Wahala Oopacerya 15:1-29
15 Vano Davidi khaahiyerenrye oteka ipa sawe epooma ya Davidi. Nave aahilokiherya opuro wa nivuku na nivarihano na Muluku eekeekhai ni aaheemexa etenta* wiira nipwehiwe nivuku nlo.
2 Nto Davidi aahihimya wiira: “Khuuvo oneemereriwa oteexa nivuku na nivarihano na Muluku eekeekhai, ahikhanle alevi paahi, okhala wiira Yehova ohaathanla wiira ateexeke nivuku na nivarihano na Yehova ni anvareleke muteko okathi wootheene”.
3 Moottharelana Davidi aahaathukumanya atthu ootheene a Isarayeli oYerusalemu, wiira aruuhe nivuku na nivarihano na Yehova, opuro aalokihenrye awe.
4 Davidi aahaathukumanya atthu a osuulu wa Aroni ni alevi:
5 akehathi, aahikhala xeefi Uriyeli ni axinnawe 120;
6 amerari, aahikhala xeefi Asaya ni axinnawe 220;
7 agerisomi, aahikhala xeefi Yoweli ni axinnawe 130;
8 osuulu wa Elisafani, aahikhala xeefi Xemaya ni axinnawe 200;
9 osuulu wa Hebroni, aahikhala xeefi Eliyeli ni axinnawe 80;
10 osuulu wa Uziyeli, aahikhala xeefi Aminadabi ni axinnawe 112.
11 Nave-tho, Davidi aahimwiihana namukuttho Sadoki ni Abiyatari vamosa ni alevi Uriyeli, Asaya, Yoweli, Xemaya, Eliyeli ni Aminadabi,
12 onaalela wiira: “Nyuwo mwa ahooleli a imusi sa alevi. Mwiireerihe ni mwaareerihe axinninyu, nave muruuhe nivuku na nivarihano na Yehova, Muluku a Isarayeli, opuro kilokihenrye aka.
13 Ekwaha yoopacerya khimwaateexale nivuku nlo, nto Yehova Muluku ahu aahinanariwa ni hiyo, okhala wiira khinaaphavenle osuwela moota wooteexa”.
14 Vano anamukuttho ni alevi, yaahiireeriha wiira aruuhe nivuku na nivarihano na Yehova, Muluku a Isarayeli.
15 Vano alevi yaahiteexa ni ikopo mmakhatani nivuku na nivarihano na Muluku eekeekhai, ntoko Moise aarumme awe ottharaka moolumo a Yehova.
16 Moottharelana, Davidi aahaaleela maxeefi alevi wiira yaathanle alipa-oowiipa eriyari ya axinnaya, wiira yiipeke vootteeliwa murima, attharihaka ni ikaruma iya sa isipo: atthakare, aviola, ni isimbalo.*
17 Vano, alevi yaahimuthanla eriyari ya nihimo naya, Hemani, mwaana a Yoweli, Asafi mwaana a Berekiya ni Etani mwaana a Kuxaya a emusi ya Merari.
18 Awo yaari vamosa ni axinnaya a ekurupu ya nenli ya amusi aya: Zakariya, Beni, Yaaziyeli, Xemiramothi, Yehiyeli, Uni, Eliyabi, Benaya, Maaseya, Matithiya, Elifelehu, Mikineya ni makwarta a vamukhora Obedi-Edomi ni Yeyeli.
19 Alipa-oowiipa Hemani, Asafi ni Etani, yaahaana orumiha isimbalo sa ekoopiri.
20 Vano Zakariya, Aziyeli, Xemiramothi, Yehiyeli, Uni, Eliyabi, Maaseya, ni Benaya, yaarumiha atthakare yaarina inoota suulupale.*
21 Nave, Matithiya, Elifelehu, Mikineya, Obedi-Edomi, Yeyeli, ni Azaziya, yaarumiha aviola yaawo yaarina inoota samukhaani.*
22 Kenaniya xeefi a alevi, taaweherya moota naateexiwa aya nivuku na nivarihano, okhala wiira aari mutthu oosuwela.
23 Nave Berekiya ni Elikana, yaari makwarta a nivuku na nivarihano.
24 Anamukuttho Xebaniya, Yoxafathi, Netaneli, Amasayi, Zakariya, Benaya, ni Eliyeezeri, yaanoopa malope voowiiwanyeya ohoolo wa nivuku na nivarihano na Muluku eekeekhai, nave Obedi-Edomi ni Yehiya, yaari makwarta a nivuku na nivarihano.
25 Vano, Davidi ni axitokweene a wIsarayeli vamosa ni maxeefi a anakhotto 1.000, atteeliwe ene murima yaahirowela nivuku na nivarihano na Yehova, owannyawe Obedi-Edomi.
26 Okathi Muluku eekeekhai aakhalihenrye awe alevi yaawo yaakunxe nivuku na nivarihano na Yehova, awo yaahivaha mukuttho ipooyi 7 saamukhaani soolopwana ni ipwittipwitthi 7 saamukhaani.
27 Davidi aawanre nlaya nahaarina miyoono naapakiwe ni etesiitu yooreera, ntoko alevi ootheene yaakunxe nivuku na nivarihano, vamosa ni alipa-oowiipa ni Kenaniya, yoowo aaweherya moota naateexiwa aya nivuku na nivarihano ni aaweherya alipa-oowiipa. Nave Davidi aahiwara eefodi* ya eliinyu.
28 Aisarayeli ootheene yaahikuxa nivuku na nivarihano na Yehova akhuwelaka vootteeliwa murima, arumihaka mithinto soovirikana sa malope, isimbalo, ni awoopaka atthakare ni aviola voowiiwanyeya.
29 Masi okathi nivuku na nivarihano na Yehova naapixiwe aya epooma ya Davidi, mwaana mwaamuthiyana a Sawuli, Mikali, ori ene vaxanelani, aahinweha mwene Davidi otuphaka ni otthapaka, nto owo aahipacerya omunyohola Davidi vamurimani vawe.
Inoota
^ Aahiiso, “eheema”.
^ Ekaruma ya esipo ya eyuuma enlikana ni eparatho.
^ Eheeberi, “Alamothi”. Nwehe Moolumo Ootthokiheriwa.
^ Eheeberi “Siminethi”. Nwehe Moolumo Ootthokiheriwa.
^ Nwehe Moolumo Ootthokiheriwa
