Samuweli Oopacerya 30:1-31
30 Okathi Davidi ni atthu awe yaaphiyale aya oSikilaki nihiku na neeraru, atthu a wAmaleki yaahirwa osuuli* ni oSikilaki, atuphela oSikilaki, apaha muttetthe owo.
2 Atthu a wAmaleki yaahaakuxa athiyana ni atthu ootheene yaari epooma ele, axikhaani ni aalupale. Awo khiyaamwiivale mutthu, masi yaahaakuxa anarowa.
3 Nuumala Davidi ni atthu awe ophiya opooma, yaahiphwanya epooma eyo epahiwe ene, nave axaaraya, anaaya axilopwana ni axithiyana akuxiwe ene.
4 Vano, Davidi ni atthu awe yaahipacerya wunla vanceene, mpakha ohikhalana-tho ikuru soowunla.
5 Nave-tho, axaara anli a Davidi, Ahinowami a oYezireyeli ni Abigayili naamukhweli a Nabali a oKarmelo, yaahikuxiwa.
6 Davidi aahixanka vanceene, okhala wiira atthu ootheene yaahiriipiwa murima mwaha woowaakhiwa anaaya axilopwana ni axithiyana, ni yaaniphavela onvonya maluku Davidi. Masi, Davidi aahiilipiha ni ikuru sa Yehova Muluku awe.
7 Davidi aahimuhimeerya namukuttho Abiyatari, mwaana a Ahimeleki wiira: “Xontte, mukiruuhele eefodi”.* Vano Abiyatari aahimuroihela eefodi Davidi.
8 Davidi aahimukoha Yehova oriki: “Kaatthimakeleke anawiive ale? Kiireke kinimwaaphwanya?” Muluku aahimwaakhula oriki: “Mwaatthimakeleke, okhala wiira munimwaaphwanya, ni munoowoopola atthu anyu ni itthu sootheene”.
9 Moowaakuveya, Davidi ni alopwana 600 aarina awe, yaahivenya enarowa. Okathi yaaphiyale aya okhatoni wa oBesori, akina a yaawo yaahihala weiwo.
10 Davidi ni alopwana 400 yaahithipelela owoomola anawiive ale, masi alopwana 200 yaawo yaakhulumunwe ahinawerya olapuwa ekhato ya oBesori, yaahihala weiwo.
11 Okathi yaarowa aya, yaahimphwanya mulopwana mmosa a wExiitu, amukuxa amuroiha wa Davidi. Awo yaahinvaha yoolya ni maasi oowurya.
12 Yaahinvaha-tho eboolu ya ifiiku soonyakattiwa, ni iboolu piili sa ewuuva yoowuuma. Nuumala olya, aahiphwanya ikuru, okhala wiira yaahivira mahiku mararu, othana ni ohiyu ohilinye etthu nnakhala ohiwunrye maasi.
13 Davidi aahimukoha wiira: “Nyuwo mwa murumeyi aawani? Munikhuma vai?” Owo aahaakhula wiira: “Miyo kinikhuma wExiitu nave ka murumeyi a mulopwana mmosa a wAmaleki, masi pwiyaka ookinyanyala, okhala wiira aavira mahiku mararu kiwereiwaka.
14 Hiyo naahirowa otuphela osuuli* wa muttetthe wa akereti, muttetthe wa oYuda, ni osuuli wa muttetthe wa Kalebi, nave naahipaha oSikilaki”.
15 Davidi aahimukoha wiira: “Munoowerya okihoola opuro ori aya anawiive awo?” Owo aahaakhula wiira: “Mwakilaphela ni nsina na Muluku wiira khamunrowa okiiva, ni khamunrowa okivahererya mmatatani mwa pwiyaka, kinimoohoolani mpakha opuro ori aya anawiive awo”.
16 Vano, mulopwana owo aahimuhoola Davidi mpakha opuro yaari aya atthu a wAmaleki. Nto, atthu a wAmaleki, yaahimwara-mwareya muttetthe wootheene, alyaaka, awuryaka, ni atthapaka mwaha wa itthu sinceene yaawaakhale aya atthu a elapo ya afilisti ni a elapo ya oYuda.
17 Davidi aahiwiivakasa atthu a wAmaleki okhuma oxaka mpakha ohiyu. Khuuvo ooponwe ahikhanle paahi alopwana 400 yaawo yaatthyanwe ni ikamelo.
18 Nto, Davidi aahikuxa itthu sootheene atthu a wAmaleki yaakunxe aya, nave aahiwoopola axaarawe anli.
19 Awo yaahikuxa itthu sootheene, saamukhaani ni suulupale. Nave yaahaakuxa anaaya axilopwana ni axithiyana, ni itthu yaakhiwe aya. Davidi aahikuxa itthu sootheene atthu a wAmaleki yaakunxe aya.
20 Davidi aahikuxa ipwittipwitthi sootheene ni ipooyi sa atthu a wAmaleki, otakaaherya ni mihuwo sawe sakuxiwe. Ale yaakhapelela yaanihimya wiira: “Iya ti sa Davidi”.
21 Davidi aahitthikela opuro yaahanle aya alopwana 200, yaawo yaakhulumunwe ahinawerya omutthara, yaahanle waattamela okhatoni wa oBesori. Alopwana awo yaahirwa okumana ni Davidi, vamosa ni atthu aarina awe. Okathi Davidi aawaattamenle awe, aahaakoha ihaali.
22 Masi, alopwana akina ootakhala ni yahaarina efaita yaaronwe ni Davidi yaahihimya wiira: “Okhala wiira atthu ale khiyaaronwe ni hiyo, khinnaavaha itthu nikunxe ahu. Khula mulopwana omukuxeke paahi mwaarawe ni anaawe, orooke”.
23 Masi Davidi aahihimya wiira: “Axinnaka, muhiire siiso, okhala wiira Yehova tonivanhe itthu iye. Owo oonikhapelela ni oonivahererya anawiive mmatatani mwahu yaarwaale onituphela.
24 Taani onikupali moonelo owo? Etthu enrowa aya ovahiwa ale yaaronwe okhottoni ni ale yaahalanne miritti, enrowa olikanaka. Atthu ootheene animwaakhela itthu simosa-ru”.
25 Okhuma nihiku nenle orowa ohoolo, Davidi aahiiriha moolumo ala okhala nlamulo ni yooruma wa aisarayeli mpakha olelo-va.
26 Okathi Davidi aatthikenle awe oSikilaki, aahaaroihela axitokweene a oYuda itthu sikina aakunxe awe, yaawo yaari apatthani awe, oriki: “Mwaakhele soovaha iya kiwaakhale aka awanani a Yehova”.
27 Davidi aahaaroihela soovaha iyo ale yaakhala oBeteli, oRamothi wa oNegebi,* oYatiri,
28 ale yaakhala wAroweri, oSifemothi, wExitemowa.
29 Nave aahaaroihela ale yaakhala oRakali, ni ale yaakhala ipooma sa oYerameyeli, ni ipooma sa akeni,
30 naale yaakhala oHorma, oBoraxani, wAtaki,
31 ale yaakhala oHebroni, ni mapuro ootheene Davidi ni alopwana awe yaakhanle aya.
Inoota
^ Aahiiso, “oNegebi”.
^ Nwehe Moolumo Ootthokiheriwa.
^ Aahiiso, “oNegebi”.
^ Aahiiso, “osuuli”.
