Samuweli Oopacerya 24:1-22
24 Okathi Sawuli aahokolonwe awe nuumala owoomola afilisti, aahileeliwa wiira: “Davidi ori woothakoni wa wEni-Gedi”.
2 Sawuli aahaakuxa anakhotto 3.000 aathanlale awe eriyari ya aisarayeli ootheene, onarowa omuhaaya Davidi ni anakhotto awe, oneri wa mwaako saakhala aya itthove.
3 Sawuli aahiphiya opuro naari aya nsisi na ipwittipwitthi naatekiwe ni maluku. Opuro owo naahikhala nikhuku, vano Sawuli aahikela memmo wiira aixaakihe.* Davidi ni anakhotto awe yiira yiipinthe ene munikhukuni mmo oponta wa nikhuku nlo.
4 Anakhotto a Davidi yaahimuleela wiira: “Olelo nihiku Yehova onooleelaaweni wiira: “Kinnoovahereryani nwanani anyu mmatatani mwanyu, mmwiiriheke ele enoona anyu oreerela’”. Nto, Davidi aahivenya oneetta vakhaani-vakhaani iikittha oponta wa nlaya nahaarina miyoono na Sawuli.
5 Masi, murima wa Davidi waanimphukela mwaha woowiikittha oponta wa nlaya nahaarina miyoono na Sawuli.
6 Owo aahaahimeerya anakhotto awe wiira: “Mwaha woomuttittimiha Yehova, nkinikhala-khala kimwiirelaka etthu ela pwiya aka, yoowo othanliwe ni Yehova. Miyo nkinikhala-khala kimwiirelaka etthu yootakhala okhala wiira othanliwe ni Yehova”.
7 Vano, Davidi aahaamaaliha* anakhotto awe ni moolumo ala, nave khaaweemerenrye omutuphela Sawuli. Nto Sawuli aahikhuma munikhukuni onarowa.
8 Davidi aahikhuma munikhukuni onamwiihana Sawuli oriki: “Pwiyaka mwene!” Okathi Sawuli aawenhe awe ottuli, Davidi aahikokhora, uurama mpakha vathi.
9 Davidi aahimukoha Sawuli wiira: “Xeeni muhalaka waawiriyana atthu ahimmye wiira: ‘Davidi oniphavela owiirihani etthu yootakhala’?
10 Nihiku nla na olelo, muhoona wiira Yehova aahikivahererya nyuwo mmatatani mwaka, munikhukuni. Masi okathi kaaleeliwe aka wiira kiwiiveeni, kaahiwoonelani othunku kinahimya wiira: ‘Nkinrowa omwiiriha etthu yootakhala pwiyaka, okhala wiira othanliwe ni Yehova’.
11 Paapa, nkawehani epetaaso ya nlaya nanyu eri mmatatani mwaka. Okathi kaikintthe aka epetaaso ela, nkaawiivaleni. Vano nyuwo munnoona ni munnisuwela wiira nkimphavela owiirihani etthu yootakhala nnakhala woovirikanyani. Miyo nkootthekenleni nnaamwi mphavelaka okiiva.
12 Yehova oniphukele nyuwo ni miyo, nave Yehova owunleleni ikuhu. Masi miyo nkinrowa owiirihani etthu yootakhala.
13 Wookhala muhapo wa khalai onihimya wiira: ‘Atthu ootakhala anipaka itthu sootakhala’, masi miyo nkiwiirenleni etthu yootakhala.
14 Niireke mwene a Isarayeli onikoomola miyo? Miyo ka pani? Miyo kinlikana ni mwalapwa ookhwa. Miyo kinlikana ni etothomwa.
15 Yehova okhale mulipa-oophuka. Owo onooniphukela nyuwo ni miyo, owo onimoona, onoothokorerya mulattu aka, onookiphukela, ni onookoopola mmatatani mwanyu”.
16 Nuumala Davidi omaliha olavula moolumo ala, Sawuli aahihimya wiira: “Niireke ti nyuwo mwanaka Davidi?” Nto Sawuli aahipacerya wunla vanceene.
17 Owo aahimuleela Davidi wiira: “Nyuwo mwa naxariya okivikana miyo, okhala wiira mookiirela itthu sooreera, masi miyo kihoottikiheryani ni itthu sootakhala.
18 Olelo, nyuwo mookileela etthu yooreera mukiirenle anyu, okhala wiira khamukiivale, okathi Yehova aakivaherenrye awe mmatatani mwanyu.
19 Mulopwana xeeni oniira amphwanya nwanani awe onamuhiya orowaka ohimwiirinhe etthu yootakhala? Yehova onimoovahani itthu sooreera mwaha wa ele mukiirenle anyu olelo.
20 Vano koosuwelexa wiira munookhala mwene, ni wiira omwene anyu wIsarayeli onoolipihiwa.
21 Vano mukilaphele ni nsina na Yehova wiira khamunrowa omala-maliha osuulu aka nuumala miyo okhwa, ni wiira khamunrowa omala-maliha nsina naka etthoko ya paapa aka”.
22 Davidi aahimulaphela Sawuli, vano Sawuli aahitthikela owannyawe. Masi Davidi ni anakhotto awe yaahitthikela mapuro oolipihiwa.
