Samuweli Oopacerya 21:1-15
21 Muhoolo mwaya, Davidi aahiphiya oNobi wa namukuttho Ahimeleki. Okathi Ahimeleke aakumanne awe ni Davidi, aahipacerya othukumela onamukoha wiira: “Xeeni muri anyu mekhinyu? Xeeni muhikhanle anyu ni mutthu mukina?”
2 Davidi aahimwaakhula namukuttho Ahimeleki, wiira: “Mwene ookiruma opaka etthu okihimeerya wiira: ‘Ohikhale mutthu mukina onsuwela etthu kinoorumaakani, nnakhala malakiheryo kinoovahaakani’. Nto miyo, kihiiwanana ni alopwana aka okumana opuro mukina.
3 Nto vakhala wiira mookhalana iphaawu thanu, aahiiso etthu ekina, mukivahe”.
4 Masi namukuttho aahimwaakhula Davidi wiira: “Khasikhanle iphaawu sikina, sikhanle paahi iphaawu sinivahiwa Muluku. Munoowerya okhuura iphaawu iyo vakhala wiira alopwana anyu kharumpe ni athiyana”.
5 Davidi aahimwaakhula namukuttho oriki: “Khanirumpe ni athiyana, ntoko siisaale nahaarupa ahu ni athiyana okathi naarowa ahu okhottoni. Vakhala wiira irutthu sa alopwana awo saanireerihiwa okathi naavara ahu miteko sikina, olelo ti sootepa oreerihiwa!”
6 Namukuttho aahinvaha Davidi iphaawu saavahiwa Muluku, okhala wiira khisaakhanle iphaawu sikina, sihikhanle iphaawu saavahiwa Muluku. Iphaawu iyo saakumihiwe ohoolo wa Yehova, siranttelihiwaka ni iphaawu sooxiwe nihiku nenle.
7 Nihiku nle murumeyi mmosa a Sawuli aari weiwo. Owo aahikhanyererihiwa okhala ohoolo wa Yehova. Nsina nawe aihaniwa Dowegi a wEdomi, xeefi a amakampusi a Sawuli.
8 Davidi aahimuhimeerya Ahimeleki wiira: “Niireke nookhala nivaka aahiiso espaata opuro ola? Miyo nkaakunxe espaata aka nnakhala ikaruma saka sa ekhotto, okhala wiira muteko mwene aakirumme awe waari woowaakuveya”.
9 Siiso namukuttho aahihimya wiira: “Kirina espaata ya nfilisti, Goliyati, yoowo mwaamwiivale anyu okhatoni wa Elahi. Ela va, yuupanyeriwe ni ekuwo ottuli wa eefodi. Mwaaphavelaka mukuxeke, okhala wiira kirina yeela paahi”. Vano Davidi aahihimya wiira: “Mukivaheke okhala wiira khekhanle ekina”.
10 Nihiku nle Davidi aahithipelela omutthyawa Sawuli, mpakha ophiya wa mwene Akixi, a oGathi.
11 Arumeyi a Akixi, yaahimuhimeerya wiira: “Ola khahiyo Davidi mwene a elapo ya wIsarayeli? Kiira ti yoola yaamwiipela aya ni omwiinela ariki:
‘Sawuli owiivale ekonto emosa,
Masi Davidi owiivale ikonto muloko’?”
12 Davidi aahihela moolumo ale vamurimani ni aahipacerya omoova vanceene mwene Akixi a oGathi.
13 Nto owo aahiikhaliha ntoko namukhwa anepa ohoolo waya, aanilepa mikhora sa epooma ni aanimoroxela isene veereruni vawe.
14 Wookiseryani, Akixi aahaahimeerya arumeyi awe wiira: “Muhoona wiira mulopwana ola namukhwa anepa, xeeni muhalaka okiruuhela?
15 Nyuwo muhoona wiira kookhalana anamukhwa anepa anceene, nto xeeni muhalaka okiruuhela mukina? Niireke mulopwana ola ohaana okela mpaani mwaka?”
