Samuweli Oopacerya 19:1-24
19 Muhoolo mwaya, Sawuli aahimuleela Yonathani, mwanawe, ni arumeyi awe ootheene wiira aaphavela omwiiva Davidi.
2 Okhala wiira Yonathani, mwaana a Sawuli, aanimphenta vanceene Davidi, aahimuleela Davidi wiira: “Paapa aka Sawuli, omphavela owiivani. Meelo voosiisu, mukhalane ephoole. Murowe mwaipithe opuro woororomeleya.
3 Kinookhuma ni paapa aka nirowaka omatta waattamela opuro onrowa anyu wiipitha. Kinoolavula ni paapa aka voohimya sa nyuwo, ahimya etthu mukiroromele wiira kinimooleelani”.
4 Yonathani aahimulavula saana Davidi omuleelaka paapa awe, Sawuli. Owo aahihimya wiira: “Nyuwo mwene muhimwiirihe etthu yootakhala murumeyi anyu Davidi, okhala wiira khowiirinheni etthu yootakhala,* nave itthu sootheene opanke awe sihoophwanyihani mureerelo.
5 Owo aahileva okumi awe wiira omwiiwe nfilisti ole, nto Yehova aahiwoopola atthu otheene a Isarayeli. Nyuwo mwaahiweha itthu iyo, ni mwaahitteeliwa murima vanceene. Vano xeeni muniphavela anyu omwiiriha etthu yootakhala Davidi, yoowo ohitthenke etthu, mphavelaka omwiiva vahikhanle mulattu?”
6 Sawuli aahinwiriyana Yonathani, nave aahilapha oriki: “Kinnilapha ni nsina na Yehova Muluku mukumi wiira Davidi khanrowa wiiviwa”.
7 Muhoolo mwaya, Yonathani aahimwiihana Davidi, omuleela itthu sootheene. Vano Yonathani aahimuroiha Davidi wa Sawuli, nto Davidi aahitthikela onvarela muteko Sawuli.
8 Nuuvira okathi, yaahitthikela owaniwa ekhotto. Davidi aahivenya, aahiwana ni afilisti, owiiva afilisti anceene. Nave akina a yaawo yaahanle yaahimutthyawa.
9 Okathi Yehova eemerenrye awe wiira miyuupuwelo sootakhala simuhaaxeke* Sawuli, Sawuli iira okilanthi ene owannyawe ovarenle ene nivaka mmatatani mwawe, Davidi omoopaka viola.*
10 Sawuli aheererya omukhomela Davidi vaxirini ni nivaka, masi Davidi aahinfintari Sawuli, nto nivaka nlo naahihoma vaxirini. Vano Davidi aahitthyawa ohiyu yoole.
11 Muhoolo mwaya, Sawuli aahaaruma alopwana orowa owannyawe Davidi wiira yawehaweheke empa eyo, ni mmeeloni mwaya voosiisu amwiive Davidi. Masi mwaarawe Davidi, Mikali, aahimuhimeerya wiira: “Mwaahitthyawe ohiyu yoola, meelo munimwiiviwa”.
12 Moowaakuveya Mikali aahimukhaliherya Davidi okhuruwa oviraka vaxanelani, wiira otthyawe.
13 Mikali aahikuxa elatarato enrumeeliwa vatthokoni, aatalela vakhaamani, nave aahimpweha reeti a manri a epuri waamuru, ni aahikhuneela elatarato eyo ni ekuwo.
14 Sawuli aahaaruma alopwana awo omurowela Davidi, masi Mikali aahihimya wiira: “Onoowereiwa”.
15 Vano Sawuli aahaaruma alopwana wiira yanwehe Davidi, aahimeerya wiira: “Mwamuteexe ni ekhaama awe mukiruuhele, wiira kimwiive”.
16 Okathi alopwana awo yaakenle aya mpaani, yaahiphwanya elatarato enrumeeliwa vatthokoni yaataleliwe ene vakhaamani ni reeti a manri a epuri ori ene waamuru.
17 Sawuli aahimukoha Mikali oriki: “Xeeni muhalaka okiwoka siisa, mmukhaliheryaka nwanani aka otthyawa?”. Mikali aahimwaakhula Sawuli wiira: “Owo aakilenle wiira: ‘Mukihiye kirooke! Mwaahikihiye, kinoowiivani!’”
18 Vano Davidi aahitthyawa, ni aahirowa wa Samuweli oRama. Owo aahimuleela Samuweli itthu sootheene Sawuli aamwiirenle awe. Nto Davidi ni Samuweli yaahirowa oNayothi, anakhala weiwo.
19 Nuuvira okathi, Sawuli aahileeliwa wiira: “Davidi ori oNayothi, oRama”.
20 Sawuli aahaaruma alopwana wiira yanvare Davidi. Okathi alopwana awo yaawoonale aya maprofeta oowuuluvala elaleyaka eprofesia, ahooleliwaka ni Samuweli, munepa wa Muluku waahaavaha owerya alopwana ale yaarummwale ni Sawuli, nto awo yaahipacerya opaka itthu ntoko maprofeta.
21 Okathi Sawuli aaleeliwe awe, aahaaruma alopwana akina, nave awo yaahipacerya opaka itthu ntoko maprofeta. Nuumala-vo, Sawuli aahaaruma-tho alopwana akina, ekrupu ya neeraru, nave-tho awo yaahipacerya opaka itthu ntoko maprofeta.
22 Wookiseryani waya, Sawuli aahivenya orowaka oRama. Okathi aaphiyale awe ehime yaari oSeku, aahikoha wiira: “Ori vai Samuweli ni Davidi?” Vano aahaakhuliwa wiira: “Arisa oNayothi, oRama”.
23 Nlelo Sawuli ori ene mphironi orowaka oNayothi, oRama, munepa wa Muluku waahinvaha owerya, nto owo aahipacerya opaka itthu ntoko profeta mphironi, mpakha ophiya oNayothi, oRama.
24 Nave-tho, Sawuli aahirula malaya awe, onapaka itthu ntoko profeta ohoolo wa Samuweli. Owo aahimmaathi opuro ole ohiwanre etthu,* nihiku nootheene, othana ni ohiyu. Tivo vanihimmwa aya wiira: “Niireke Sawuli nave profeta?”
Inoota
^ Eheeberi, “khootthekenleni”.
^ Eheeberi, “munepa wootakhala”.
^ Ekaruma ya masipo ya khalai yeeyo enivirikana ni aviola a mahiku ala.
^ Aahiiso, “Ohiwanre saana”.
