Samuweli Oopacerya 3:1-21
-
Samuweli onniihaniwa wira okhale profeta (1-21)
3 Vano, mmiravo Samuweli aanimurumeela Yehova ohooleliwaka ni Eli, masi mahiku ale atthu vakhaani paahi ti yaaleeliwa ihapari sa Yehova. Nave Muluku khaisooniherya.
2 Nihiku nimosa, Eli aarimumpaathi opuro aamakela awe wumpaathi, nto khaawerya woona saana, mwaha woowi aahuuluvala.
3 Muthuko wa Muluku, nlelo iira ohinatthi ottipha, nave Samuweli aarimumpaathi mutemplo* mwa Yehova, memmo mwaari aya nivuku na nivarihano na Muluku.
4 Yehova aahimwiihana Samuweli, nto Samuweli aahaakhula wiira: “Miyo kiri-va”.
5 Samuweli aahitthimakela wa Eli, onamuleela wiira: “Miyo kiri-va, mukiihanenle-ni?” Masi Eli aahaakhula wiira: “Nkiwiihanneni. Murowe mwampaathi”. Samuweli, aahirowa wumpaathi.
6 Yehova aahitthikela-tho omwiihana oriki: “Samuweli!” Vano Samuweli aahivenya onarowa vaari awe Eli, onamuleela wiira: “Miyo kiri-va, kiira mookiihana?” Masi Eli aahimwaakhula wiira: “Nkiwiihanneni mwanaka. Murowe mwampaathi”.
7 (Samuweli nlelo khaamusuwela Yehova, nave iira ohinatthi osuwelihiwa nuulumo na Yehova.)
8 Yehova aahimwiihana ekwaha ya neeraru oriki: “Samuweli!” Nto Samuweli aahivenya onarowa vaari awe Eli, onamuleela wiira: “Miyo kiri-va, tthiri mookiihana”.
Nto, Eli aahisuwela wiira aari Yehova aamwiihana mmiravo ole.
9 Siiso, Eli aahimuhimeerya Samuweli wiira: “Murowe, mwampaathi. Owo awiihanani, mwaakhule wiira: ‘Mulavuleke, Yehova, okhala wiira murumeyi anyu onnoowiriyanani’”. Vano, Samuweli aahirowa wumpaathi opuro awe.
10 Yehova aahirwa eemela opuro ole, onamwiihana ntoko ikwaha sikina, oriki: “Samuweli, Samuweli!” Nto Samuweli, aahaakhula wiira: “Xontte, mulavuleke, okhala wiira murumeyi anyu onnoowiriyanani”.
11 Yehova aahimuleela Samuweli wiira: “Mwiiwe! Miyo kinoopaka etthu wIsarayeli, ole onrowa wiiwa etthu eyo onootikinihiwa.
12 Nihiku nlo, miyo kinoomwiirela Eli itthu sootheene kihimmye aka wiira kinoowiirela atthu a etthoko awe, okhuma vampacerya aya mpakha vammalela aya.
13 Mmuleele wiira kinookumiherya ehukhumu etthoko awe, voohimala-tho, mwaha wa etthu yootakhala onisuwela awe, maana anaawe anninveeha Muluku* masi owo khonaattaruxa.
14 Tivo vaalaphenle aka etthoko ya Eli, wiira khuuvo mukuttho nnakhala yoovaha onrowa waakiherya yoottheka ya etthoko ya Eli”.
15 Samuweli aahimpaathi mpakha oxa. Vano, aahihula mikhora sa empa ya Yehova. Samuweli aanoova omuleela Eli, ele Muluku aamulenle awe.
16 Masi Eli aahimwiihana Samuweli oriki: “Samuweli, mwanaka!” Samuweli aahaakhula wiira: “Miyo kiri-va”.
17 Eli aahimukoha wiira: “Muluku oohimenryeni exeeni? Xontte, muhikikhuwe etthu. Muluku oohukhumuni, mwaahikileele moolumo ootheene oohimenryaaweni”.
18 Siiso, Samuweli aahimuleela itthu sootheene, ni khaamukhunwe etthu. Nto Eli aahihimya wiira: “Owo Yehova. Mmuhiye opake ele eri yooloka vamaithoni vawe”.
19 Samuweli aaninnuwa, nave Yehova aari nuuwo ni aahimaliherya moolumo awe ootheene.
20 Atthu ootheene a Isarayeli, okhuma oDani mpakha oBeri-Xeba, yaahisuwela wiira Samuweli aahithanliwa ntoko profeta a Yehova.
21 Yehova aahithipelela okhumelela oSilo, okhala wiira oSilo weiwo Yehova taisoonihenrye awe wa Samuweli. Yehova aahipaka eyo orumeelaka nuulumo nawe.
