Samuweli Oopacerya 8:1-22
8 Okathi Samuweli uuluvanle awe, aahaathanla anaawe wiira yaalamuleleke atthu a Isarayeli.
2 Mwanawe oopacerya oyariwa aihaniwa Yoweli, nave mwanawe a nenli aihaniwa Abiya. Awo yaalamulela oBeri-Xeba.
3 Masi anaawe khiyaatthara ntakiheryo nawe. Awo yaaphavela mureerelo aya, yaaneemererya okunyariwa, nave khiyeettela exariya.
4 Nuuvira okathi, ahooleli ootheene a atthu a Isarayeli, yaahithukumana ni yaahirowa wa Samuweli oRama.
5 Awo yaahimuhimeerya wiira: “Nyuwo muhuuluvala, nave aniinyu khanitthara ntakiheryo nanyu. Munithanlele mwene wiira onilamuleleke, ntoko siniira aya maloko makina”.
6 Masi eyo khiyaamusivenle* Samuweli, nuumala atthu awo ohimya wiira: “Munithanlele mwene wiira onilamuleleke”. Nto Samuweli aahinvekela Yehova.
7 Vano Yehova aahimuhimeerya Samuweli wiira: “Nwiriyane itthu sootheene atthu awo anooleelaayani, okhala wiira khahiyo anookhoottani nyuwo, masi anikikhootta miyo ntoko mwene aya.
8 Awo anipaka etthu emosa-ru yaapanke aya okathi kaakuminhe aka wExiitu mpakha olelo-va. Annithipelela okinyanyala ni annaarumeela amuluku akina, nave eyo ti etthu eniwiirelaayani.
9 Vano mwaawiriyane atthu awo. Masi, mwaalopole oratteene, ni mwaatthokiherye ele mwene onrowa waalamulelaka, onkela awe waavekelaka”.
10 Samuweli aahaaleela atthu ale yanvekela mwene moolumo ootheene a Yehova.
11 Owo aahihimya wiira: “Etthu enrowa awe ovekelaka mwene onrowa woolamulelani tiila: Onimwaakuxa aniinyu axilopwana, onimwaaweliha mukaaroni mwawe ya ekhotto, nave onimwaakhaliha anakhavalo awe. Akina anrowa otthimakaka ohoolo wa ikaaro sawe sa ekhotto.
12 Nave onimwaathanla maxeefi a atthu 1.000 ni maxeefi a atthu 50. Akina anrowa olimaka imatta sawe, ohepha ipyo sawe ni opaka ikaruma sawe sa ekhotto, ni ikaaro sawe.
13 Nave onimwaakuxa aniinyu axithiyana wiira ampakeleke iperfume, amwaapeeleke, ni amooxeryeke iphaawu.
14 Onookuxa imatta sanyu sooreerexa, imatta sanyu sa ewuuva ni sa olivera, onimwaavaha arumeyi awe.
15 Onookuxa epantte ya namuloko ya imatta sanyu munaala anyu ipyo, ni imatta sanyu sa ewuuva, onimwaavaha makhulupale aninvarela muteko ni arumeyi awe.
16 Onimwaakuxa arumeyi anyu axilopwana ni axithiyana, onookuxa ipooyi sanyu sooreerexa ni apuuru anyu, wiira yanvareleke muteko.
17 Onookuxa epantta ya namuloko ya ipwittipwitthi sanyu, nave nyuwo munrowa okhala arumeyi awe.
18 Nnoophiya nihiku munrowa anyu wunla mwaha wa mwene mmuthanlale anyu, masi Yehova khonrowa owaakhulani nihiku nlo”.
19 Nto, atthu ale yaahikhootta onwiriyana Samuweli, anahimya wiira: “Nnaari, hiyo nimphavela okhalana mwene ahu.
20 Hiyo ninrowa olikanaka ni maloko makina, nave mwene ahu onrowa onilamulelaka, onihoolela, ni owana ikhotto vamosa ni hiyo”.
21 Nuumala Samuweli owiriyana moolumo ootheene a atthu ale, aahitthikela omuleela Yehova.
22 Yehova aahimuleela Samuweli wiira: “Mwaawiriyane atthu awo, mmuthanle mwene wiira aalamuleleke”. Vano Samuweli aahaaleela alopwana a Isarayeli, wiira: “Khula mmosa a nyuwo otthikeleke epooma awe”.
Inoota
^ Eheeberi, “yaari yoohiloka vamaithoni va”.
