2 aKorinto 4:1-18
4 Nto, okhala wira nookhalana muteko ola mwaha wa omoreliwa ikharari ni Muluku, hiyo khannihiya ovara muteko ola.
2 Masi, nookhootta itthu soowuuliha muru, seiyo sinivariwa wiiphiini, nave khanneetta niphavelaka waawoka atthu, nto nniixuttiha paahi ele nuulumo na Muluku nnihimya aya. Ohoolo wa Muluku, hiyo ninniwooniherya apinaatamu otheene wira ninnipaka etthu yooreera, mwa enamuna enivara mirima saya.*
3 Tthiri, akhala wira ihapari sooreera ninlaleya ahu sihiipithihiwa, siipithihiwe wa ale anrowa opwetexiwa,
4 eyo piiyo, ale ahinaamini, yaawo miyuupuwelo saya sittiyeliwe ni muluku a olumwenku ola,* wira ahimwaleeliwe ni waarya* wa ihapari sooreera soovuwa sa Kristu, yoowo ori eruku ya Muluku.
5 Okathi nnaalaleerya ahu atthu, hiyo khaninlavula myaha sahu, masi ninlavula myaha sa Yesu Kristu, ntoko Pwiya. Nave ninnihimya wira na ipottha sanyu, mwaha wa Yesu.
6 Muluku tohimmye wira: “Muthuko waarye mweepiphini”. Nto Muluku onnimwaleela mirima sahu ni osuwela wawe woovuwa, orumeelaka owiitho wa Kristu.
7 Masi, nookhalana muhakhu ola ori mmwaapuni wa oloko, wira owerya onivikana wa mutthu, okhale wa Muluku, ohiya wawihu.
8 Khula mpantta sinniniphwanya mixankiho, masi khanimphunyiwa vahinwerya ahu weeteteya. Ninkhala ntoko nrootthukweliwa, masi ninnisuwela etthu yoowiira.*
9 Ninnilupatthiwa, masi khanninyanyaliwa. Ninniriheliwa vathi, masi khanimpwetexiwa.
10 Okathi wotheene ninnivilela ohaaxiwa ntoko Yesu aahaaxiwe awe, wira-tho okumi wa Yesu wooniheriwe mookumini mwahu.
11 Hiyo ninnikhala akumi, masi okathi wotheene ninnihala okhwa mwaha wa Yesu, wira okumi wa Yesu wooniheriwe mweerutthuni mwahu.
12 Nnaamwi nihalaka okhwa, eyo ennoophwanyihani okumi.
13 Vaalempwa wira: “Miyo kihooniherya waamini, tivo kilavunle aka”. Nave, hiyo ninnooniherya wira nookhalana waamini omosa-ru, tivo ninlavula ahu.
14 Ole omuhihimunxe Yesu, nave onrowa onihihimuxa wira nakhaleke vamosa ni Yesu, ni onooniroiha ohoolo wa Yesu.
15 Itthu iya sotheene muniireliwa nyuwo, wira oreera murima wuulupale wa Muluku otepeke wuncerereya. Onnitepa wuncerereya okathi atthu anceene aninvuwiha aya Muluku, amuxukhurelaka.
16 Tivonto, hiyo khannitthikela ottuli. Hata irutthu sahu sihononeyaka, mirima sahu ni miyuupuwelo sahu, sinnikhalihiwa isya khuta nihiku.
17 Tthiri, hata maxakha anniphwanya ari ene a* okathi vakhaani ni ahikhanle etthu, maxakha awo anniniiriha waakhela ovuwa, weiwo onitepa wunnuwa* ni ohinimala.
18 Hiyo khanimmakela wuupuwela itthu ninwerya ahu woona, masi nnuupuwela itthu nihinwerya ahu woona, okhala wira itthu sinooneya ti sa okathi vakhaani, masi itthu sihinooneya ti sa okathi ohinimala.
Inoota
^ Nwehe Moolumo Ootthokiheriwa.
^ Nwehe Moolumo Ootthokiheriwa.
^ Aahiiso, “muthuko”.
^ Aahiiso, woonasa wene: “masi khaninnimalela nlipelelo”.
^ Aahiiso, “yooweeha enniphwanya eri ene ya”.
^ Ekereku, “olemela”.
