: “Mooneke! Atthu annimutthekela Yehova akhuuraka enama ni ephome aya”. Nto Sawuli aahihimya wiira: “Tthiri, nyuwo khamoonihenrye ororomeleya. Mukiruuhele nluku nuulupale niinaano-va”.
34 Moottharelana, Sawuli aahihimya wiira: “Murowe mwaaleele anakhotto wiira: ‘Khula mmosa a nyuwo oruuhe epooyi awe, ni epwittipwitthi awe, ohite vaava, ni okhuureke. Muhimutthekele Yehova mukhuuraka enama vamosa ni ephome aya’”. Vano khula mutthu aahiruuha epooyi awe ohiyu yoole, ohita opuro yoole.
35 Vano Sawuli aahimutekela altaari Yehova. Ola aari altaari oopacerya aamutekenle awe Yehova.
36 Muhoolo mwaya Sawuli aahihimya wiira: “Nrowe niwoomole afilisti ohiyu ola ni naatuphele mpakha oxa. Khaninrowa omuhiya nnakhala mutthu mmosa mukumi”. Vano atthu yaahihimya wiira: “Mpake ele munoona anyu okhala yooloka vamaithoni vanyu”. Vano namukuttho aahihimya wiira: “Nrowe nimukohe Muluku eekeekhai wenno”.
37 Sawuli aahimukoha Muluku oriki: “Kiwoomoleke afilisti? Niireke munimwaavahererya mmatatani mwa atthu a Isarayeli?” Masi Muluku khaamwaakhunle etthu nihiku nenle.
38 Sawuli aahihimya wiira: “Murwaase-va, nyunwo maxeefi ootheene a atthu, wiira nisuwele etampi epakiwe olelo-va.
39 Tthiri, kinnilapha ni nsina na Yehova, Muluku mukumi, yoowo owooponle atthu a Isarayeli, wiira hata ori ene mwanaka Yonathani, opanke etthu eyo, ohaana okhwa”. Masi khuuvo mutthu aamwaakhunle etthu.
40 Moottharelana Sawuli aahaahimeerya atthu ootheene a Isarayeli, oriki: “Nyuwo munrowa okhala mpantta mmosa, vano mwanaka Yonathani ni miyo ninrowa okhala mpantta mukina”. Anakhotto yaahimuleela Sawuli wiira: “Mpake ele enoona anyu okhala yooloka vamaithoni vanyu”.
41 Nuumala-vo, Sawuli aahimuhimeerya Yehova wiira: “Khoo Muluku a Isarayeli, munaakhule mmurumeelaka Tumimi!” Vano Yonathani ni Sawuli, yaahithanliwa, nto atthu yaahirowa.
42 Sawuli aahihimya wiira: “Nvonye isorti wiira nimoone ole onrowa othanliwa, vakhala wiira ti miyo aahiiso mwanaka Yonathani”. Nto Yonathani aahithanliwa.
43 Sawuli aahimukoha Yonathani oriki: “Mukileele, exeeni epanke anyu?” Vano Yonathani aahimwaakhula wiira: “Miyo kilawinhe oravo vakhaani ni oponta wa ekopo eri mmatatani mwaka. Miyo kiri-va, koolikanana okhwa!”
44 Siiso Sawuli aahihimya wiira: “Muluku okihukhumu vanceene, mwaahikhwe nyuwo, Yonathani”.
45 Masi anakhotto yaahimuhimeerya Sawuli wiira: “Niireke Yonathani ohaana okhwa? Kiira ti yoowo owooponle atthu a Isarayeli? Eyo kheniiraneya! Tthiri ninnilapha ni nsina na Yehova, Muluku mukumi, wiira nnakhala ekharari emosa ya mmuruni mwawe, khenrowa omorela vathi, okhala wiira etthu opanke awe olelo-va, okhaliherinwe ni Muluku”. Nto anakhotto yaahimoopola Yonathani, tivo khaakhwiiye.
46 Vano Sawuli aahihiya owoomola afilisti, nave afilisti yaahitthikela mmuttettheni mwaya.
47 Mwene Sawuli aahikhala oowerya wIsarayeli ni aahiwana ni awanani awe ootheene khula mpantta. Owo aahiwana ni atthu a oMowabi, a wAmoni, a wEdomi, mamwene a oSoba, ni afilisti. Mapuro ootheene aawana awe, aanaawerya awanani awe.
48 Sawuli aahiwana moolipa murima ni atthu a wAmaleki ni aahaawerya, ni aahiwoopola aisarayeli mmatatani mwa atthu yaatuphela.
49 Anamwane axilopwana a Sawuli yaari ala: “Yonathani, Ixivi, ni Malikixuwa. Nave aahikhalana anamwane anli axithiyana: muulupale aihaniwa Merabi, mwaamukhaani aihaniwa Mikali.
50 Mwaarawe Sawuli aihaniwa Ahinowami, mwaana mwaamuthiyana a Ahimaasi. Xeefi a anakhotto awe aihaniwa Abineri, mwaana a Neri, tiiyu awe Sawuli.
51 Kiixi, aari paapa awe Sawuli. Nave Neri, paapa awe Abineri, aari mwaana a Abiyeli.
52 Sawuli aahiwana ikhotto sooviha ni afilisti okathi wootheene aari awe mwene. Okathi anweha awe mulopwana a ikuru aahiiso oolipa murima, owo aanimukuxa wiira okhale toropa awe.
Inoota
^ Mwiri oniima mihokorokho sa ekoore ya koroxo, seiyo sinlikana ni masa.
^ Aahiiso, “nimeya na ekitaari emosa”. Eyo piiyo, ematta yaalimmwa ni ipooyi nihiku nimosa.
^ Eheeberi, “nihiku nle”.
^ Eheeberi, “mukumihe ntata nanyu”.
^ Aahiiso, “xoowa”.
^ Eheeberi, “okhuura ephaawu”.
^ Eheeberi, “elapo yootheene”.
^ Eheeberi, “maitho awe yaahaarya”.
