Wahala Oopacerya 18:1-17
18 Nuuvira okathi vakhaani, Davidi aahiwana ni afilisti ni aahaaxintta. Nave Davidi aahiwaakha afilisti awo epooma ya oGathi ni mittetthe saya saamukhaani.*
2 Owo aahaawerya atthu a oMowabi, nto atthu a oMowabi yaahikhala arumeyi a Davidi, nave yaanimuliva mpoosito.
3 Davidi aahimuxintta-tho mwene Hadadezeri a oSoba, waattamela oHamati, okathi aarowa awe muttetthe wa muro Eufrate wiira atthikele olamulela.
4 Davidi aahivara ikaaro sa ekhotto 1.000, anakhavalo 7.000 ni anakhotto 20.000 yeetta mwentto. Nto, Davidi aahiikittha mitika* sa ikhavalo seettiha ikaaro sa ekhotto, ohiya ikhavalo 100.
5 Okathi atthu a oSiiria a oDamaasiko yaarwaale aya wiira amukhaliherye mwene Hadadezeri a oSoba, Davidi aahiwiiva atthu a oSiiria 22.000.
6 Davidi aahaakhaliha atoropa oSiiria wa oDamaasiko, nave atthu a oSiiria yaahikhala arumeyi a Davidi ni yaanimuliva mpoosito. Yehova aanimwiiriha Davidi oxintta* khula opuro aarowa awe.
7 Ohiya-vo, Davidi aahikuxa iskuutu sa eweero,* sa arumeyi a Hadadezeri, oroiha oYerusalemu.
8 Nave mwene Davidi aahiruuha ekoopiri yinceene aakunxe awe oTibihathi ni oKuni, seiyo saari ipooma sa Hadadezeri. Salomoni aahirumeela ekoopiri eyo wiira opake epasiya yuulupale ya maasi yaihaniwa ephareya, ipilaari ni mireerelo sa ekoopiri.
9 Nuumala mwene Toyi a oHamati wiiwa wiira Davidi aahaaxintta anakhotto ootheene a mwene Hadadezeri a oSoba,
10 moowaakuveya owo aahimuruma mwanawe Hadorami orowa wa mwene Davidi, wiira amukohe ihaali ni amuxukhurele mwaha woomuxintta Hadadezeri (okhala wiira Hadadezeri aamakela owana ni Toyi). Nto owo aahimuroihela Davidi mireerelo sootheene sa eweero, eparatha ni ekoopiri.
11 Mwene Davidi aahinvaha Yehova itthu iye, ntoko anvanhe awe eparatha ni eweero aawaakhale awe atthu a maloko ootheene: okhuma wEdomi ni oMowabi, atthu a wAmoni, afilisti ni atthu a wAmaleki.
12 Abixayi, mwaana a Seruwiya, aahiwiiva atthu a wEdomi 18.000 okhatoni wa Maakha.
13 Davidi aahaahiya atoropa wEdomi. Nave atthu ootheene a wEdomi yaahikhala arumeyi a Davidi. Yehova aanimwiiriha Davidi oxintta* mapuro ootheene aarowa awe.
14 Davidi aanaalamulela aisarayeli ootheene, nave owo aanaaphukela atthu ootheene mwa xariya.
15 Yowabi mwaana a Seruwiya, aari xeefi anakhotto, vano Yosafati mwaana Ahiludi, aari mulipa-oolepa.
16 Sadoki mwaana a Ahitubi, ni Ahimeleki mwaana a Abiyatari yaari anamukuttho, nave Xavixa aari sekretaario.
17 Benaya mwaana a Yehoyada, taahoolela akereti ni apeleti. Vano anamwane a Davidi yaari makhulupale.
Inoota
^ Aahiiso, “saarukurenrye”.
^ Aahiiso, “misiphe”.
^ Aahiiso, “woopowa”.
^ Aahiiso, “makula a eweero”.
^ Aahiiso, “woopowa”.
