Samuweli Oopacerya 9:1-27
-
Samuweli onnikumana ni Sawuli (1-27)
9 Aahikhala mulopwana mmosa a nihimo na Beniyamini aihaniwa Kiixi, mwaana a Abiyeli, mwaana a Serori, mwaana a Bekorathi, mwaana a Afiya. Mulopwana owo aari oothaaciri vanceene.
2 Owo aahikhalana mwaana mwaamulopwana aihaniwa Sawuli, yoowo aari mmiravo ooreera. Eriyari ya aisarayeli, khaakhanle mulopwana mukina ootepa oreera onvikana yena. Owo aari ootepa orakama waavikana akina. Nave akina yammalela mmakhatani.
3 Nihiku nimosa, apuuru oothiyana a Kiixi, paapa awe Sawuli, yaahirimeela. Vano Kiixi, aahimuhimeerya mwanawe, Sawuli, wiira: “Xontte, mmukuxe murumeyi mmosa, murowe mwaaphavele apuuru awo”.
4 Awo yaaheetteetta muttetthe wootheene wa omiyaakoni wa Efrayimi, ni elapo yootheene ya oXalixa, masi khiyaaphwannye apuuru awo. Nuumala-vo, yaaheetteetta muttetthe wootheene wa oXaalimi, khuhaaphwanya. Vano yaaheetteetta elapo yootheene ya nihimo na Beniyamini, masi khiyaaphwannye apuuru awo.
5 Moottharelana, yaahiphiya elapo ya oZufi, vano Sawuli aahimuhimeerya murumeyi awe wiira: “Nrowe nitthike, wiira apaapa ahipacerye oxankiheya ni hiyo, ohiya oxankiheya ni apuuru”.
6 Masi murumeyi awe aahimwaakhula oriki: “Moosuwela, ookhala mulopwana a Muluku epooma ela, nave owo onnittittimihiwa vanceene. Itthu sootheene onihimya awe sinniiraneya. Nrowe weiwo niinaano-va. Woonasa wene, onoonileela onrowa ahu waaphwanya apuuru”.
7 Sawuli aahimuhimeerya murumeyi awe wiira: “Vakhala wiira nnoorowa, exeeni ninrowa ahu onvaha mulopwana owo? Khanrina iphaawu mmirupani mwahu. Khanirina etthu wiira nanvahe mulopwana owo a Muluku eekeekhai. Nrina-ni?”
8 Murumeyi awe aahimwaakhula Sawuli wiira: “Kookhalana mmatatani mwaka-mu musurukhu vakhaani wa eparatha.* Kinrowa onvaha mulopwana a Muluku eekeekhai, wiira onileele onrowa ahu waaphwanya apuuru”.
9 (Khalai, wIsarayeli, okathi mutthu amphavela awe Muluku aanihimya wiira: “Nrowe wa mulipa onisuwela otaphulela itthu ooniheriwe awe ni Muluku”. Khalai, profeta aihaniwa mulipa onisuwela otaphulela itthu ooniheriwe awe ni Muluku.)
10 Nto Sawuli aahimuhimeerya murumeyi awe wiira: “Etthu enihimya anyu ti yooreera. Nrowe”. Siiso yaahirowa opooma, opuro aari awe mulopwana a Muluku eekeekhai.
11 Okathi yaawela aya arowaka opooma, yaahaaphwanya aximwali arowaka orika maasi. Nto yaahaakoha wiira: “Mulipa onisuwela otaphulela itthu ooniheriwe awe ni Muluku ori wenno?”
12 Awosa yaahaakhula wiira: “Aayo, ori weiwo. Mwaakuveke, ophiyale olelo vaava opooma, okhala wiira atthu ampaha mukuttho olelo opuro woorakamela osulu onikokhoreliwa Muluku.
13 Mphiyaka-ru opooma, munomphwanya ohinatthi orowa opuro woorakamela osulu onikokhoreliwa Muluku wiira alye. Atthu khanrowa olya owo ohinatthi ophiya, okhala wiira ti yoowo onireeliha mukuttho owo. Iiraka-ru siiso, ale alattuliwe, annoolya. Mwaakuveke, murowe niinaano-va, munomphwanya”.
14 Nto Sawuli ni murumeyi awe yaahirowa opooma. Vaaphiyale aya mpooma-mme, yaahimoona Samuweli orwaaka ephiro yeele, orowaka opuro woorakamela osulu waakokhoreliwa Muluku.
15 Nihalaka nihiku nimosa wiira Sawuli orwe, Yehova aahimuleela* Samuweli wiira:
16 “Meelo okathi ene yoola, kinimooruuhelani mulopwana mmosa a elapo ya Beniyamini. Mmuthanle wiira aahooleleke atthu aka aisarayeli. Owo tonrowa owoopola atthu aka mmatatani mwa afilisti. Tthiri miyo kihoona ohaaxiwa wa atthu aka, nave okikhuwelela waya wookiphwanya”.
17 Okathi Samuweli aamoonale awe Sawuli, Yehova aahimuleela wiira: “Mulopwana kaamuhimya aka tuula: ‘Ti yoola onrowa waalamulelaka atthu aka’”.
18 Sawuli aahimwaattamela Samuweli vamukhora va epooma, onamukoha wiira: “Xontte, owannyawe mulipa onisuwela otaphulela itthu ooniheriwe awe ni Muluku ti woowi?”
19 Samuweli aahimwaakhula Sawuli wiira: “Mulopwana owo onisuwela otaphulela itthu ooniheriwe awe ni Muluku ti yoomi. Muhooleke nirowaka opuro woorakamela osulu onikokhoreliwa Muluku. Olelo, oowanli anyu munimoolya vamosa ni miyo. Meelo voosiisu, kinimoohiyani murowaka, ni kinimooleelani itthu sootheene muniphavela anyu osuwela.*
20 Vano, mwaha wa apuuru oothiyana yaarimenle masuri, muhixanke, okhala wiira aaphwanyiwa. Ti saawani itthu sootheene sooreera sa Isarayeli? Kiira ti saawinyu ni emusi yootheene ya paapa anyu?”
21 Sawuli aahaakhula wiira: “Nkihiyo miyo mutthu a nihimo na Beniyamini, nri nootepa oyeva mwa mahimo a Isarayeli? Etthoko aka khahiyo yooyevexa ovikana itthoko sootheene sa nihimo na Beniyamini? Xeeni munikileela anyu itthu iya?”
22 Vano, Samuweli aahimukuxa Sawuli ni murumeyi awe, omuroiha opuro waalyiwa, onvaha opuro wookilaathi ohoolo wa atthu yaalattuliwe. Opuro ole, yaahikhala alopwana oowiiraka 30.
23 Samuweli aahimuleela mulipa-oowaapeya wiira: “Muruuhe epetaaso ya enama, koovanhaakani, ni koovekenlyaakani wiira mpwehe vawaya-ru”.
24 Mulipa-oowaapeya aahiruuha mwetto wootheene wa enama, opweha ohoolo wa Sawuli. Samuweli aahihimya wiira: “Etthu mwaasukeriwe anyu tiila. Mulyeeke, okhala wiira yaapwehiwe vawaya-ru wiira mulye okathi ola. Miyo kaahihimya wiira: ‘Kinookhalana aletto’”. Siiso, nihiku nenle, Sawuli aahilya vamosa ni Samuweli.
25 Nuumala-vo, yaahikhuruwa opuro woorakamela osulu waakokhoreliwa Muluku, anarowa opooma. Vano Samuweli aahithipelela ovaanela ni Sawuli vasulu va empa.
26 Vaxaaka-ru voosiisu, Samuweli aahimwiihana Sawuli vasulu va empa, oriki: “Mwiilokiherye, wiira koolaxeryeni”. Nto, Sawuli aahiilokiherya. Vano Samuweli aahimuhoola Sawuli.
27 Okathi yaakhuruwa aya akhumaka opooma, Samuweli aahimuhimeerya Sawuli wiira: “Mmuleele murumeyi anyu wiira ohooleke masi nyuwo mweemele vaava, wiira kooleeleni nuulumo na Muluku”. Siiso murumeyi owo aahihoola.
Inoota
^ Eyo piiyo, exeekele emosa. Exeekele emosa yaalemela ikarama 11.4. Munwehe Apendise B14.
^ Eheeberi, “aahitthukula maaru a”.
^ Eheeberi, “sootheene siri vamurimani vanyu”.
