Wahala Oopacerya 11:1-47
11 Nuuvira okathi aisarayeli ootheene yaahithukumana ni Davidi oHebroni, anamuhimeerya wiira: “Hiyo nirina ephome emosa-ru.*
2 Khalai, okathi Sawuli aari awe mwene ahu ti nyuwo mwaahoolela ikhotto* wIsarayeli. Nave Yehova Muluku anyu aahoohimeeryani wiira: ‘Nyuwo munrowa oweettihaka atthu aka aisarayeli, nave ti nyuwo munrowa okhala muhooleli a atthu aka aisarayeli’”.
3 Vano, makhulupale ootheene a wIsarayeli yaahirowa okumana ni mwene oHebroni, nto Davidi aahipaka nivarihano naawo oHebroni, ohoolo wa Yehova. Nuumala-vo, yaahimukhaliha Davidi mwene a atthu a Isarayeli, ettharaka moolumo Yehova aalavunle awe omurumeelaka Samuweli.
4 Muhoolo mwaya Davidi ni atthu ootheene a Isarayeli yaahirowa oYerusalemu, eyo piiyo, oYebusi, elapo yeeyo yaakhala aya ayebusi.
5 Atthu a oYebusi yaahimuramusa Davidi ariki: “Nyuwo khamunkhala-khala mukelaka-mu!” Masi, Davidi aahikuxa opuro ole woolipihiwa wa omwaako Siyoni, weiwo olelo-va oniihaniwa epooma ya Davidi.
6 Nto Davidi aahihimya wiira: “Ole onrowa opacerya waatuphela ayebusi, tonrowa okhala xeefi ni mukhulupale”. Vano Yowabi mwaana a Seruwiya taapacenrye, nuumala-vo aahikhalihiwa xeefi.
7 Vano, Davidi aahipacerya okhala opuro woolipihiwa. Tivo opuro ole waavahiwe aya nsina noowi epooma ya Davidi.
8 Davidi aahipacerya oteka ipooma sootheene saarukurenrye, okhuma omwaako* orowa mittetthe saarukurenrye, nave Yowabi aahitthikela oteka mpantta mukina wa epooma.
9 Siiso, Davidi aanitepa okhala oowerya, nave Yehova a anakhotto aari nuuwo.
10 Ala yaari ahooleli a anakhotto ootupa a Davidi, yaawo yaakhalihenrye vanceene omwene awe, vamosa ni aisarayeli ootheene, wiira okhalihiwe mwene ettharaka moolumo Yehova aalavunle awe omuhimyaka Isarayeli.
11 Elista ya anakhotto ootupa a Davidi tiila: Yaxobeyami mwaana a Hakimoni, xeefi a anakhotto ootupa araru. Ekwaha emosa, owo aahiwiiva anakhotto 300 ni nivaka nawe.
12 Aamutthara Yaxobeyami aari Eleyazari mwaana a Dodo, a wAhohi. Owo aari mmosa a anakhotto ale ootupa araru.
13 Owo aari ni Davidi oPasi-Damimi, weiwo afilisti yaathukumanne aya wiira awane ekhotto. Vano weiwo yaahikhala ematta ya esevaata. Nto anakhotto yaahitthyawa mwaha wa afilisti.
14 Masi owo aaheemela eriyari ya ematta eyo, aakiherya, owiivaka afilisti. Siiso, Yehova aahiwiiriha oxintta vaalupale.
15 Eriyari ya maxeefi 30, araru yaahirowa omwala okumana ni Davidi okhukuni wa wAdulami, okathi anakhotto afilisti yaamanke aya opuro woowaataleya wa oRefayimi.
16 Davidi aari opuro woolipihiwa, nave ekurupu ya anakhotto a afilisti yaari oBetelehemu.
17 Nto, Davidi aahihimya etthu aaphavela awe oriki: “Kaawunrye maasi a mweehimeni eri waattamela mukhora wa oBetelehemu!”
18 Siiso anakhotto araru yaahikela opuro yaamanke aya afilisti, arika maasi a mweehimeni yaari waattamela mukhora wa oBetelehemu, amuroihela Davidi. Masi Davidi aahikhootta owurya maasi awo, nave aahiitthela vathi onvahaka Yehova.
19 Owo aahihimya wiira: “Kittharaka moonelo wa Muluku aka, miyo nkinikhala-khala kipakaka etthu eyo! Kinwerya sai owurya ephome ya alopwana ala alenve ikumi saya? Tthiri alopwana ala aaleva ikumi saya wiira aruuhe maasi ala”. Siiso owo khaaphavenle owurya. Ela ti etthu anakhotto ale araru ootupa a Davidi yaapanke aya.
20 Abixayi munnawe Yowabi, aari xeefi a ekurupu ekina ya anakhotto araru. Owo aahiwiiva alopwana 300 ni nivaka nawe, nave aari oovuwa ntoko anakhotto ale araru ootupa oopacerya.
21 Eriyari ya ekurupu ele ya anakhotto araru ootupa, owo taari oovuwa waavikana anli a yaawo, nave taari xeefi aya. Owo khaalikana ni anakhotto ale araru ootupa oopacerya.
22 Benaya mwaana a Yehoyada aari mulopwana oolipa murima,* yoowo aavanre miteko sinceene sootikiniha oKabaseyeli. Owo aahiwiiva anamwane anli a Ariyeli a oMowabi. Nihiku nimosa yaamora aya eneevi aahirowa weehimeni, nave aahimwiiva kharamu.
23 Nave, owo aahimwiiva nakhotto mmosa a wExiitu oorakamexa, eyo piiyo, orakama wawe waari wa ikoovatu 5.* Hata mulopwana owo a wExiitu aakunxe nivaka naalikana ni mwiri onirumeeliwa ni alipa anitthava ikuwo, Benaya aahiwanana okunxe ene ekopo. Nto aahimwaakha nivaka mwexiitu owo, omwiivela nivaka nawe nenlo.
24 Iya ti itthu Benaya mwaana a Yehoyada aapanke awe. Owo aari oovuwa ntoko anakhotto ale ootupa araru.
25 Hata owo aari oovuwa waavikana anakhotto ale ootupa 30, owo khaalikana ni anakhotto ale ootupa araru. Masi Davidi aahimuthanla wiira okhale kwarta awe.
26 Anakhotto ootupa a atoropa yaari ala: Asaheli munnawe Yowabi, Elihanani mwaana a Dodo a oBetelehemu,
27 Xamothi a oHarori, Helesi a oPeloni,
28 Ira mwaana a Ikexi a oTekowa, Abiyezeri a wAnatothi,
29 Sibekayi a oHuxati, Ilayi a wAhohi,
30 Mahirayi a oNetofa, Heledi mwaana a Bayanahi a oNetofa,
31 Itayi mwaana a Ribayi a oXibeya wa Beniyamini, Benaya a oPiratoni,
32 Hurayi a okhatoni wa oGaaxi, Abiyeli a wAraba,
33 Azimavethi a oBahurimi, Eliyaba a oXaalabimi,
34 anamwane a Haxemi a oXizoni, Yonathani mwaana a Xaguwe a oHarari,
35 Ahiyami mwaana a Sakari a oHarari, Elifali mwaana a Uri,
36 Heferi a oMekerathi, Ahiya a oPeloni,
37 Hesiro a oKarmelo, Naarayi mwaana a Ezibayi,
38 Yoweli munnawe Natani, Mibihari mwaana a Hagri,
39 Seleki a wAmoni, Nahirayi a oBeerothi, yoowo aamukhaliherya oteexa eskuutu Yowabi mwaana a Seruwiya,
40 Ira a oYitiri, Garebi a oYitiri,
41 Uriya muhiti, Zabadi mwaana a Ahilayi,
42 Adina mwaana a Xiza a nihimo na Rubeni, yoowo aari muhooleli a nihimo na Rubeni, ni alopwana 30 aarina awe,
43 Hanani mwaana a Maaka, Yoxafathi a oMithani,
44 Uziya a wAxitarothi, Xama ni Yeyeli anamwane a Hotami a wAroweri,
45 Yediyayeli mwaana a Ximiri ni munnawe Yoha a oTizi,
46 Eliyeli a oMahavimi, Yeribayi ni Yoxaviya anamwane a Elinaami, Itima a oMowabi,
47 Eliyeli, Obedi ni Yaasiyeli a oMesobayi.
Inoota
^ Eheeberi, “nikhuva naka ni ephome aka”.
^ Eheeberi, “aari yoowo amwiiriha Isarayeli okhuma ni amwiiriha okela”.
^ Aahiiso, “Omiilo”. Nuulumo na eheeberi nintaphulela “Osariha”.
^ Eheeberi, “mwaana a mulopwana orina efaita”.
^ Orakama wawe waari etthu yoowiiraka imeeturu 2.23. Munwehe Apendise B14.
