Wahala Oopacerya 21:1-30
21 Vano Satana* aahaarukunuwela atthu a Isarayeli ni aahimutumererya Davidi waakontari atthu a Isarayeli.
2 Nto Davidi aahimuhimeerya Yowabi ni maxeefi a atthu wiira: “Murowe mwaakontari atthu a Isarayeli okhuma oBeri-Xeba mpakha oDani, nuumala-vo mukileele wiira kisuwele mwaattelo aya”.
3 Masi Yowabi aahimwaakhula oriki: “Yehova owuncererye atthu awe ikwaha 100! Pwiya aka mwene, kiira atthu ala ootheene arumeyi a pwiya aka? Masi xeeni pwiya aka oniphavela awe opaka etthu ela? Xeeni muniphavela anyu waakumiherya mulattu atthu a Isarayeli?”
4 Moolumo a mwene yaari oowerya ovikana moolumo a Yowabi. Nto Yowabi aaheetteetta wIsarayeli, nuumala-vo aahitthikela oYerusalemu.
5 Yowabi aahinvahererya Davidi nummuru na atthu aalempe awe. Atthu ootheene a Isarayeli yaari anakhotto 1.100.000 yaakunxe espaata. Nave atthu a oYuda yaari anakhotto 470.000 yaakunxe espaata.*
6 Masi owo khaakontanri atthu a nihimo na Levi ni na Beniyamini vamosa ni atthu ale, okhala wiira moolumo a mwene khiyaamusivenle Yowabi.
7 Etthu eyo yaahimunanara vanceene Muluku eekeekhai, nto owo aahaahukhumu atthu a Isarayeli.
8 Davidi aahimuhimeerya Muluku eekeekhai oriki: “Koottheka vaalupale mwaha woopaka etthu ela. Vano, xontte, mmulevelele murumeyi anyu, okhala wiira oopaka etthu yeelolo”.
9 Yehova aahilavula ni Gadi, yoowo aamutaphulela Davidi itthu ooniheriwe awe ni Muluku. Vano Muluku aahimuhimeerya wiira:
10 “Murowe, mwamuhimeerye Davidi wiira: ‘Enihimya awe Yehova tiila: “Sookhala ihukhumu iya tthaaru. Muthanle emosa, nto miyo kinoowiirelani yeeyo”’”.
11 Siiso, Gadi aahirowa wa Davidi onamuleela wiira: “Enihimya awe Yehova tiila: ‘Muthanle ele eniphavela anyu,
12 akhala wiira ehaana okhumelela etala iyaakha tthaaru, aahiiso muniphavela wiira mwaatthyaweke awanani anyu miyeeri miraru okathi anoolupathayani ephavelaka woovarani, wala muniphavela espaata ya Yehova mahiku mararu, eyo piiyo, ekwerere mulaponi mwanyu, nlaikha na Yehova naapwetexaka atthu a Isarayeli mittetthe sootheene’. Muupuwele saana, nuumala-vo mukileele ele eniphavela anyu, wiira kamuleele Muluku okirumme”.
13 Siiso, Davidi aahimuhimeerya Gadi wiira: “Etthu eyo yootepa okixankiha. Halaali kihukhummwe ni Yehova, ohiya ni atthu, okhala wiira omoriwa wawe ikharari ti wuulupale”.
14 Moottharelana Yehova aahaaroihela ekwerere atthu a Isarayeli, nto atthu 70.000 yaahikhwa.
15 Muluku eekeekhai aahiruma nlaikha wiira napwetexe oYerusalemu, masi okathi nlaikha nlo naahanle aya opwetexa, Yehova aahiweha ni aahiriipiwa murima mwaha wa ehasara ele. Vano aahihimeerya nlaikha nle naapwetexa wiira: “Vaaphiyerya! Mukuruxe ntata”. Nlaikha na Yehova naari waattamela opuro oneepetthiwa etriku wa Ornani, muyebusi.
16 Okathi Davidi aawenhe awe osulu, aahiweha nlaikha na Yehova neemenle ene eriyari ya elapo ni erimu, nikunxe ene espaata mmatatani nithoonyaka oYerusalemu. Nto Davidi ni axitokweene, awanre ene isaakho, moowaakuveya yaahikokhora yuuramaka mpakha vathi.
17 Davidi aahimuhimeerya Muluku eekeekhai oriki: “Kiira ti miyo kirumme wiira yalempwe atthu? Ti miyo kitthenke, nave ti miyo kipanke etthu ela yootakhala. Ankhi ipwittipwitthi iya siirale-ni? Khoo Yehova Muluku aka, xontte, mukihukhumu miyo paahi ni atthu a etthoko ya paapa aka, masi muhaakumiherye etthu yootakhala atthu anyu”.
18 Nuumala-vo, nlaikha na Yehova naahimuleela Gadi wiira amuhimeerye Davidi wiira ovenye ni amutekele altaari Yehova opuro oneepetthiwa etriku wa Ornani, muyebusi.
19 Siiso, Davidi aahiiwelela moolumo a Yehova, aalavunle awe omurumeelaka profeta Gadi.
20 Okathi ene yoowo, Ornani aahirukunuwa ni aahiweha nlaikha, owo vamosa ni anaawe axexe aarina awe, yaahiipithasa. Ornani iira eepetthaka etriku.
21 Okathi Davidi aamwaattamenle awe, Ornani aahinweha, moowaakuveya aahikhuma opuro oneepetthiwa etriku, okokhora ohoolo wa Davidi, uurama mpakha vathi.
22 Davidi aahimuleela Ornani wiira: “Mukitumiherye* opuro ola oneepetthiwa etriku wiira kimutekele altaari Yehova. Mukitumiherye eperesu eniphwanela aya. Siiso enoomala-mala ehasara ela enaakhumelela atthu”.
23 Masi Ornani aahimuhimeerya Davidi wiira: “Muhalaneke, pwiya aka mwene, mwiiriheke ele munoona anyu oreerela. Sookhala ipooyi iya kinoovahaakani wiira nvahe mukuttho woopahiwa, ni ithaapwa iya wiira murumeele ntoko ikhuni ni etiriku para soovaha sa ipyo. Kinimoovahani sootheene iya”.
24 Nto, mwene Davidi aahimuleela Ornani wiira: “Nnaari, mukileele eperesu yoomalela, okhala wiira nkikhanle ookuxa ele eri yawinyu wiira kinvahe Yehova, nnakhala onvaha mikuttho soopahiwa kihilinve etthu”.
25 Siiso, Davidi aahinvaha Ornani ixeekele* 600 sa eweero, wiira othume opuro ole.
26 Vano Davidi aahimutekela altaari Yehova opuro ole, nave aahivaha mikuttho soopahiwa ni mikuttho sa opatthani. Davidi aahimukhuwelela Yehova, nto owo aahimwaakhula okumiheryaka mooro wiirimu, opaha mukuttho waari valtaari.
27 Nuumala-vo, Yehova aahiruma nlaikha wiira nipwehe espaata nipuro naya.
28 Okathi Davidi aasuwenle awe wiira Yehova aahimwaakhula opuro ole weepetthiwa etiriku wa Ornani, muyebusi, khaahiyale ovaha mukuttho opuro ole.
29 Masi, etabernaakulu ya Yehova yeeyo Moise aapanke awe woothakoni ni altaari a soovaha soopahiwa, okathi ole yaari opuro woottukhuwa, oXibeyoni.
30 Davidi khaawerya orowa waari etabernaakulu wiira amukohe Muluku, okhala wiira anoova espaata ya nlaikha na Yehova.
Inoota
^ Aahiiso, woonasa wene: “Nwanani”.
^ Aahiiso, “xoowa”.
^ Eheeberi, “Mukivahe”.
^ Exeekele emosa yaalemela ikarama 11.4. Munwehe Apendise B14.
