Samuweli Oopacerya 6:1-21
-
Afilisti annittikiherya nivuku na nivarihano wIsarayeli (1-21)
6 Nivuku na nivarihano na Yehova, naahikhala muttetthe wa afilisti miyeeri 7.
2 Afilisti yaahiwiihana anamukuttho ni anahako, anaakoha wiira: “Niirihe exeeni nivuku na nivarihano na Yehova? Munileele moota nikhanle ahu oottikiherya opuro aya”.
3 Awo yaahaakhula wiira: “Mwaaroihaka nivuku na nivarihano na Yehova, Muluku a Isarayeli, muhiroihe siiso, muroihe ni yoovaha. Moohaanyiherya, muhaana oroiha yoovaha mwaha wookhalana nthowa. Siiso paahi, munrowa anyu openuxiwa, ni munoosuwela nthowa naya ahoohiyaaweni”.
4 Nto afilisti yaahikoha wiira: “Yoovaha xeeni nikhanle ahu ooroiha mwaha wookhalana nthowa?” Awo yaahaakhula wiira: “Muroihe ilatarato thanu sa eweero sa munamuluku, ni ilatarato thanu sa eweero sa makhule, moovarihana ni nummuru na anamalamulela a afilisti, okhala wiira nyuwo ni anamalamulela awo yaahoophwanyani ehukhumu emosa-ru.
5 Mpake ilatarato sa munamuluku ookhummeni, ni ilatarato sa makhule anyu, yaawo anihonona elapo, ni mmuttittimihe Muluku a Isarayeli. Woonasa wene owo onoomaliha ehukhumu eriyari anyu, eriyari ya amuluku anyu, ni eriyari ya elapo anyu.
6 Xeeni munuumiha anyu mirima sanyu ntoko atthu a wExiitu ni Farawo yuuminhe aya mirima saya? Okathi Muluku aahaaxale awe, yaahaana waahiya aisarayeli arowaka, nto aisarayeli yaahirowa.
7 Vano, mulokiherye ekaaro esya enipuruliwa ni inama, ni ipooyi piili soothiyana sirina axaana aya, sihitonko ovarihiwa muteko. Nuumala-vo, mutthukwelele ipooyi iyo ekaaro eyo, ni mwaakuxe axaana aya, mwaattikiherye munsisini.
8 Moottharelana, mukuxe nivuku na nivarihano na Yehova, muhele mukaaroni, ni mukuxe itthu sa eweero seiyo munrowa anyu onvaha, mwaha wookhalana nthowa, muhele mukaaxani waattamela nivuku nlo. Nuumala-vo, muhiye ipooyi iyo sirowaka.
9 Nwehexexeke ipooyi iyo: sakela estaraata enrowa oBethi-Xemexi, muttetthe* aya, nnoosuwela wiira owo tonikumihenrye ehasara ela. Masi vaahiireye siiso nnoosuwela wiira owo khahiyo tonikumihenrye ehasara ela, ekhumelenle mekhaya-ru”.
10 Alopwana awo yaahiira siiso: Yaahikuxa ipooyi piili soothiyana saarina axaana aya, atthukwelela vakaaroni enipuruliwa ni inama, ni yaatthukwela axaana aya munsisini.
11 Nuumala-vo, yaahihela nivuku na nivarihano na Yehova, mukaaroni enipuruliwa ni inama, vamosa ni ekaaxa yaarina ilatarato sa eweero sa makhule, ni ilatarato sa munamuluku aakhumme.
12 Nto, ipooyi iyo saahitthara estaraata yaarowa oBethi-Xemexi. Ipooyi iyo saanitthara estaraata eyo sinlaka, sihirukunuwelaka nnakhala moono woolopwana nnakhala moono woothiyana. Anamalamulela a afilisti, yaanitthara ipooyi iyo mpakha omukanoni wa oBethi-Xemexi.
13 Atthu a oBethi-Xemexi, yiira ahephaka etiriku opuro woowaataleya.* Okathi yaattukhunle aya maitho aya, yaahiweha nivuku na nivarihano, nto yaahitteeliwa murima vanceene.
14 Ekaaro eyo enipuruliwa ni inama, yaahikela mmatta mwa Yoxuwa, a oBethi-Xemexi, ni yaaheemela waattamela nluku nuulupale. Nto, yaahiikittha mwiri wa ekaaro eyo, apaka ikhuni ni yaahivaha ipooyi iyo ntoko mukuttho woopahiwa anvahaka Yehova.
15 Alevi yaahikuruxa nivuku na nivarihano na Yehova, ni ekaaxa yeeyo yaattamenle nivuku nlo, yeeyo yaaheliwe itthu sa eweero, ni yaahipweha vasulu va nluku nuulupale. Nihiku nenlo, alopwana a oBethi-Xemexi, yaahinvaha Yehova mikuttho soopahiwa ni mikuttho sikina.
16 Nuumala anamalamulela athanu a afilisti oweha eyo, nihiku nenlo yaahitthikela wEkironi.
17 Afilisti yaahinvaha Yehova ilatarato thanu sa eweero sa munamuluku, ntoko yoovaha mwaha wa okhalana nthowa. Awo yaahivaha ilatarato iyo mwaha wa ipooma iya sinttharelana: wAxidodi, oGaza, wAxikeloni, oGathi ni wEkironi.
18 Anamalamulela athanu a afilisti, yaahivaha ilatarato sa eweero sa makhule, attharihaka nummuru na ipooma saya sootheene, eyo piiyo, ipooma soolipihiwa, ni mittetthe saya saari mmatta.
Nto, nluku nuulupale yaapwenhe aya nivuku na nivarihano na Yehova, nri mmatta mwa Yoxuwa, a oBethi-Xemexi, ntoko namoona mpakha olelo-va.
19 Masi, Muluku aahiwiiva alopwana a oBethi-Xemexi, mwaha woowi yaahiweha nivuku na nivarihano na Yehova. Owo aahiwiiva alopwana 50.070.* Nto, atthu yaahipacerya wunla mwaha woowi Yehova aahiwiiva atthu anceene.
20 Alopwana a oBethi-Xemexi yaahikoha wiira: “Taani onrowa owerya weemela ohoolo wa Yehova, Muluku ola oowaarya? Nithaamiherye vai, nivuku na nivarihano na Muluku?”
21 Vano, yaahaaruma alopwana orowa oKiriyathi-Yarimi, waahimeerya wiira: “Afilisti aattikiha nivuku na nivarihano na Yehova. Murwe, mukuxeke nyuwo”.
