Samuweli Oopacerya 26:1-25
26 Nuuvira okathi, alopwana a oZifi, yaahirowa wa Sawuli, oXibeya, anamuhimeerya wiira: “Davidi iipinthe omwaako Hakila, oniwehana ni oYesimoni”.*
2 Sawuli aahivenya ni alopwana 3.000 a wIsarayeli oosuwela owana ekhotto, onarowa omwaavya Davidi woothakoni wa oZifi.
3 Sawuli aahimaka omwaako Hakila, waawehana ni oYesimoni, waattamela mustaraatani. Vano Davidi aari woothakoni. Nto aahiiwa wiira Sawuli aahirwa woothakoni omwaavyaka.
4 Nto Davidi aahaaruma atthu wiira yawehe vakhala wiira Sawuli aahirwa tthiri.
5 Muhoolo mwaya Davidi aahirowa opuro Sawuli aamanke awe. Nto Davidi aahoona opuro aarumpe awe Sawuli ni Abineri mwaana a Neri, xeefi aanakhotto awe. Sawuli aarumpe opuro ole waamakiwe, orukureriwe ene ni anakhotto.
6 Davidi aahimukoha Ahimeleki, muhiti, ni Abixayi, mwaana a Seruwiya, munnawe Yowabi oriki: “Taani onrowa ni miyo opuro omanke awe Sawuli?” Abixayi aahaakhula wiira: “Miyo kinoorowa ni nyuwo”.
7 Davidi ni Abixayi yaahirowa noohiyu opuro yaamanke aya atoropa, amphwanya Sawuli orumpe ene waattamela nivaka nawe aahomenle awe vathi, waamuru wawe. Abineri ni atoropa awe yammaathale amurukurenrye ene Sawuli.
8 Vano Abixayi aahimuhimeerya Davidi wiira: “Olelo Muluku ohoovahereryani mmatatani mwanyu nwanani anyu. Xontte, mukihiye kimuhomele vathi ni nivaka ekwaha emosa paahi, nkinrowa omuhoma ikwaha piili”.
9 Masi, Davidi aahimuhimeerya Abixayi wiira: “Muhimwiirihe etthu yootakhala. Ti pani oniwerya omwiiriha etthu yootakhala ole othanliwe ni Yehova ohikhalana mulattu?”
10 Davidi aahincererya-tho oriki: “Ntoko siisaale Yehova onikhala awe, Yehova mwaneene onoomwiiva, aahiiso nnoophiya nihiku onrowa awe okhwa, wala onoorowa okhottoni okhwe weiwo.
11 Mwaha woomuttittimiha Yehova, miyo nkinkhala-khala kimwiirihaka etthu yootakhala ole othanliwe ni Yehova! Vano, xontte, mukuxe nivaka nri waattamela waamuru wawe ni murinki wa maasi, nrooke”.
12 Davidi aahikuxa nivaka ni murinki wa maasi waari waattamela waamuru wa Sawuli, anarowasa. Khuuvo aawenhe, nnakhala aasuwenle, hata aavennye. Ootheene aya yaamurupa, okhala wiira Yehova aahiwiiriha orupa vanceene.
13 Moottharelana, Davidi aahilapuwela mpantta mukina, eemela vasulu va mwaako, orakamelanne ene ni Sawuli.
14 Davidi aahaakhuwelela atoropa ni Abineri, mwaana a Neri, oriki: “Abineri, khamunaakhula? Abineri aahaakhula oriki: “Ti pani owo onimwiihana mwene?”
15 Davidi aahimukoha Abineri wiira: “Nyuwo khahiyo mwa mulopwana ootupa? Ti pani onlikana ni nyuwo wIsarayeli? Xeeni mwahaamulipelela anyu mwene, pwiya anyu? Tthiri, nakhotto mmosa aahirwa opuro omanke anyu wiira omwiive mwene, pwiya anyu.
16 Etthu mpanke anyu khelonke, ntoko siisaale Yehova onikhala awe, nyuwo munniphwanela wiiviwa, okhala wiira khammukhapelenle pwiya anyu, othanliwe ni Yehova. Vano nweha-wehe! Nri vai nivaka na mwene ni murinki wa maasi waari waattamela waamuru wawe?”
17 Vano Sawuli aahisuwela wiira naari nsu na Davidi, onamukoha wiira: “Niireke nlo nsu nanyu, mwanaka Davidi?” Davidi aahaakhula oriki: “Aayo pwiyaka mwene, nla nsu naka”.
18 Davidi aahincererya-tho oriki: “Xeeni pwiya aka onimulupattha awe murumeyi awe? Kiirale-ni? Kitthenke-ni?
19 Pwiyaka mwene, xontte, nwiriyane moolumo a murumeyi anyu: Akhala wiira Yehova toniwiirihani okilupattha, mmuhiye eemererye yoovaha aka ya ipyo. Masi vakhala wiira atthu taniwiirihani okilupattha, atthu* awo aatakhaliwa ohoolo wa Yehova, okhala wiira awo olelo annikoomola eriyari ya atthu a Yehova, ariki: ‘Murooke, mwaarumeeleke amuluku akina!’
20 Vano, muhikihiye kikhwaaka ottaiwene wa opuro onikhala awe Yehova. Tthiri, mwene a Isarayeli ookhuma orowaka omwaavya mutthu onlikana ni etothomwa, okhalaka ntoko onixaya ekhwali mmiyaakoni”.
21 Nto, Sawuli aahimwaakhula wiira: “Koottheka. Mutthike, mwanaka Davidi, okhala wiira nkinrowa-tho owiirihani etthu yootakhala, maana muhoona okumi aka okhalana efaita nihiku nla na olelo. Tthiri, koopaka itthu ntoko mulolo, ni koottheka vaalupale”.
22 Davidi aahihimya wiira: “Nla-va nivaka na mwene. Mmurume mulopwana mmosa orweele.
23 Yehova tonrowa omuliva khula mutthu mwaha wa miteko sawe sooloka ni ororomeleya wawe, okhala wiira olelo Yehova aahoovahereryani mmatatani mwaka, masi nkiphavenle omwiiriha etthu yootakhala ole othanliwe ni Yehova.
24 Siisaale koonale aka okumi anyu okhalana efaita nihiku nla na olelo, okumi aka okhale wa faita va maithoni va Yehova, nto owo okoopole mixankiho sootheene”.
25 Sawuli aahimwaakhula Davidi oriki: “Muluku ooreeliheni, mwanaka Davidi. Tthiri munoopaka itthu suulupale, nave munoopaka saana itthu iyo”. Vano Davidi aahirowa, nto Sawuli aahitthikela owannyawe.
Inoota
^ Aahiiso, woonasa wene: “woothakoni”.
^ Eheeberi, “yoohiyeriwa”, eyo enihela muhina atthu ni elapo yaavahiwe aya.
