Wahala Oopacerya 13:1-14
13 Davidi aahaakoha maxeefi aanakhotto 1.000 ni maxeefi aanakhotto 100, vamosa ni ahooleli ootheene.
2 Vano, Davidi aahaahimeerya atthu a nloko nootheene na Isarayeli wiira: “Moonaka oreerela ni vakhala wiira Yehova Muluku ahu onneemererya, nrowe nirume wiihaniwa axinnihu ari mittetthe sootheene sa wIsarayeli, vamosa ni anamukuttho ni alevi ari ipooma saya ni mittetthe saya, wiira arwe athukumane ni hiyo.
3 Nave nittikihe nivuku na nivarihano na Muluku ahu”. Tthiri awo khiyaakhapelenle nivuku nlo mahiku a Sawuli.
4 Nloko nootheene naaheemererya opaka eyo, okhala wiira atthu ootheene yaahoona okhala etthu yooreera.
5 Siiso, Davidi aahaathukumanya atthu ootheene a Isarayeli, okhuma muro* wa wExiitu mpakha oLebo-Hamati, wiira aruuhe nivuku na nivarihano na Muluku eekeekhai oKiriyathi-Yarimi.*
6 Davidi ni atthu ootheene a Isarayeli yaahirowa oBayala, eyo piiyo, oKiriyathi-Yarimi, muttetthe wa oYuda, wiira aruuhe nivuku na nivarihano na Muluku eekeekhai, Yehova, yoowo ori vasulu* va makerubi, vaavo ninromoliwa aya nsina nawe.
7 Nto, awo yaahirowela nivuku na nivarihano na Muluku eekeekhai owannyawe Abinadabi, aweliha ekaaro esya enipuruliwa ni inama. Uza ni Ahiyo ti yeettiha ekaaro eyo.
8 Davidi ni atthu ootheene a Isarayeli yaanitthapa ohoolo wa Muluku eekeekhai ni anakhotto ootheene, yiipaka isipo, aviola, mithinto sootheene sa ikaruma sa isipo, malapa macikhaani, isimbalo* ni malope.
9 Masi okathi yaaphiyale aya opuro yeepetthiwa etiriku wa Kidoni, Uza aahookola ntata nawe ovarela nivuku na nivarihano, okhala wiira naahanle omoroxiwa ni ipooyi.
10 Vano Yehova aahinanariwa vanceene ni Uza. Nto Muluku aahimwiiva Uza, okhala wiira aahookola ntata nawe ovarela nivuku na nivarihano. Siiso Uza aahikhwa opuro yoole ohoolo wa Muluku.
11 Masi Davidi aahiriipiwa murima mwaha wa Yehova onanariwa vanceene ni Uza. Tivo opuro ole oniihaniwa aya Perezi-Uza* mpakha olelo-va.
12 Nto Davidi aahimoova Muluku eekeekhai nihiku nle, onahimya wiira: “Kinrowa okuxa sai nivuku na nivarihano na Muluku eekeekhai wiira kiroihe epooma aka?”
13 Davidi khaaroihale nivuku na nivarihano opuro aakhala awe, epooma ya Davidi. Masi Davidi aahirumiha wiira nikuxiwe nivuku nlo, niroihiwe owannyawe Obedi-Edomi, a oGathi.
14 Nivuku na nivarihano na Muluku eekeekhai naari ni atthu a etthoko ya Obedi-Edomi, nikhala weiwo miyeeri miraru. Nave Yehova aanaareeliha atthu a etthoko ya Obedi-Edomi ni itthu sootheene aarina awe.
Inoota
^ Aahiiso, “oXehori”.
^ Aahiiso, “vamukhora va oYamathi”.
^ Aahiiso, woonasa wene: “eriyari ya”.
^ Ekaruma ya isipo ya eyuuma enlikana ni eparatho.
^ Nsina nintaphulela “Ohukhummwa wa Uza”.
