Wahala Oopacerya 22:1-19
22 Davidi aahihimya wiira: “Ela empa ya Yehova, Muluku eekeekhai, nave ola altaari yoowo atthu a Isarayeli anrowa aya opahaka mikuttho”.
2 Moottharelana Davidi aahiruma othukumanyiwa anamurwa yaakhala elapo ya wIsarayeli, aathanla wiira akhale alipa anipwexa maluku, wiira apwexeke ni alokiheryeke maluku wiira etekeliwe empa ya Muluku eekeekhai.
3 Nave-tho Davidi aahikumiha eyuuma yinceene wiira sipakeliwe ipereku sa mikhora, aprasateira,* ni ekoopiri yoowaatta yahaaweryaneya ophimmwa.
4 Nave aahikumiha matera a eseeturu yahaaweryaneya okontariwa, okhala wiira atthu a oSiidoni ni a oTiiro yaahimuruuhela Davidi matera manceene a eseeturu.
5 Nave Davidi aahihimya wiira: “Mwanaka Salomoni mmiravo ni khonisuwela itthu sinceene, nave empa enrowa otekeliwa Yehova ti yooreerexa ni yuulupalexa, siiso ovuwa waya ni oreera waya enoosuweliwa ilapo sootheene. Tivo kinoomulokiherya itthu sootheene simphaveliwa para empa eyo”. Siiso Davidi ohinatthi okhwa aahilokiherya ikaruma sinceene.
6 Moottharelana, Davidi aahimwiihana mwanawe Salomoni, omulakiherya wiira oteke empa ya Yehova, Muluku a Isarayeli.
7 Davidi aahimuleela mwanawe Salomoni wiira: “Miyo kaaniphavela ni murima aka wootheene oteka empa yaarowa okhalana nsina na Yehova, Muluku aka.
8 Masi Yehova aahikileela wiira: ‘Nyuwo moowiiva atthu anceene , nave moowana ikhotto sinceene. Tivo khamunrowa oteka empa enrowa okhalana nsina naka, okhala wiira moowiiva atthu anceene ohoolo waka.
9 Vano nyuwo munookhalana mwaana onrowa okhala mutthu a murettele, nto kinoomwiiriha okhalana murettele ni awanani awe ootheene amurukurenrye, okhala wiira nsina nawe ninrowa okhala Salomoni,* nave mahiku awe kinimwaavaha murettele* ni omaaleleya atthu a Isarayeli.
10 Owo tonrowa oteka empa erina nsina naka. Nave owo onrowa okhala mwanaka, vano miyo kinrowa okhala paapa awe. Kinoolipiha ehice ya omwene awe wIsarayeli mahiku ootheene’.
11 “Vano mwanaka, Yehova okhale ni nyuwo, nave itthu siweetteleni saana wiira mmutekele empa Yehova Muluku anyu, ntoko oleihenrye awe.
12 Yehova oovaheeni ankhili ni osuwela okathi onrowa awe woovahani okhulupale wIsarayeli, wiira mweetteleke nlamulo na Yehova Muluku anyu.
13 Vano, itthu sinooweettelani saana akhala wiira munimwiiwelela oratteene sooruma ni malamulo Yehova aamurumme awe Moise waavaha atthu a Isarayeli. Mulipe murima ni mwiilipihe. Muhoove, nnakhala muhithukumele.
14 Kihiimananiha vanceene wiira kilokiherye ikaruma sinrowa otekeliwa empa ya Yehova: italento* 100.000 sa eweero, italento 1.000.000 sa eparatha, ekoopiri yinceene ni eyuuma ehiniweryaneya ophimmwa. Nave koolokiherya matera ni maluku, masi nyuwo munimuncererya itthu iyo.
15 Nyuwo mookhalana anamuteko anceene, eyo piiyo, alipa anipwexa maluku, alipa-ooteka, makalapintero, ni atthu anceene anivara miteko soovirikana.
16 Nave mookhalana eweero, eparatha, ekoopiri ni eyuuma ehiniweryaneya ophimmwa. Tivo, nvenye mpacerye ovara muteko, nave Yehova okhale ni nyuwo”.
17 Nuumala-vo, Davidi aahaaruma makhulupale ootheene a wIsarayeli wiira amukhaliherye mwanawe Salomoni, oriki:
18 “Kiira Yehova Muluku anyu ori ni nyuwo, ni ohoovahani murettele ipantta sootheene? Owo ookivahererya atthu ootheene a elapo ela, nave elapo ela yooweriwa ohoolo wa Yehova ni ohoolo wa atthu awe.
19 Vano mulakele ni murima anyu wootheene ni okumi* anyu wootheene omphavela Yehova Muluku anyu. Nave mpacerye oteka opuro woowaarya wa Yehova Muluku eekeekhai, wiira muroihe nivuku na nivarihano na Yehova, ni mireerelo soowaarya sa Muluku eekeekhai, empa enrowa otekiwa erina nsina na Yehova”.
Inoota
^ Ikaruma sa eyuuma sinlipihaniwa mukhora.
^ Nsina nla nikumihiwe nuulumo na eheeberi nintaphulela “Murettele”.
^ Eheeberi, “omumula”.
^ Etalento emosa yaalemela ikiilu 34.2. Munwehe Apendise B14.
^ Nwehe Moolumo Ootthokiheriwa ani: “Okumi”.
