1 Yohani 2:1-29
2 Anaaka oophentiwa, kinoolepelani itthu iya wira muhipake etampi. Masi, akhala mutthu onipaka etampi, nookhalana namakhaliherya* Yesu Kristu, naxariya, yoowo ori ni Tiithi.
2 Yesu tori mukuttho oniliverya itampi sahu, wira onaataanihe-tho ni Muluku. Ohiya paahi itampi sahu, masi-tho itampi sa atthu a olumwenku wotheene.
3 Naahihiye wiiwelela sooruma sa Yesu,* vanimooneyaka wira ninnimusuwela owo.
4 Ole onihimya wira: “Miyo kinnimusuwela owo”, masi ohinatthara sooruma sawe, mutthu owo nawoothe, ni khorina ekeekhai.
5 Vano mutthu oneettela nuulumo na Kristu, onnooniherya wira onnimphenta Muluku ni murima wotheene. Nave-tho niira siiso, nnimooniherya wira nihiiraana nuuwo.
6 Ole onihimya wira onikhala oowiiraana nuuwo, ohaana weetta ntoko Yesu eetta awe.
7 Anna oophentiwa, khahiyo kinoovahani yooruma esya, masi kinihimya yooruma ya khalai, yeeyo musuwenle anyu okhuma khalai. Yooruma eyo ya khalai, ti nuulumo naiwale anyu.
8 Nto yooruma kinihimya aka ti ya niinaano, yeeyo Yesu otthanre awe ni nyuwo-tho munitthara anyu. Tthiri epiphi yoovira, ni wookhumelela waarya weekeekhai.
9 Ole onihimya wira ori moowaaryani, masi onamunyokha munnawe, mutthu owo nlelo ori mweepiphini.
10 Ole onimphenta munnawe, onnikhala moowaaryani, nto khiivo etthu enrowa omukwattuliha.
11 Masi ole onimunyokha munnawe, mutthu owo ori mweepiphini, ni oneetta mweepiphini, nave-tho khonisuwela onrowa awe, maana epiphi yoomuriipiha owiitho wawe.*
12 Anaaka oophentiwa, kinoolepelani okhala wira itampi sanyu sooleveleliwa, mwaha wa nsina na Yesu.
13 Kinoolepelani nyuwo axipaapa, maana moomusuwela ole onikhala okhuma woopaceryani. Kinoolepelani nyuwo amiravo, okhala wira monwerya Mutakhali. Kinoolepelani nyuwo anaaka oophentiwa, maana munnimusuwela Tiithi.
14 Kinoolepelani nyuwo axipaapa, maana moomusuwela ole onikhala okhuma woopaceryani. Kinoolepelani nyuwo amiravo, okhala wira mookhalana ikuru, nave nuulumo na Muluku nri mwa nyuwo. Nyuwo monwerya Mutakhali.
15 Muhiphenteke olumwenku ni itthu sa olumwenku. Akhala mutthu oniphenta olumwenku, ophenta wa Tiithi khokhanle nuuwo.
16 Tthiri, itthu sotheene siri moolumwenkuni, eyo piiyo, itthu erutthu ahu siniphavela aya, ophavela sotheene sinoona ahu, ni ophavela wooniherya itthu mutthu orina awe,* khasinikhuma wa Tiithi, masi sinikhuma moolumwenkuni.
17 Nave-tho, olumwenku ola onoomala vamosa ni itthu sotheene siri moolumwenkuni atthu aniphavela aya. Masi ole oneettela ele Muluku oniphavela awe, onookhala mahiku otheene.
18 Anaaka oophentiwa, ola okathi wookiserya, ntoko mwiiwale anyu wira nwanani a Kristu onnoorwa, nto vano aakhumelela awanani a Kristu anceene. Tthiri, hiyo noosuwela wira ola okathi wookiserya.
19 Awo akhumme eriyari ahu, masi khahiyo yaari awihu, maana vaakhanle wira tawihu, yaamukhala ni hiyo. Masi awo aakhuma wira vasuwanyeye wira khahiyo wira atthu otheene tawihu.
20 Nto nyuwo moothanliwa* ni Muluku oowaarya, nave otheene anyu moosuwela ekeekhai.
21 Kinoolepelani mwaha woowi moosuwela ekeekhai, ohiya mwaha woohisuwela. Nave moosuwela wira wootha khonikhuma mweekeekhaini.
22 Ti pani ori nawoothe? Niireke khahiyo yoole onikhootta wira Yesu ti Kristu? Owo ti nwanani a Kristu, yoowo onimukhootta Tiithi ni Mwaana.
23 Ole onimukhootta Mwaana, khahiyo murumeyi a Muluku. Masi ole onimutthara Mwaana, ti murumeyi a Muluku.
24 Nto etthu mwiiwale anyu okhuma woopaceryani, ehaana okhala vamurimani vanyu. Akhala wira ele yiiwale anyu okhuma woopaceryani eri vamurimani vanyu, weeso munimwiiraana ni Mwaana vamosa ni Tiithi.
25 Nave-tho, etthu onileihenrye awe tiila: okumi woohimala.
26 Kinoolepelani itthu iya mwaha wa ale aniphavela woohapuxani.
27 Nto okhala wira moothanliwa* ni Muluku orumeelaka munepa awe woowaarya, nlelo mookhalana munepa owo. Tivo, muhiphaveleke wiixuttihiwa ni khula mutthu. Masi owerya wa munepa owo ti weekeekhai, khonootha ni onniwiixuttihani. Vano okhala wira wowiixuttihani, mukhaleke oowiiraana ni munepa owo.
28 Tivonto, anaaka oophentiwa, mwiiraaneke vamosa nuuwo, wira okathi onrowa awe wooniheriwa niweryeke olavula nihoovaka etthu; wira nihimutthyawe mwaha wa wuuliwa muru, okathi onitthika* awe.
29 Mwaasuwelaka wira Yesu* naxariya, munnisuwela-tho wira khula mutthu onipaka itthu sa xariya okhumme wa Muluku.
Inoota
^ Aahiiso, “mulipa-onnaakiha omilattuni”.
^ Ekereku, “owo”.
^ Ekereku, “maitho awe”.
^ Aahiiso, “mireerelo sa mutthu owo”.
^ Ekereku, “muhiittheliwa makhura”.
^ “Nuulumo na ekereku, nintaphulela oheliwa wala wiittheliwa makhura”.
^ Nwehe Moolumo Ootthokiheriwa.
^ Ekereku, “owo”.
