Wahala Oopacerya 14:1-17
14 Hirami, mwene a oTiiro, aahaaruma alopwana orowa wa Davidi, akunxe ene matera a eseeturu, alipa-ooteka* ni makalapintero wiira yamutekele empa Davidi.
2 Davidi aahisuwela wiira Yehova, aahimukhaliha mwene a atthu a Isarayeli, okhala wiira aahilipiha vanceene omwene awe mwaha wa atthu awe aisarayeli.
3 Davidi aahikhalana axaarawe anceene oYerusalemu, nave-tho aahaayara anamwane axilopwana ni anamwane axithiyana anceene.
4 Masina a anamwane aayareliwe awe Davidi oYerusalemu taala: Xamuwa, Xobabi, Natani, Salomoni,
5 Ibihari, Elixuwa, Elipeleti,
6 Nogahi, Nefegi, Yafiya,
7 Elixama, Beeliyada ni Elifeleti.
8 Okathi afilisti yaasuwenle aya wiira Davidi aahikhalihiwa mwene a atthu a Isarayeli, afilisti ootheene yaahirowa omwaavya Davidi. Nuumala Davidi osuwela eyo, aahirowa owanana.
9 Nto, afilisti yaahirwa ni yaahipacerya waatuphela atthu a okhatoni wa oRefayimi.
10 Davidi aahimukoha Muluku oriki: “Kirooke kaatupheleke afilisti? Niireke munookivahererya mmatatani mwaka?” Nto Yehova aahimwaakhula wiira: “Murooke, okhala wiira mweekeekhai kinimoovahereryani mmatatani mwanyu”.
11 Davidi aahirowa oBayali-Perasimi ni aahiwana ni afilisti. Vano Davidi aahihimya wiira: “Muluku eekeekhai oowana ni awanani aka orumeelaka ntata naka, ntoko exiri ekomoliwe ni maasi anivira”. Tivonto opuro ole waavahiwe aya nsina noowi Bayali-Perasimi.*
12 Nto Afilisti yaahaahiya amuluku aya weiwo, vano Davidi aahiruma opahiwa amuluku awo vamooroni.
13 Nuuvira okathi, afilisti yaahirowa-tho waatuphela atthu a opuro wowaataleya.
14 Davidi aahimukoha-tho Muluku, masi Muluku eekeekhai aahimuhimeerya wiira: “Muhaatuphele ohoolo waya. Ohiya-vo mutthikele ottuli, nuumala-vo mwaatupheleke ohoolo wa mwiri oniihaniwa balsameiro.
15 Okathi munrowa anyu wiiwa onyakula onlikana ni mukhitto wa atthu orumaka vasulu va mwiri oniihaniwa balsameiro, mwaatupheleke, okhala wiira Muluku eekeekhai onrowa okhala ohoolo wanyu wiira aapwetexe anakhotto a afilisti”.
16 Davidi aahiira ntoko saahimeeriwe awe ni Muluku eekeekhai. Nto awo yaahaatuphela anakhotto afilisti, okhuma oXibeyoni mpakha oXezeri.
17 Siiso ovuwa wa Davidi waahimwara-mwareya ilapo sootheene, nave Yehova aahiiriha maloko ootheene omoovaka Davidi.
