Samuweli Oopacerya 28:1-25
-
Sawuli onnirowa okoha minepa sootakhala wEni-Dori (1-25)
28 Mahiku awo afilisti yaahaathukumanya anakhotto aya ootheene wiira yawane ni aisarayeli. Nto Akixi aahimuleela Davidi wiira: “Nyuwo moosuwela wiira munoorowa ni miyo vamosa ni alopwana anyu okhottoni”.
2 Davidi aahimuleela Akixi wiira: “Nyuwo moosuwela oratteene wiira murumeyi anyu onimwiira siiso”. Akixi aahimuleela Davidi wiira: “Tivo kinrowa aka woothanlani wiira mukhale kwaarta aka”.
3 Vano Samuweli aahikhwa, nto aisarayeli ootheene yaahimunlela ni yaahinvitha oRama, epooma awe. Sawuli aahiwoomola atthu yaakoha malaikha ootakhala, ni anahako mulaponi-mme.
4 Afilisti yaahithukumana, amaka oXunemi. Vano Sawuli aahaathukumanya aisarayeli ootheene, amaka oXilbowa.
5 Okathi Sawuli aawenhe awe opuro yaamanke aya afilisti, aahoova, nave murima awe waahipacerya othukumela vanceene.
6 Sawuli aanimukoha Yehova, masi Yehova khwaamwaakhula, hata moolohani, nnakhala omurumeelaka urimi aahiiso aarumeelaka maprofeta.
7 Vano Sawuli aahaaleela arumeyi awe oriki: “Mukaaverye muthiyana onikoha malaikha ootakhala wiira kimukohe”. Arumeyi awe yaahimuleela wiira: “Ookhala muthiyana onikoha malaikha ootakhala onikhala wEni-Dori”.
8 Sawuli aahirula ikuwo sawe sa omwene owara ikuwo sikina wiira ohisuweliwe, onarowa wa muthiyana owo ohiyu ni arumeyi awe axilopwana anli. Sawuli aahihimya wiira: “Mukaaxerye ehako mukohaka malaikha ootakhala, nave mmuruuhe ole kinrowa aka woovekelani”.
9 Nto muthiyana owo aahimuleela wiira: “Nyuwo moosuwela etthu Sawuli opanke awe, owo oowoomola atthu ootheene anikoha malaikha ootakhala, ni anahako mulaponi mwawe. Xeeni munikilupattha anyu mphavelaka okiiva?”
10 Sawuli aahimulaphela muthiyana ole ni nsina na Yehova, oriki: “Ntoko siisaale Yehova onikhala awe, nyuwo khamunrowa okhalana mulattu ni mwaha ola!”
11 Muthiyana owo aahimukoha wiira: “Kooruuhele-ni aani?” Sawuli aahaakhula wiira: “Mukiruuhele Samuweli”.
12 Nuumala muthiyana owo onweha “Samuweli”,* aahikhuwela ni nsu nawe noorunya omuleelaka Sawuli wiira: “Xeeni mukiwonke anyu? Nyuwo mwa Sawuli!”
13 Mwene aahimuleela muthiyana owo wiira: “Muhoove etthu. Munweha-ni?” Muthiyana owo aahimwaakhula Sawuli oriki: “Kininweha mutthu onlikana ni muluku, okhumaka vatthayani”.
14 Sawuli aahimukoha muthiyana owo wiira: “Ori sai?” Nto muthiyana owo aahimwaakhula wiira: “Mulopwana oowuuluvala, owanre nlaya noohikhalana miyoono”. Nuumala Sawuli osuwela wiira aari “Samuweli”, aahikokhora, uurama mpakha vathi.
15 Vano “Samuweli” aahimukoha Sawuli wiira: “Xeeni munikixankiha anyu mukivenxaka?” Sawuli aahaakhula wiira: “Kirooxanka vanceene. Afilisti aniwana ni miyo, nave Muluku ookinyanyala. Owo khonkaakhula hata aarumeelaka maprofeta wala moolohani, tivo kiniwiihanaakani wiira mukisuwelihe etthu kikhanle aka oopaka”.
16 “Samuweli” aahimukoha wiira: “Xeeni munikiphavela anyu vano Yehova oonyanyanlaaweni ni ori awe nwanani anyu?
17 Yehova onoopaka ele aahimmye awe okirumeelaka miyo: Yehova onoowaakhaani omwene ni ononvaha mukhwiinyu, Davidi.
18 Nyuwo khammwiiwelenle Yehova ni khimwaamala-malinhe amaleki, yaawo yaamwiirinhe onanariwa vanceene. Tivo Yehova oniwiirelaaweni itthu iya olelo.
19 Nave Yehova onrowa woovahereryani nyuwo ni aisarayeli mmatatani mwa afilisti. Meelo nyuwo ni aniinyu munrowa okhala ni miyo. Ohiya-vo, Yehova onrowa waavahererya anakhotto a Isarayeli mmatatani mwa afilisti”.
20 Niinaano-ru, Sawuli aahimorela vathi oovaka vanceene, mwaha wa moolumo a “Samuweli”. Vano Sawuli khaarina-tho ikuru, okhala wiira khaalyiye etthu nihiku nootheene, othana ni ohiyu.
21 Okathi muthiyana owo aamwaattamenle awe Sawuli, aahoona wiira aahixankiheya vanceene, onamuhimeerya wiira: “Murumeyi anyu ola oowiiwelelani. Miyo kooleva okumi aka ni koovara ele mwaakivekenle anyu.
22 Vano, xontte munwiriyane murumeyi anyu ola. Mukihiye koovaheeni ephaawu, wiira mukhuure, nto munoophwanya ikuru wiira murooke”.
23 Masi Sawuli aahikhootta ohimyaka wiira: “Nkimphavela olya”. Nto, arumeyi awe ni muthiyana ole, yaahimukhanyererya. Wookiseryani waya, aahaawiriyana, ovenya vathi vaari awe okilaathi vakhaterani.
24 Muthiyana owo aahirowa ohita epooyi yooneneva aarina awe, nuumala-vo aahikuxa otthu,* eetheya opaka iphaawu soohiheliwa eferemento.
25 Muthiyana owo aahinvaha yoolya eyo Sawuli ni arumeyi awe, nto awo yaahilya. Moottharelana, Sawuli ni arumeyi awe yaahivenya ohiyu yoole, anarowa.
